ଯୁବ ପ୍ରତିଭା ଅନ୍ୱେଷଣ ନିମନ୍ତେ ଆୟୋଜିତ ହେବ କ୍ରିକେଟ୍ ଓ ଫୁଟବଲ ଖେଳରେ ମୟୂରଭଞ୍ଜ ପ୍ରିମିୟର ଲିଗ୍ ପ୍ରତିଯୋଗୀତା : ଏମପିଏଲର ଲଗୋ ଓ ଜର୍ସି ଉଦ୍ଘାଟିତ

ବାରିପଦା  : ମୟୂରଭଞ୍ଜ ଜିଲ୍ଲାରେ ଯୁବ ପ୍ରତିଭା ଅନ୍ୱେଷଣ ନିମନ୍ତେ ଆୟୋଜିତ ହେବ ମୟୂରଭଞ୍ଜ ପ୍ରିମିୟର ଲିଗ୍ ପ୍ରତିଯୋଗୀତା । ଏହି ପ୍ରତିଯୋଗୀତାରେ ଫୁଟବଲ୍ ଓ କି୍ରକେଟ୍କୁ ଅନ୍ତର୍ଭୁକ୍ତ କରାଯାଇଛି । ଏହି ପରିପ୍ରେକ୍ଷୀରେ ସ୍ୱସ୍ତିକ ମଣ୍ଡପ ଠାରେ ଆୟୋଜିତ ରଙ୍ଗାରଙ୍ଗ ସାଂସ୍କୃତି କାର୍ଯ୍ୟକ୍ରମ ରାଜ୍ୟ ବିଜୁ ଯୁବସଭାପତି ବ୍ୟାମକେଶ ରାୟଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ରାଜସ୍ୱ ଓ ବିପର୍ଯ୍ୟୟ ପ୍ରସମନ ମନ୍ତ୍ରୀ ସୁଦାମ ମାରାଣ୍ଡି, କ୍ରୀଡା ଓ ଯୁବସେବା ବ୍ୟାପାର ମନ୍ତ୍ରୀ ତୁଷାରକାନ୍ତ ବେହେରା, ରାଜ୍ୟ ବିଜୁ ଯୁବ ଉପଦେଷ୍ଟା ବିଧାୟକ ପ୍ରଣବ ବଳବନ୍ତ ରାୟ, ମୟୂରଭଞ୍ଜ ବିଜୁ ଯୁବସଭାପତି ଅରୁଣ ବରାଡ ଓ ଅଭିଶେକ୍ ପଟ୍ଟନାୟକ, ମୟୂରଭଞ୍ଜ ଛାତ୍ର ସଭାପତି ସୁନିଲ ନାୟକ ଓ ଅନିସ ମାନ୍ନା ପ୍ରମୁଖ ଯୋଗଦେଇ ଏମପିଏଲର ଲଗୋ, ଜର୍ସି, ଭିଡିଓ ଓ ସଙ୍ଗୀତକୁ ଉଦ୍ଘାଟନ କରିଥିଲେ ।

ଏଠାରେ ସୂଚନାଯୋଗ୍ୟ ଯେ, ଜିଲ୍ଲା ଯୁବପ୍ରତିଭାଙ୍କୁ ବିକଶିତ କରିବା ତଥା ଲୋକଲୋଚନକୁ ଆଣିବା ପାଇଁ ମୁଖ୍ୟମନ୍ତ୍ରୀଙ୍କ ନିଦେ୍ର୍ଦଶକ୍ରମେ ବିଜୁ ଜନତାଦଳ ପକ୍ଷରୁ ଏହି ଯୁବପ୍ରତିଭା ଅନ୍ୱେଷଣ କାର୍ଯ୍ୟକ୍ରମ ହାତକୁ ନିଆଯାଇଛି । ଓଡିଶାର ବରେଣ୍ୟ ଜନନାୟକ ତଥା ପ୍ରବାଦ ପୁରୁଷ ସ୍ୱର୍ଗତ ବିଜୁ ପଟ୍ଟନାୟକଙ୍କ ସ୍ମୃତିରେ ମୟୂରଭଞ୍ଜ ଜିଲ୍ଲା ବିଜୁ ଯୁବଛାତ୍ର ଜନତାଦଳ ପକ୍ଷରୁ ସମଗ୍ର ଜିଲ୍ଲାରୁ ଦକ୍ଷକ୍ରିଡା ପ୍ରତିଭାଗୁଡିକ ଜନମାନସରେ ପରିଚୟ ସୃଷ୍ଟି କରି ସେମାନଙ୍କ ଜୀବନକୁ ଏକ ନୂତନ ରୂପରେଖା ପ୍ରଦାନ ନିମନ୍ତେ ମୟୂରଭଞ୍ଜ ପ୍ରିମିୟର ଲିଗ୍ ଆୟୋଜନ କରାଯିବ । ଏହି ପ୍ରତିଯୋଗୀତାରେ ଚଳିତ ମାସ ୩୦ତାରିଖରୁ ଫେବୃଆରୀ ୬ତାରିଖ ଯାଏଁ ପ୍ରତି ବ୍ଲକରେ ଆୟୋଜିତ ହେବ । ଫେବୃଆରୀ ୮ତାରିଖରୁ ମାର୍ଚ୍ଚ ୧ତାରିଖ ଯାଏଁ ବ୍ଲକସ୍ତରରୁ ଚୟନ ହୋଇଥିବା ଦଳକୁ ନେଇ ବାରିପଦା ଷ୍ଟାଡିୟମରେ ଜିଲ୍ଲାସ୍ତରୀୟ ପ୍ରତିଯୋଗୀତା ହେବ ।

ମାର୍ଚ୍ଚ ୨ ଓ ୩ ତାରିଖ ଦିନ ରାଇରଙ୍ଗପୁର ଷ୍ଟାଡିୟମ ଠାରେ ଫୁଟବଲ ସେମିଫାଇନାଲ ଓ ଫାଇନାଲ୍ ଖେଳ ଏବଂ ମାର୍ଚ୍ଚ ୫ ଓ ୬ତାରିଖରେ କ୍ରିକେଟ୍ ସେମିଫାଇନାଲ ଓ ଫାଇନାଲ ଖେଳ ବାରିପଦା ଷ୍ଟାଡିୟମ ଠାରେ ଅନୁଷ୍ଠିତ ହେବାର ସ୍ଥିର ହୋଇଛି । ଜିଲ୍ଲାର ୨୬ଗୋଟି ବ୍ଲକରୁ ୮ଟି ଲେଖାଏଁ ଫୁଟବଲ ଓ କି୍ରକେଟ୍ ଟିମ୍ ଅଂଶଗ୍ରହଣ କରିବେ । ଏତତ୍ବ୍ୟତୀତ ଜିଲ୍ଲାର ଦୁଇଟି ଏନଏସି ଓ ଦୁଇଟି ମୁ୍ୟନିସିପାଲଟି ଅଞ୍ଚଳର ଯଥାକ୍ରମେ ୨ଟି ଲେଖାଏଁ ଓ ୪ଟି ଲେଖାଏଁ ଦଳ ଅଂଶଗ୍ରହଣ କରିବେ ।

ଜିଲ୍ଲାସ୍ତରରେ କ୍ରିକେଟ୍ ପାଇଁ ମ୍ୟାନ୍ ଅଫ୍ ଦି ମ୍ୟାଚ ଟ୍ରଫି, ଶ୍ରେଷ୍ଠ ବଲର, ବ୍ୟାଟ୍ସମ୍ୟାନ୍ ଓ ଫିଲ୍ଡରଙ୍କୁ ୫ହଜାରଟଙ୍କା ଓ ମ୍ୟାନ୍ ଅଫ୍ ଦି ସିରିଜ୍କୁ ହିରୋ ସିବିଜେଡ ଏକ୍ସଟ୍ରିମ୍ ୧୬୦ ଆର ବାଇକ୍ ଦିଆଯିବ । ଚମ୍ପିୟାନ ଦଳକୁ ନଗଦ୍ ଏକଲକ୍ଷ ଓ ରନର୍ସଅପ ଦଳକୁ ନଗଦ ୫୦ହଜାରଟଙ୍କା ପ୍ରଦାନ କରାଯିବ । ସେହିପରି ଫୁଟବଲ ଖେଳ ନିମନ୍ତେ ଜିଲ୍ଲାସ୍ତରୀୟ ମ୍ୟାନ୍ ଅଫ୍ ଦି ମ୍ୟାଚ୍, ଶ୍ରେଷ୍ଠ ଷ୍ଟ୍ରାଇକର ଓ ଗୋଲକିପରଙ୍କୁ ୫ହଜାରଟଙ୍କା ଲେଖାଏଁ ଓ ମ୍ୟାନ୍ ଅଫ୍ ଦି ସିରିଜ୍କୁ ହିରୋ ସିବିଜେଡ ଏକ୍ସଟି୍ରମ୍ ୧୬୦ ଆର ବାଇକ୍ ଦିଆଯିବା ସହ ଚମ୍ପିୟାନ ଦଳକୁ ନଗଦ୍ ଏକଲକ୍ଷ ଓ ରନର୍ସଅପ ଦଳକୁ ନଗଦ୍ ୫୦ହଜାରଟଙ୍କା ପ୍ରଦାନ କରାଯିବ । ବିଜୁ ଜନତାଦଳର ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ତତ୍ତ୍ୱାବଧାନରେ ସମସ୍ତ କାର୍ଯ୍ୟକ୍ରମ ଆୟୋଜିତ ହେବ ।