ସମ୍ବଲପୁରରେ ବିଭିନ୍ନ ଅନୁଷ୍ଠାନର “ନୂଆଁଖାଇ ଭେଟଘାଟ୍”ରେ ଯୋଗଦେଲେ କେନ୍ଦ୍ରମନ୍ତ୍ରୀ , ସମ୍ବଲପୁରର ପ୍ରତିଚ୍ଛବିକୁ ବିଶ୍ୱ ଦରବାରରେ ପହଞ୍ଚାଇବା – ଧର୍ମେନ୍ଦ୍ର ପ୍ରଧାନ

• ‘ଓଡ଼ିଶା ସାଂସ୍କୃତିକ ସମାଜ’, ପଣ୍ଡିତ ଲକ୍ଷ୍ମୀନାରାୟଣ ସାଂସ୍କୃତିକ ସଂସଦ ଓ ଚିତ୍ରୋତ୍ପଳା ଯୁବକ ସଂଘ ଏବଂ ‘ସମଲେଶ୍ୱରୀ ଯୁବକ ସଂଘ’ର ପୃଥକ “ନୂଆଁଖାଇ ଭେଟଘାଟ୍” କାର୍ଯ୍ୟକ୍ରମରେ ହେଲେ ସାମିଲ
• ନ୍ୟୁ ଏଜ୍ ଇକୋନୋମୀ ତିଆରି କରିବା ପାଇଁ ଯୋଜନା କରିବା
• ସରସତିଆ ଭଳି ପାରମ୍ପରିକ ଖାଦ୍ୟକୁ ଜିଆଇ ଟ୍ୟାଗରେ ସାମିଲ କରିବା ପାଇଁ ହେବ ଉଦ୍ୟମ
• ସମ୍ବଲପୁରକୁ ସ୍ୱଚ୍ଛ ଓ ସୁନ୍ଦର ରଖିବା ହେଉ ନୂଆଁଖାଇର ସଂକଳ୍ପ
• ନୂଆଁଖାଇ ଏକତାର ବାର୍ତ୍ତା ଦେଉଛି, ଯେଉଁ ଏକତା ବଳରେ ଆମେ ବିଶ୍ୱର ନେତୃତ୍ୱ ନେଇପାରିବା

ସମ୍ବଲପୁର :  ସମ୍ବଲପୁରରେ ଅନେକ ସମ୍ଭାବନା ଥିବା ବେଳେ ଦକ୍ଷ ଯୁବଶକ୍ତି ଅଛନ୍ତି । ସମ୍ବଲପୁରର ପ୍ରତିଚ୍ଛବିକୁ ବିଶ୍ୱ ଦରବାରରେ ପହଞ୍ଚାଇବା ପାଇଁ ଆମେ ସମସ୍ତେ ଏକାଠି ହୋଇ ନିଜର ଦାୟିତ୍ୱ ନିର୍ବାହ କରିବାର ଆବଶ୍ୟକତା ରହିଛି ବୋଲି ଗୁରୁବାର ସମ୍ବଲପୁରରେ ବିଭିନ୍ନ ସାମାଜିକ ଓ ସାଂସ୍କୃତିକ ଅନୁଷ୍ଠାନ ପକ୍ଷରୁ ଆୟୋଜିତ “ନୂଆଁଖାଇ ଭେଟଘାଟ୍” କାର୍ଯ୍ୟକ୍ରମରେ ଯୋଗଦେଇ କହିଛନ୍ତୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

କେନ୍ଦ୍ରମନ୍ତ୍ରୀ ‘ଓଡ଼ିଶା ସାଂସ୍କୃତିକ ସମାଜ’, ପଣ୍ଡିତ ଲକ୍ଷ୍ମୀନାରାୟଣ ସାଂସ୍କୃତିକ ସଂସଦ ଓ ଚିତ୍ରୋତ୍ପଳା ଯୁବକ ସଂଘ ଏବଂ ‘ସମଲେଶ୍ୱରୀ ଯୁବକ ସଂଘ’ର ପୃଥକ ପୃଥକ “ନୂଆଁଖାଇ ଭେଟଘାଟ୍ – ୨୦୨୫” କାର୍ଯ୍ୟକ୍ରମରେ ଯୋଗଦେବା ସହ ପ୍ରତିଭାବାନ ବ୍ୟକ୍ତିବିଶେଷ ଓ ଅନୁଷ୍ଠାନକୁ “ନୂଆଁଖାଇ” ସମ୍ମାନରେ ସମ୍ମାନିତ କରିଥିଲେ । ଏହି ଅବସରରେ ଶ୍ରୀ ପ୍ରଧାନ କହିଛନ୍ତି ସମ୍ବଲପୁରରେ ଅନେକ ସମ୍ଭାବନା ଅଛି । ବୁର୍ଲା ଇଞ୍ଜିନିୟରିଂର ଛାତ୍ରଛାତ୍ରୀମାନେ ନିଜ କୌଶଳ ଦ୍ୱାରା ବିଶ୍ୱରେ ପରିଚୟ ତିଆରି କରୁଛନ୍ତି । ସମ୍ବଲପୁରରେ ନ୍ୟୁ ଏଜ୍ ଇକୋନୋମୀ ତିଆରି କରିବା ପାଇଁ ଯୋଜନା କରିବାକୁ ହେବ । ଯୁବକମାନଙ୍କୁ ଅଧିକ ଦକ୍ଷ ସହ ସେମାନଙ୍କ ପାଇଁ ରୋଜଗାର ସୃଷ୍ଟି କରିବାକୁ ହେବ । ସମ୍ବଲପୁରୀ କଳାର ଏକ ଅତ୍ୟାଧୁନିକ ସେଣ୍ଟର ତିଆରି କରିବା । ସରସତିଆ ଭଳି ପାରମ୍ପରିକ ଖାଦ୍ୟକୁ ଜିଆଇ ଟ୍ୟାଗରେ ସାମିଲ କରିବା ପାଇଁ ଉଦ୍ୟମ କରିବା । କୁଦୋପାଲି ଭଳି ସମ୍ବଲପୁରର ଇତିହାସକୁ ଆଗେଇ ନେବାରେ ସହଯୋଗୀ ହେବା ।

ଶ୍ରୀ ପ୍ରଧାନ ଆହୁରି କହିଥିଲେ ଏକାଠି ହେବା  ଓ ଏକଜୁଟ ହୋଇ ରହିବାର ପର୍ବ ହେଉଛି ନୂଆଁଖାଇ । ବିକଶିତ ସମ୍ବଲପୁର, ବିକଶିତ ଓଡ଼ିଶା ଓ ବିକଶିତ ଭାରତ ଗଢ଼ିବା ପାଇଁ ଆମେ ଯେଉଁ ସଂକଳ୍ପ ନେଇଛୁ, ସେଥିପାଇଁ ଆମର ଏକତା ଅତୁଟ ରହିବା ଆବଶ୍ୟକ । ଏକତା ବଳରେ ହିଁ ଆମେ ସମଗ୍ର ବିଶ୍ୱକୁ ନୂଆ ନେତୃତ୍ୱ ଦେଇ ପାରିବା ବୋଲି ସେ କହିଥିଲେ । ସମ୍ବଲପୁରକୁ ସ୍ୱଚ୍ଛ ଓ ସୁନ୍ଦର ରଖିବା ସହ ସିଙ୍ଗଲ୍ ୟୁଜ୍ ପ୍ଲାଷ୍ଟିକର ବ୍ୟବହାରକୁ କମ କରିବା ପାଇଁ ସେ ଜନସାଧାରଣଙ୍କୁ ଅପିଲ କରିଛନ୍ତି ।