ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଖୋର୍ଦ୍ଧା ରୋଡ଼ ରେଳ ମଣ୍ଡଳ ଦ୍ଵାରା ରେକର୍ଡ ସଂଖ୍ୟକ ₹୧୫.୬୩ କୋଟି ଟଙ୍କାର ଜରିମାନା ରାଜସ୍ୱ ଆଦାୟ
ପ୍ରଥମ ତ୍ରୈମାସିକରେ ଟିକେଟ୍ ଯାଞ୍ଚରୁ ସର୍ବାଧିକ ₹୧୫.୬୩ କୋଟି ଆୟ।
ବିନା ଟିକେଟ ଏବଂ ଅନିୟମିତ ଯାତ୍ରା କରୁଥିବା ୨.୩୭ ଲକ୍ଷରୁ ଅଧିକ ଯାତ୍ରୀଙ୍କୁ ଦଣ୍ଡିତ କରାଯାଇଛି।
ପୂର୍ବତଟ ରେଳପଥ ଅନ୍ତର୍ଗତ ଖୋର୍ଦ୍ଧା ରୋଡ଼ ରେଳ ମଣ୍ଡଳ ଚଳିତ ଆର୍ଥିକ ବର୍ଷ ୨୦୨୬-୨୭ ର ପ୍ରଥମ ତ୍ରୈମାସିକ (ଅପ୍ରେଲ-୨୦୨୬ ରୁ ଜୁନ୍-୨୦୨୬) ମଧ୍ୟରେ ଟିକେଟ ଯାଞ୍ଚ ପ୍ରକ୍ରିୟାରୁ ସର୍ବକାଳୀନ ରେକର୍ଡ ସଂଖ୍ୟକ ₹୧୫.୬୩ କୋଟି ଟଙ୍କା ରାଜସ୍ୱ ଆଦାୟ କରି ଏକ ନୂତନ ମାଇଲଖୁଣ୍ଟ ସ୍ଥାପନ କରିଛି।
ଏହି ଅବଧିରେ ମଧ୍ୟରେ ବିନା ଟିକେଟ ଯାତ୍ରା, ଅନିୟମିତ ଯାତ୍ରା ଏବଂ ବିନା ବୁକିଂରେ ସାମଗ୍ରୀ ପରିବହନ କରୁଥିବା ପ୍ରାୟ ୨.୩୭ ଲକ୍ଷ ମାମଲା ଚିହ୍ନଟ କରାଯାଇ ଜରିମାନା କରାଯାଇଛି, ଯାହା ଗତ ବର୍ଷ ଏହି ସମୟ ମଧ୍ୟରେ ୧.୯၂ ଲକ୍ଷ ଥିଲା। ଏହି ସଫଳତା ବିନା ଟିକେଟ ଯାତ୍ରାକୁ ରୋକିବା ଏବଂ ରେଳବାଇର ରାଜସ୍ୱକୁ ସୁରକ୍ଷିତ ରଖିବା ଦିଗରେ ରେଳ ମଣ୍ଡଳର ନିରନ୍ତର ପ୍ରୟାସକୁ ଦର୍ଶାଉଛି।
ଖୋର୍ଦ୍ଧା ରୋଡ଼ ରେଳ ମଣ୍ଡଳର ବରିଷ୍ଠ ମଣ୍ଡଳ ବାଣିଜ୍ୟ ପ୍ରବନ୍ଧକ ଶ୍ରୀ ଅନିଲ କୁମାର ଏସ୍. ଏହି ଉଲ୍ଲେଖନୀୟ ସଫଳତାର ସମ୍ପୂର୍ଣ୍ଣ ଶ୍ରେୟ ଟିକେଟ୍ ଯାଞ୍ଚ କର୍ମଚାରୀଙ୍କ ନିଷ୍ଠା, ପରିଶ୍ରମ ଓ କର୍ତ୍ତବ୍ୟନିଷ୍ଠାକୁ ଦେଇଛନ୍ତି। ପ୍ରମୁଖ ରେଳ ଷ୍ଟେସନ ଓ ଚଳନ୍ତା ଟ୍ରେନଗୁଡ଼ିକରେ ନିୟମିତ ଭାବେ ପରିଚାଳିତ ସଘନ ଫୋର୍ଟ୍ରେସ୍ ଚେକିଂ ବ୍ୟାପକ ଟିକେଟ୍ ଯାଞ୍ଚ ଅଭିଯାନ, ଆକସ୍ମିକ ଯାଞ୍ଚ ଏବଂ ମଧ୍ୟବର୍ତ୍ତୀ ସେକ୍ସନରେ କରାଯାଇଥିବା ଟିକେଟ୍ ଯାଞ୍ଚ କାର୍ଯ୍ୟକ୍ରମ ଏହି ସଫଳତାର ମୂଳ ଆଧାର ବୋଲି ସେ କହିଛନ୍ତି।
ବରିଷ୍ଠ ମଣ୍ଡଳ ବାଣିଜ୍ୟ ପ୍ରବନ୍ଧକ ସମସ୍ତ ଯାତ୍ରୀଙ୍କୁ ସର୍ବଦା ବୈଧ ଟିକେଟ କିମ୍ବା ଉପଯୁକ୍ତ ପ୍ରମାଣପତ୍ର ସହିତ ଯାତ୍ରା କରିବାକୁ ଅନୁରୋଧ କରିଛନ୍ତି ଏବଂ ପ୍ରକୃତ ଯାତ୍ରୀମାନଙ୍କୁ ଉତ୍ତମ ସେବା ପ୍ରଦାନ କରିବାରେ ରେଳବାଇକୁ ସହଯୋଗ କରିବାକୁ କହିଛନ୍ତି। ଏଥିସହିତ, ଦୈନିକ ଯାତ୍ରୀମାନଙ୍କୁ MEMU/ଲୋକାଲ୍ ଟ୍ରେନ୍ରେ ନିୟମିତ ଯାତ୍ରା ପାଇଁ MST/QST/YST ପରି ରିଆତି ସୁବିଧା ଗ୍ରହଣ କରିବାକୁ ପରାମର୍ଶ ଦିଆଯାଇଛି
ଅନଧିକୃତ ଯାତ୍ରାକୁ ରୋକିବା, ଯାତ୍ରାରେ ଶୃଙ୍ଖଳା ବଜାୟ ରଖିବା ଏବଂ ପ୍ରକୃତ ଯାତ୍ରୀମାନଙ୍କ ପାଇଁ ସୁରକ୍ଷିତ, ଶୃଙ୍ଖଳିତ ଓ ସୁବିଧାଜନକ ଯାତ୍ରା ସୁନିଶ୍ଚିତ କରିବା ଲକ୍ଷ୍ୟରେ ଖୋର୍ଦ୍ଧା ରୋଡ଼ ରେଳ ମଣ୍ଡଳ ପକ୍ଷରୁ ଟିକେଟ୍ ଯାଞ୍ଚ ଅଭିଯାନକୁ ଆହୁରି ଜୋରଦାର କରାଯାଇଛି
