ଅବକାରୀ ଟିମ ଠାବ କଲା ନକଲି ମଦ ଫ୍ୟାକ୍ଟ୍ରି : ୧୦ ପେଟି ନକଲି ବିଦେଶୀ ମଦ, କଞ୍ଚାମାଲ ଜବତ, ପ୍ରସ୍ତୁତ ଦୁଇ ଅଭିଯୁକ୍ତ ଗିରଫ

ବ୍ରହ୍ମପୁର  , ୬/୨- ଗଞ୍ଜାମ ଜିଲା କୁକୁଡ଼ାଖଣ୍ଡି ବ୍ଲକ ଅନ୍ତର୍ଗତ ମୋହଡା ପଞ୍ଚାୟତ ବୁରଗାଁରୁ ରବିବାର ଠାବ ହୋଇଛି ଆଉ ଏକ ନକଲି ବିଦେଶୀ ମଦ ଫ୍ୟାକ୍ଟ୍ରି । ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ଘରେ  ଚାଲିଥିବା ଏହି  ଫ୍ୟାକ୍ଟ୍ରିରେ ଵ୍ରହ୍ମପୁର ଅବକାରୀ ଭ୍ରାମ୍ୟମାଣ ସଂସ୍ଥା ଚଢଉ କରି ସେଠାରୁ ୧୦ ପେଟି ନକଲି ବିଦେଶୀ ମଦ ସହ ବିପୁଳ ପରିମାଣରେ କଞ୍ଚାମାଲ ଜବତ କରିଛି । ଘଟଣା ସ୍ଥଳରୁ  ଅନନ୍ତେଇ ଗ୍ରାମର ଟିଙ୍କନ ସେଠୀ(୨୩) ଓ  ବୁରଗାଁର  ମୁନା ମଲିକ (୨୪)ଙ୍କୁ ଅବକାରୀ ଟିମ ଗିରଫ କରିଛି। ବୁରଗାଁ ଜଙ୍ଗଲ ନିକଟରେ ଥିବା ଏକ ପରିତ୍ୟକ୍ତ ଘରେ  ଅନେକ ଦିନରୁ ନକଲି ବିଦେଶୀ ମଦ ପ୍ରସ୍ତୁତି ହେଉଥିବା ନେଇ କୌଣସି ସୂତ୍ରରୁ ଅବକାରୀ ଭ୍ରାମ୍ୟମାଣ ସଂସ୍ଥାକୁ ଖବର ମିଳିଥିଲା । ରବିବାର ପୂର୍ବାହ୍ନରେ ଅବକାରୀ ଉପ ଅଧିକ୍ଷକ ବିମ୍ବାଧର ପଣ୍ଡାଙ୍କ ତତ୍ୱବଧାନରେ ସେହି ଘରେ ଚଢାଉ କରାଯାଇଥିଲା  ।

ଚଢାଉ ବେଳେ ସେହି ଘରୁ ବିଭିନ୍ନ ବ୍ରାଣ୍ଡର ୧୦ ପେଟି (୨୫୪ ବୋତଲ)ନକଲି ବିଦେଶୀ ମଦ, ୯୮୦ ଖାଲି ବୋତଲ, ୩୬୦୦ ଠିପି, ୪୦ ସିଟ ବିଭିନ୍ନ ବ୍ରାଣ୍ଡ କମ୍ପାନୀର ଲେବେଲେ, ୯ ଲିଟର (ଅର୍ଗାନିକ ଆଲବମ)ସ୍ପିରିଟ ,ଅଧା କେଜି କଲର (ରଙ୍ଗ) ,  ଜବତ କରାଯାଇଥିଲା । ଅଭିଯୁକ୍ତ ଟିଙ୍କନ ବାହାର ରାଜ୍ୟରୁ  ବୋତଲ, ଠିପି , ରଙ୍ଗ ଓ ସ୍ପିରିଟ ଆଣି ଏଠାରେ ନକଲି ମଦ ପ୍ରସ୍ତୁତ କରିବା ପରେ ସେଗୁଡ଼ିକ ମୁନା ମାଲିକ ଗଞ୍ଜାମ ଜିଲାର ଵ୍ରହ୍ମପୁର ସମେତ ଆଖପାଖ ଅଞ୍ଚଳକୁ ବିକ୍ରି ପାଇଁ ପଠାଉଥିଲେ ବୋଲି ଜେରା ବେଳେ ଅବକାରୀ ଟିମ ଜାଣିବାକୁ ପାଇଥିଲେ। ଚଢ଼ାଉ ବେଳେ ଅବକାରୀ ଇନ୍ସପେକ୍ଟର ଅର୍ଜୁନ ମଲିକ , ଏସଆଇ ଅଭିରାମ ସାହୁ , ଧରଣୀଧର ପ୍ରହରାଜ , ଏଏସଆଇ ଶେଖ ଇଦରିଶ ହୁସେନ,ପ୍ରଦୀପ ସାହୁ  ସମେତ ଅନ୍ୟ ଅଧିକାରୀ ମାନେ ସାମିଲ ଥିଲେ।