ବେଲଗୁଣ୍ଠା, 29/12, ଧରାକୋଟ ବ୍ଳକ୍ ତଥା ଗାଙ୍ଗପୁର ଥାନା ଅନ୍ତର୍ଗତ ଡି.ସିଙ୍ଗିପୁର ଗ୍ରାମରେ ଗୋଷ୍ଠୀ ସଂଘର୍ଷ ଘଟି ଚାରି ଜଣ ଯୁବକ ଆହତ ହୋଇଥିବା ବେଳେ ଉଭୟ ପକ୍ଷରୁ ଗାଙ୍ଗପୁର ଥାନାରେ ମାମଲା ରୁଜୁ ହୋଇଥିବା ସୂଚନା ମିଳିଛି I ସୂଚନା ପ୍ରକାରେ ଆଜି ଅପରାହ୍ଣ ଚାରି ଘଣ୍ଟା ସମୟରେ ଡି.ସିଙ୍ଗିପୁର ଗ୍ରାମର ପ୍ରସନ୍ନ ଦାଶଙ୍କ ପୁଅ ଶ୍ରୀତମ ଦାଶ ଏବଂ ସେହି ଗ୍ରାମର ଆଉ ଜଣେ ପ୍ରାସନ୍ନ ଦାଶଙ୍କ ପୁଅ ମୁକେଶ ଦାଶ ଏକ ମୋଟରସାଇକେଲ୍ ଯୋଗେ ଡି.ସିଙ୍ଗିପୁର ଠାରୁ ନିକଟସ୍ଥ ପାଟପୁର ଗ୍ରାମକୁ ଯାଉଥିବା ବେଳେ ଦୁଇ ଗ୍ରାମ ମଧ୍ୟରେ ଏକ ନିଛାଟିଆ ସ୍ଥାନରେ ଚାରି ଜଣ ମଦ୍ଯପ ସେମାନଙ୍କୁ ଅଟକାଇବା ସହ ଏହି ରାସ୍ତରେ କାହିଁକି ଯାଉଛ ବୋଲି ପଚାରୁଥିଲେ I ଶ୍ରୀତମ ଏବଂ ମୁକେଶ ନିଜ କାମ ପାଇଁ ପାଟପୁର ଯାଉଥିବା କହିବା ପରେ ଚାରି ମଦ୍ଯପ ସେମାନଙ୍କୁ ସେହି ରାସ୍ତାରେ ଯିବାକୁ ବାରଣ କରିବା ସହ କାଠ ଫାଳିଆରେ ମାଡ଼ ମାରିଥିଲେ I ମାଡ଼ ମାରିଥିବା ଯୁବକ ମାନେ ହେଲେ ଡି. ସିଙ୍ଗିପୁର ଗ୍ରାମର ରୋହିତ ସେଠୀ (38),ପାଟପୁର ଗ୍ରାମର କେଶବ ବେହେରା (26),ବିଜୟ ସ୍ୱାଇଁ (45) ଏବଂ କଈଠିଆ ଗ୍ରାମର ବୁଲୁ ଗୌଡ଼ (42) I ଶ୍ରୀତମ ଏବଂ ମୁକେଶ ଆକ୍ରମଣର ଶିକାର ହୋଇଥିବା ଖବର ଉଭୟଙ୍କ ବାପାମାନେ ଜାଣିବା ପରେ ସେମାନେ ମଧ୍ୟ କାଠ ଫାଳିଆ ଧରି ଘଟଣା ସ୍ଥଳକୁ ଯାଇ ଚାରି ମଦ୍ଯପକୁ ପାଲଟା ଆକ୍ରମଣ କରିଥିଲେ I ସେଠାରୁ ଚାରି ମଦ୍ୟପଙ୍କ ମଧ୍ୟରୁ ଦୁଇ ଜଣ ଦୌଡି ପଳାଇବାରେ ସକ୍ଷମ ହୋଇଥିବା ବେଳେ ଉଭୟ ପ୍ରସନ୍ନ ଦାଶଙ୍କ ଆକ୍ରୋଶର ଶିକାର ହୋଇଥିଲେ କେଶବ ଏବଂ ଶିବ I ଏ ଦୁହେଁ ମଧ୍ୟ ମାଡ଼ ଖାଇ ରକ୍ତାକ୍ତ ହୋଇଥିଲେ I ଶ୍ରୀତମର ବେକ ପାଖରେ ଗଭୀର ଆଘାତ ଲାଗିଥିବା ଯୋଗୁଁ ତାକୁ ପ୍ରଥମେ ଆସ୍କା ଏବଂ ପରେ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଥିଲା I ସେହିପରି ଉଭୟ ପ୍ରସନ୍ନ ଦାଶଙ୍କ ପାଲଟା ଆକ୍ରମଣରେ କେଶବ ଏବଂ ଶିବ ମଧ୍ୟ ଗୁରୁତର ଆହତ ହୋଇଥିବା ବେଳେ ଘଟଣା ସମ୍ପର୍କରେ ଖବର ପାଇ ଗାଙ୍ଗପୁର ପୋଲିସ୍ ଘଟଣା ସ୍ଥଳରେ ପହଞ୍ଚି ଉଭୟଙ୍କୁ ଉଦ୍ଧାର କରି ବ୍ରହ୍ମପୁର ବଡ ମେଡ଼ିକାଲକୁ ପଠାଇଥିଲେ I ଉଭୟ ପକ୍ଷରୁ ଥାନାରେ ଦୁଇଟି ମାମଲା ରୁଜୁ ହୋଇଥିବା ବେଳେ ପୋଲିସ୍ ଘଟଣାର ତଦନ୍ତ କରୁଛି I ଘଟଣା ନେଇ ସିଙ୍ଗିପୁର ଗ୍ରାମରେ ଅଶାନ୍ତ ବାତାବରଣ ଧିରେ ଧିରେ ବଢୁଥିବା ବେଳେ ଖବର ପାଇ ଗାଙ୍ଗପୁର ଥାନା ଅଧିକାରୀ ଦେବ କୁମାର ଗମାଙ୍ଗ ସଦଳବଳେ ଘଟଣା ସ୍ଥଳରେ ପହଞ୍ଚି ଉଭୟ ପକ୍ଷର ଲୋକଙ୍କୁ ବୁଝାସୁଝା କରି ଏକ ନିଶ୍ଚିତ ବଡ଼ ଦୂର୍ଘଟଣାକୁ ଏଡାଇ ଦେଇଥିବା ସୂଚନା ମିଳିଛି I ଉଭୟ ପ୍ରସନ୍ନ ଦାଶଙ୍କ ଏତଲାରେ ଚାରି ଜଣ ଯୁବକ ରହିଥିବା ବେଳେ ଅପର ପକ୍ଷର ଏତଲାରେ ଉଭୟ ପ୍ରସନ୍ନ ଦାଶଙ୍କୁ ରଖାଯାଇଥିବା ସୂଚନା ମିଳିଛି I
