ମାଲକାନଗିରି : ଆଦିବାସୀ ବହୁଳ ମାଲକାନଗିରି ଜିଲ୍ଲାର ସ୍ୱାଭିମାନ ଅଞ୍ଚଳ ଅନ୍ତର୍ଗତ ପଣସପୁଟ ପଂଚାୟତ ନିକଟସ୍ଥ ବେଜିଂ ଗ୍ରାମରେ ଯମୁନା ଖିଲ(୧୭) ନାମ୍ନୀ ଜନୈକା କଲେଜ ପାଠୋଇ ଛାତ୍ରୀ ନିଜ ଗ୍ରାମର ଆଦିବାସୀ ଛାତ୍ରଛାତ୍ରୀମାନଙ୍କୁ ମାଗଣାରେ ପ୍ରାଥମିକ ଶିକ୍ଷା ପ୍ରଦାନ କରି ଏବେ ଚର୍ଚ୍ଚାର ପରିଧିକୁ ଆସିଛି।
କରୋନା ମହାମରି ଯୋଗୁଁ ସମସ୍ତ ପ୍ରାଥମିକ ବିଦ୍ୟାଳୟଗୁଡିକ ମାସ ମାସ ଧରି ବନ୍ଦ ରହିଥିବା ବେଳେ ଦୀର୍ଘ ଦିନ ହେଲା ଶିକ୍ଷକ ଶିକ୍ଷୟିତ୍ରୀମାନଙ୍କ ଗ୍ରାମାଞ୍ଚଳରେଥିବା ବିଦ୍ଯାଳୟରେ ପାଦ ପଡୁ ନାହିଁ !ଫଳରେ ଗୁରୁ ଶିଷ୍ଯମାନଙ୍କର ଘନିଷ୍ଠ ସଂପର୍କ ଛିନ୍ନ ହେବାରେ ଲାଗିଛି ! ଆଦିବାସୀ ଗ୍ରାମର ପିଲାମାନେ ଶିକ୍ଷା ଠାରୁ ଦୂରରେ ରହି ଧୀରେ ଧୀରେ ପଢାପଢି ଭୁଲିବାରେ ଲାଗିଛନ୍ତି ! ସ୍ବାଭିମାନ ଭଳି ଅପହଞ୍ଚ ଅଞ୍ଚଳରେ ଶିକ୍ଷା ଏଠାରେ ବାଟବଣା ହୋଇଥିବା ବେଳେ ବେଜିଂ ଗ୍ରାମର କଲେଜ ପାଠୋଇ ଝିଅ ଯମୁନା ଖିଲ ମନରେ ଏକ ସମାଜସେବା ମନ ବୃତ୍ତି ଜାଗ୍ରତ ହୋଇଥିଲା !ଗ୍ରାମର ପିଲାମାନେ ବିଦ୍ଯାଳୟ ନଖୋଲିବା ଯୋଗୁଁ ଏତେତେଣେ ବୁଲିବା ସହ ଘରୋଇ କାର୍ଯ୍ଯରେ ସମୟ ଅତିବାହିତ କରୁଥିବା ଦେଖିବାକୁ ମିଳିଥିଲା !ଫଳରେ ପିଲାମାନଙ୍କ ଭବିଷ୍ଯତ ଅନ୍ଧକାର ଆଡକୁ ଗତି କରୁଛି !
ଏଣୁ ଯମୁନା ମହତ ଚିନ୍ତା କରି ନିଜ ଗାଁ’ର ପିଲାମାନଙ୍କୁ ଘର ଘର ବୁଲି ବାପା ମାଆଙ୍କୁ ବୁଝାଇ ଏକତ୍ରିତ କରିବା ସହିତ ନିଜର ଏକ ଭଙ୍ଗା ଚାଳିଆରେ ଚାଟଶାଳୀ ଖୋଲି ପାଠ ପଢାଇବା ଆରମ୍ଭ କରିଛି ! ଯମୁନା ଜଣେ ଆଦିବାସୀ ସଂପ୍ରଦାୟର କଲେଜ ପାଠୁଆ ଝିଅ ! ନିଜ ସଂପ୍ରଦାୟର ପିଲାମାନଙ୍କର ଉଜ୍ଜ୍ବଳ ଭବିଷ୍ଯତ କାମନା କରି ସକାଳ ଏବଂ ସନ୍ଧ୍ୟାରେ ଦୁଇ ଘଣ୍ଟା ଲେଖାଏଁ ବିନା ମୂଲ୍ୟରେ ଶିକ୍ଷା ଦାନ କରୁଥିବା ଜଣା ପଡିଛି । ଯମୁନା +୨ ବାଲିମେଳା ବିଜ୍ଞାନ ଓ ବୈଷୟିକ ମହାବିଦ୍ୟାଳୟରେ ଉତ୍ତୀର୍ଣ୍ଣ ହେଲା ପରେ ନିଜ ଗ୍ରାମରେ ରହି ଏ ଭଳି ମହତ କାର୍ଯ୍ଯରେ ନିଜେ ସଂଶ୍ଲୀଷ୍ଠ ରହି ଆନନ୍ଦନ ଅନୁଭବ କରୁଛି।
ଯମୁନା ର ଆର୍ଥିକ ସ୍ଥିତି ସ୍ୱଚ୍ଛଳ ନାହିଁ ସତ କିନ୍ତୁ ତଥାପି ସେ ହାର ମାନିନି କିପରି ସେ ପାଠ ପଢି ଆଗକୁ ଯିବ ଏହାସହ ସେହି ଅଞ୍ଚଳର ବିକାଶ କରିବ ଏହାହିଁ ଯମୁନା ର ଲକ୍ଷ ବୋଲି ସେ କହିଛି। ଯମୁନା ର ଏପରି ମହାନ କାର୍ଯ୍ୟ ହେତୁ ସେ ଗ୍ରାମବାସୀ ତଥା ସ୍ୱାଭିମାନ ଅଞ୍ଚଳର ପ୍ରଶଂସାର ପାତ୍ର ପାଲଟିଛି। ତେବେ ଯମୁନା ର ଆର୍ଥିକ ପରିସ୍ଥିତି ସୁଦୃଢ଼ ନଥିବା ହେତୁ ସେ ଉଚ୍ଚ ଶିକ୍ଷାରୁ ବଂଚିତ ରହୁଥିବା ଜଣାପଡିଛି ! ଯଦି ରାଜ୍ଯ ସରକାର କିମ୍ବା ସ୍ଥାନୀୟ ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଯମୁନାକୁ ଆର୍ଥିକ ସାହାୟତାର ହାତ ବଢାନ୍ତେ ତା’ ହେଲେ ସେ ଆଗାମୀ ଦିନରେ ପାଠ ପଢିବା ସହ ସ୍ୱାଭିମାନ ଅଞ୍ଚଳର ମଧ୍ୟ ବିକାଶ କରିପାରନ୍ତା ବୋଲି ଗ୍ରାମବାସୀ ମତ ଦେଇଛନ୍ତି!
