ବାରିପଦା : ମୟୂରଭଞ୍ଜ ଜିଲ୍ଲାସ୍ତରୀୟ ବିଜ୍ଞାନ କୁଇଜ ପ୍ରତିଯୋଗିତା ବାରିପଦାସ୍ଥିତ ମହାରାଜା କୃଷ୍ଣଚନ୍ଦ୍ର ଉଚ୍ଚ ବିଦ୍ୟାଳୟ ସମ୍ମିଳନୀ କକ୍ଷ ପରିସରରେ ନଭେମ୍ବର ୬ତାରିଖରେ ଅନୁଷ୍ଠିତ ହୋଇଯାଇଅଛି । ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ସେଠୀଙ୍କ ମାର୍ଗଦର୍ଶନ ଓ ଜିଲ୍ଲା ବିଜ୍ଞାନ ପରିଦର୍ଶକ ଜ୍ଞାନରଞ୍ଜନ ଆଚାର୍ଯ୍ୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ଏହି କୁଇଜ ପ୍ରତିଯୋଗିତାରେ ଉଭୟ ବରିଷ୍ଠ ଓ କନିଷ୍ଠ ବର୍ଗର ବହୁ ସଂଖ୍ୟକ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ଦୁଇ ବର୍ଗର ଶ୍ରେଷ୍ଠ ବିବେଚିତ ପ୍ରତିଯୋଗୀଦ୍ୱୟ ଭୁବନେଶ୍ୱର ସ୍ଥିତ ଆଞ୍ଚଳିକ ବିଜ୍ଞାନ କେନ୍ଦ୍ର ଠାରେ ନଭେମ୍ବର ଆଠ ତାରିଖରେ ବରିଷ୍ଠ ବର୍ଗର ଓ ନଅ ତାରିଖରେ କନିଷ୍ଠ ବର୍ଗର ରାଜ୍ୟସ୍ତରୀୟ ବିଜ୍ଞାନ କୁଇଜ୍ ପ୍ରତିଯୋଗିତାରେ ଅଂଶଗ୍ରହଣ କରିବେ । ବରିଷ୍ଠ ବର୍ଗରେ ସରକାରୀ ଉଚ୍ଚ ବିଦ୍ୟାଳୟ, ଦାନ୍ତିଆଁମୁହାଁର ଛାତ୍ର ଭାଗ୍ୟରଞ୍ଜନ ମହାନ୍ତ, ଏମପିକେ ବାଳିକା ଉଚ୍ଚ ବିଦ୍ୟାଳୟ, ବାରିପଦାର ଛାତ୍ରୀ ରଶ୍ମିରେଖା ଦାଶ, ରଘୁନାଥ ଉଚ୍ଚ ବିଦ୍ୟାଳୟ, ରାଇକମାର ଛାତ୍ର ଓମପ୍ରକାଶ ପୃଷ୍ଟି ଏବଂ କନିଷ୍ଠ ବର୍ଗରେ କେନ୍ଦ୍ରୀୟ ବିଦ୍ୟାଳୟ, ଲକ୍ଷ୍ମୀପୋଷିର ଛାତ୍ର ଶ୍ରେୟାଂଶୁ ବେହେରା, ଏମପିକେ ବାଳିକା ଉଚ୍ଚ ବିଦ୍ୟାଳୟ, ବାରିପଦାର ଛାତ୍ରୀ ହେମାଙ୍ଗିନୀ ପଣ୍ଡା, ଏମକେସି ଉଚ୍ଚ ବିଦ୍ୟାଳୟର ଛାତ୍ରୀ ନିକିତା ଦାସ ଯଥାକ୍ରମେ ପ୍ରଥମ, ଦ୍ୱିତୀୟ, ତୃତୀୟ ହୋଇ ଅତିଥି ନିକଟରୁ ସାର୍ଟିଫିକେଟ ଗ୍ରହଣ କରିଥିଲେ । ପୁରସ୍କାର ବିତରଣୀ ଉତ୍ସବରେ ମୁଖ୍ୟଅତିଥି ଭାବେ ଅତିରିକ୍ତ ଜିଲ୍ଲା ଅଧିକାରୀ ଦୀପ୍ତି ନାୟକ ଯୋଗଦେଇ କୃତି ପ୍ରତିଯୋଗୀ ମାନଙ୍କୁ ପୁରସ୍କାର ବିତରଣ ସହ ପିଲାମାନଙ୍କୁ ଉତ୍ସାହ କରିଥିଲେ । କାର୍ଯ୍ୟକ୍ରମ ସଂଚାଳନରେ ପ୍ରଧାନଶିକ୍ଷକ ଅମିତାଭ ମିଶ୍ର, ଶିକ୍ଷୟତ୍ରୀ କୁଞ୍ଜବାଳା ମହାନ୍ତ, ଗାୟତ୍ରୀ ବେହେରା, ଅତସୀ କୁଣ୍ଡୁ, ପ୍ରାର୍ଥନା ମିଶ୍ର, ସିଲିସ୍ୱପ୍ନା ପଟ୍ଟନାୟକ, ଶିକ୍ଷକ ମନୋଜ ପରିଡା, ଦୀପକ ରାମ, ଅଜିତ ମହାନ୍ତି ଓ ପ୍ରବୀର ବେହେରା ପ୍ରମୁଖ ସହଯୋଗ କରିଥିଲେ ।
