ବିଧାନସଭା ସୁରକ୍ଷା ବ୍ୟବସ୍ଥା ପାଇଁ ନୂଆ ଷ୍ଟ୍ରାଟେଜି : ସ୍ପେଶାଲ ବ୍ରାଞ୍ଚର ଗୁଇନ୍ଦା ଉପରେ ଗୁରୁତ୍ୱ

ଭୁବନେଶ୍ୱର,(ନି.ପ୍ର): ବିଧାନସଭା ସୁରକ୍ଷା ପାଇଁ ଏଥର ନୂଆ ଷ୍ଟ୍ରାଟେଜି ଓ ସ୍ପେଶାଲ ବ୍ରାଞ୍ଚର ଗୁଇନ୍ଦା ଉପରେ ଗୁରୁତ୍ୱ ଦିଆଯାଇଛି । ଏଥର ବିଧାନସଭା ସମୟରେ ଯିଏ ଆତ୍ମହୁତି ଉଦ୍ୟମ କରନ୍ତି ସେମାନଙ୍କୁ ଗିରଫ କରାଯିବ ବୋଲି ସ୍ପଷ୍ଟ କରାଯାଇଛି ।

ଆତ୍ମହୁତି ହେଉ ବା ବିକ୍ଷୋଭ ପଦର୍ଶନ । ରାଜନୈତିକ ବିରୋଧ ହେଉ କି ରାଜନେତାଙ୍କ ଅନଶନ । ବିଧାନସଭା ଚାଲୁଥିବା ସମୟରେ ଏସବୁର ଟିକନିକ୍ ଖବର ଉପରେ ଫୋକସ୍ କରାଯିବ । ଏହାକୁ ନଜର ରଖିବ ସ୍ପେଶାଲ ବ୍ରାଞ୍ଚର ଗୁଇନ୍ଦା । କାରଣ ବିଧାନସଭା ଅଧିବେଶନ ଚାଲୁଥିବା ସମୟରେ ଯେପରି ଏସବୁ ପରିସ୍ଥିତି ବିଧାନସଭା ଗୃହ ପାଇଁ ବାଧକ ସୃଷ୍ଟି ନ କରେ ତାହା ଉପରେ ଗୁରୁତ୍ୱ ଦିଆଯାଇଛି । ବିଶେଷ କରି ନକ୍ସଲ ଅପରେସନ ବା ସୁରକ୍ଷା ସମ୍ପର୍କିତ ଉପରେ ନଜର ରଖିଥିବା ସ୍ପେଶାଲ ଇଣ୍ଟେଲିଜେନସ ୱିଙ୍ଗ୍ ଏ ନେଇ ଏଥର ସ୍ପେଶାଲ ବ୍ରାଞ୍ଚ୍ ସହ ମିଳିତ ଭାବେ ଗୁଇନ୍ଦା ସୂଚନା ଉପରେ ଫୋକସ ଦେବ ।

ଏପରିକି ରାଜନୈତିକ ବା ସହରର ଗୁଇନ୍ଦା ଉପରେ ଫୋକସ ଦେଉଥିବା ସ୍ପେଶାଲ ବ୍ରାଞ୍ଚ୍ ଏହାର କୋର୍ଡିନେଟ କରି ଏସବୁ ଅପ୍ରୀତିକର ପରିସ୍ଥିତକୁ କିପରି ଏଡାଯିବା ସହିତ ବିଧାନସଭା ଚାଲୁଥିବା ସମୟରେ ଯେପରି ଏସବୁ ସମସ୍ୟା ସୃଷ୍ଟି ନକରିବ ସେ ନେଇ ଧ୍ୟାନ ଦିଆଯିବ । ସେପ୍ଟେମ୍ଭର ୧ ଅର୍ଥାତ୍ ଆଜିଠାରୁ ଆରମ୍ଭ ହେଉଛି ବିଧାନସଭା ଅଧିବେଶନ । ଏଥିପାଇଁ ସୁରକ୍ଷା ବ୍ୟବସ୍ଥା ଯାଞ୍ଚ କରିଛନ୍ତି ପୋଲିସ ମହାନିଦେ୍ର୍ଦଶକ ଅଭୟ । ସବୁଥର ପରି ଚଳିତ ଥର ବିଧାନସଭା ସୁରକ୍ଷା ପାଇଁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଏଥିପ୍ରପାଇଁ ୫ଟି କଣ୍ଟ୍ରୋଲ ରୁମ୍ କରାଯାଇଛି । ନର୍ଥ ଗେଟ୍, ଧାରଣା ସ୍ଥଳ ଓ ୟୁନି ଫାଏଡ୍ କଣ୍ଟ୍ରୋଲ ରୁମ । ମୋଟ ୩୦ ପ୍ଲାଟୁନ୍ ଫୋର୍ସ ଓ ୧୨୦ ଅଫିସର ଦାୟିତ୍ୱରେ ରହିବେ । ସମ୍ଭାବ୍ୟ ବଡ଼ ଧରଣର ଆକ୍ରମଣକୁ ମୁକାବିଲା କରିବା ପାଇଁ ୨ ୟୁନିଟ୍ ସ୍ପେଶାଲ ଟାକ୍ସିକାଲ ୟୁନିଟ୍ ସହ ଷ୍ଟ୍ରାଇକିଂ ଫୋର୍ସ, କୁ୍ୟଏଟି ଟିମ ମୁତୟନ ରହିବ । ଏହାସହିତ ରୁଫ୍ ଟପ୍ ସିକୁ୍ୟରିଟି ସହ ବନ୍ଧୁକଧାରୀ ସୁରକ୍ଷା କର୍ମଚାରୀ ବିଧାନସଭା ଚାରିକଡ଼ରେ ମୁତୟନ ରହିବେ ।

ସୁରକ୍ଷା ବ୍ୟବସ୍ଥା ସହ ସିସିଟିଭି ସର୍ଭିଲାନ୍ସ ବ୍ୟବସ୍ଥା କରାଯାଇଛି । ବିଧାନସଭା ଭିତର, ପରିସର ଓ ପିଏମଜି ସମ୍ପୂର୍ଣ୍ଣ ସ୍ଥାନକୁ ସିଲ୍ କରାଯିବ । ବିଧାନସଭା ଚାରିପଟେ ରହିଥିବା

ସର୍ବସାଧାରଣ ରାସ୍ତା ଜନସାଧାରଣଙ୍କ ପାଇଁ ଯାତାୟତ ପାଇଁ ଅନୁମତି ନାହିଁ ଅର୍ଥାତ୍ ବାରଣ ରହିଛି । କେବଳ ଲୋକସେବା ଭବନ କର୍ମଚାରୀ ଓ ବିଧାନସଭା କର୍ମଚାରୀଙ୍କ ସହ ଅନୁମତି ଥିବା କର୍ମଚାରୀ ପରିଚୟପତ୍ର ଦେଖାଇ ଯାଇପାରିବେ । ଯିବା ଆସିବା ପାଇଁ ଅନ୍ୟାନ୍ୟ ରୁଟ୍ କରାଯାଇଛି । ସାଧାରଣ ଲୋକେ ହଇରାଣ ହରକତ ନ ହୋଇ ଯାଇପାରିବେ । ଏହା ସହିତ ସାଧା ପୋଷାକରେ ପୋଲିସ ଚାରିଆଡେ ଲୋକଙ୍କ ଗହଳିରେ ପଇନ୍ତରା ମାରିବେ । ଏ ନେଇ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି କମିଶନରେଟ୍ ପୋଲିସ । କୋଭିଡ ସମୟ ଚାଲୁଥିବାରୁ କୌଣସି ବିକ୍ଷୋଭ ଓ ଧାରଣା ପାଇଁ ଅନୁମତି ଦିଆଯାଇନାହିଁ । ତେଣୁ ନିୟମକୁ ନ ମାନି ଏଭଳି କାମ କଲେ ଏପିଡେମିକ ଆକ୍ଟରେ ଗିରଫ କରାଯିବ ବୋଲି କୁହାଯାଇଛି ।