– ସୁମାତ୍ରା ହାତୀମାନଙ୍କୁ ରକ୍ଷା କରିବା ପାଇଁ ଭାରତ–ଇଣ୍ଡୋନେସିଆ ସହଯୋଗ
– ତ୍ୱରିତ ରୋଗ ଚିହ୍ନଟ ଏବଂ ଉନ୍ନତ ଚିକିତ୍ସା ଉପରେ ପ୍ରାଧାନ୍ୟ
ଜାମନଗର / ଜକାର୍ତା: ଇଣ୍ଡୋନେସିଆରେ ବ୍ୟାପିଥିବା ଏକ ଗମ୍ଭୀର ରୋଗ ଇଇଏଚଭି ସୁମାତ୍ରା ହାତୀମାନଙ୍କ ଜୀବନକୁ ସଙ୍କଟାପନ୍ନ କରୁଛି। ଏହାର ମୁକାବିଲା କରିବା ପାଇଁ, ଇଣ୍ଡୋନେସିଆର ବନ ମନ୍ତ୍ରଣାଳୟ ଭାରତର ଗୁଜରାଟରେ ଅବସ୍ଥିତ ବିଶ୍ୱସ୍ତରୀୟ ବନ୍ୟପ୍ରାଣୀ ସଂରକ୍ଷଣ କେନ୍ଦ୍ର ବନତାରାଠାରୁ ବୈଷୟିକ ସହାୟତା ନେଉଛି। ଅନନ୍ତ ଅମ୍ବାନୀଙ୍କ ଦ୍ୱାରା ପ୍ରତିଷ୍ଠିତ ବନତାରା, ହାତୀମାନଙ୍କର ଚିକିତ୍ସା, ଠିକ ସମୟରେ ରୋଗ ଚିହ୍ନଟ ଏବଂ ନିବାରଣଜନିତ ଯତ୍ନ କ୍ଷେତ୍ରରେ ଏହାର ବିଶେଷଜ୍ଞତା ମାଧ୍ୟମରେ ଇଣ୍ଡୋନେସିଆର ଅଧିକାରୀମାନଙ୍କୁ ସହାୟତା କରୁଛି ଯାହାଦ୍ୱାରା ଇଇଏଚଭି ଦ୍ୱାରା ହେଉଥିବା ହାତୀ ମୃତ୍ୟୁକୁ ସଠିକ ତଥା ପ୍ରଭାବୀ ଢଙ୍ଗରେ ନିୟନ୍ତ୍ରଣ କରାଯାଇପାରିବ। ସୁମାତ୍ରା ହାତୀମାନେ ପୂର୍ବରୁ ହିଁ ବିଲୁପ୍ତ ହେବାର ଗମ୍ଭୀର ବିପଦରେ ରହିଛନ୍ତି ଏବଂ ଆୟୁସିଏନ ଦ୍ୱାରା ସଙ୍କଟାପନ୍ନ ଶ୍ରେଣୀରେ ତାଲିକାଭୁକ୍ତ ହୋଇଛନ୍ତି।
ରିଆଉ ପ୍ରଦେଶର ସେବାଙ୍ଗା ହାତୀ ସଂରକ୍ଷଣ କେନ୍ଦ୍ରରେ ଇଇଏଚଭିରେ ଏକ କମ ବୟସର ହାତୀର ମୃତ୍ୟୁ ହେବା ପରେ ଏହି ପଦକ୍ଷେପ ନିଆଯାଇଛି। ଏହା ପରେ, ଇଣ୍ଡୋନେସିଆ ସରକାର, ଏହାର ସ୍ଥାନୀୟ ସହଯୋଗୀ ଫଉନା ଲ୍ୟାଣ୍ଡ ଇଣ୍ଡୋନେସିଆ ମାଧ୍ୟମରେ ବନତାରା ଠାରୁ ବୈଷୟିକ ସହାୟତା ଲୋଡ଼ିଥିଲେ, ଯାହାଦ୍ୱାରା ରୋଗକୁ ଶୀଘ୍ର ଚିହ୍ନଟ କରାଯାଇପାରିବ ଏବଂ ହାତୀମାନଙ୍କ ଉନ୍ନତ ଚିକିତ୍ସା କରାଯାଇପାରିବ।
ଏହି ସହଯୋଗର ଆଧାରରେ ବନତାରାର ପଶୁଚିକିତ୍ସକ, ଜୀବବିଜ୍ଞାନୀ ଏବଂ ଅନ୍ୟ ବିଶେଷଜ୍ଞମାନେ ରିଆଉରେ ପହଞ୍ଚିଛନ୍ତି। ଏହି ବିଶେଷଜ୍ଞମାନେ ଇଣ୍ଡୋନେସିଆର ଅଧିକାରୀମାନଙ୍କ ସହ ମିଳିତ ଭାବରେ ହାତୀମାନଙ୍କ ସ୍ୱାସ୍ଥ୍ୟ ପରୀକ୍ଷା କରୁଛନ୍ତି ଏବଂ ରୋଗର ପ୍ରାରମ୍ଭିକ ଲକ୍ଷଣଗୁଡ଼ିକ ଉପରେ ଧ୍ୟାନ ଦେଇ ଚିକିତ୍ସା ଓ ଯତ୍ନ ପ୍ରଣାଳୀକୁ ସୁଦୃଢ଼କରିବା ଦିଗରେ କାମ କରୁଛନ୍ତି। ବିଶେଷ ଭାବରେ ମାନବ ଯତ୍ନ ବ୍ୟବସ୍ଥାରେ ଥିବା ହାତୀମାନଙ୍କ ଉପରେ ଧ୍ୟାନ କେନ୍ଦ୍ରିତ କରାଯାଉଛି।
ବନତାରା ଚିକିତ୍ସା ସମ୍ବନ୍ଧୀୟ ପରୀକ୍ଷା, ରୋଗ ନିବାରଣ ଏବଂ ସମ୍ଭାବ୍ୟ ଆଣ୍ଟିଭାଇରାଲ୍ ଔଷଧ ଉପରେ ବୈଷୟିକ ପରାମର୍ଶ ପ୍ରଦାନ କରୁଛି। ଏହା ସହିତ ହାତୀମାନଙ୍କ ସ୍ୱାସ୍ଥ୍ୟ ସହ ଜଡିତ ମୂଳଭୁତ ତଥ୍ୟ ପ୍ରସ୍ତୁତ କରାଯାଉଛି ଏବଂ ମାହୁନ୍ତ ତଥା ସ୍ଥାନୀୟ ପଶୁଚିକିତ୍ସା କର୍ମଚାରୀମାନଙ୍କୁ ପ୍ରଶିକ୍ଷଣ ପ୍ରଦାନ କରାଯାଉଛି।
ଗୁଜରାଟର ଜାମନଗର ସ୍ଥିତ ବନତାରା ଏକ ଆନ୍ତର୍ଜାତୀୟ ସ୍ତରର ବନ୍ୟପ୍ରାଣୀ ସଂରକ୍ଷଣ କେନ୍ଦ୍ର, ଯେଉଁଠାରେ ହାତୀମାନଙ୍କ ଚିକିତ୍ସା ପାଇଁ ଏକ ଅତ୍ୟାଧୁନିକ ହସ୍ପିଟାଲ ରହିଛି। ଏଠାରେ ରୋଗର ପ୍ରାରମ୍ଭିକ ସ୍ତରରେ ଚିହ୍ନଟ ଏବଂ ନିବାରଣ ଉପରେ ବିଶେଷ ଗୁରୁତ୍ୱ ଦିଆଯାଉଛି।
ଏହି ପଦକ୍ଷେପ ବର୍ତ୍ତମାନ ରିଆଉରେ ଥିବା ବୁଲୁହ ଚୀନା ନେଚର ଟୁରିଜିମ ପାର୍କ ଯାଏଁ ସୀମିତ ରହିଛି, କିନ୍ତୁ ଏହାକୁ ଆଗାମୀ ଦିନରେ ତେସୋ ନିଲୋ ନ୍ୟାସନାଲ ପାର୍କ, ସେବାଙ୍ଗା, ୱେ କମ୍ବାସ ଏବଂ ଇଣ୍ଡୋନେସିଆର ଅନ୍ୟ ଅଞ୍ଚଳକୁ ସମ୍ପ୍ରସାରଣ କରିବାକୁ ଯୋଜନା ରହିଛି। ଏହି ଭାରତ-ଇଣ୍ଡୋନେସିଆ ସହଯୋଗ ସୁମାତ୍ରା ହାତୀଙ୍କ ସଂରକ୍ଷଣକୁ ସୁଦୃଢ଼କରିବ।
