ଭଞ୍ଜନଗର – ପ୍ରଶାସନର ଅଣଦେଖାରୁ ଏବେ ଜଣେ କରୋନା ଆକ୍ରାନ୍ତ ମୃତ ବନ କର୍ମଚାରୀ ପାଲଟି ପାରନ୍ତି ସୁପର ସ୍ପ୍ରେଡର । ଏଥିରେ ମୃତକ କିମ୍ବା ତାଙ୍କ ପରିବାରକୁ କେହି ଦୋଷ ଦେଇପାରିବେ ନାହିଁ । କାରଣ ମୃତ ବନ କର୍ମଚାରୀ ଜଣକ ପୂର୍ବରୁ ନିଜର ଅସୁସ୍ଥତା କାରଣରୁ ଚଳିତମାସ ୧୨ ତାରିଖରେ ଭଞ୍ଜନଗର ସ୍ୱାବ ସଂଗ୍ରହ କେନ୍ଦ୍ରରେ ଯାଇ ସ୍ୱାବ୍ ଟେଷ୍ଟ କରାଇଥିଲେ । ରିପୋର୍ଟ ପଜିଟିଭ୍ ଆସିଲେ ତୁରନ୍ତ ସୂଚନା ମିଳିଯିବବୋଲି ସେତେବେଳେ କୁହାଯାଇଥିଲା । ହେଲେ ସେ ୨ ଦିନ ଅପେକ୍ଷା କରିବାପରେ ମଧ୍ୟ ତାଙ୍କ ନିକଟକୁ ଏସମ୍ପର୍କରେ କିଛି ଫୋନ ନଆସିିବାରୁ ସେ କରୋନା ଆକ୍ରାନ୍ତ ନଥିବା ନିଜେ ସ୍ପଷ୍ଟ କରିଥିଲେ । ଆଉ ତାଙ୍କର ଶରୀର ଅଧିକ ଅସୁସ୍ଥତା କାରଣରୁ ଭଞ୍ଜନଗର ମେଡିକାଲରେ ଜଏନ୍ ହୋଇଥିଲେ । ସେଠାରେ ଡାକ୍ତର ତାଙ୍କର ସ୍ୱାସ୍ଥ୍ୟ ପରୀକ୍ଷା କରିବା ସହ ହୃଦୟ ରୋଗରେ ପୀଡିତ ଥିବାରୁ ତାଙ୍କୁ ଏଠାରୁ ତୁରନ୍ତ ବ୍ରହ୍ମପୁର ମେଡିକାଲ କଲେଜ ହସ୍ପିଟାଲକୁ ନେବାକୁ କହିଥିଲେ ।
ଏଠାରୁ ୧୦୮ ଅମ୍ବୁଲାନ୍ସରେ ରୋଗୀଙ୍କୁ ବ୍ରହ୍ମପୁର ସ୍ଥାନାନ୍ତର କରାଯାଇଥିଲା । ଏମକେସିଜିରେ ତୁରନ୍ତ ତାଙ୍କୁ ଆଇସିୟୁରେ ଭର୍ତ୍ତି କରାଯାଇ ଚିକିତ୍ସା ଆରମ୍ଭ କରାଯାଇଥିଲା । ତେବେ ସେଠାରେ ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ରାତି ପାଖାପାଖି ୩ଟାରେ ତାଙ୍କର ମୃତ୍ୟୁ ଘଟିଥିଲା । ପରେ ମେଡିକାଲରୁ ମୃତକଙ୍କ ପରିବାରଙ୍କୁ ଡିସଚାର୍ଯ୍ୟ ରିପୋର୍ଟ ଦେବାପରେ ଶବବାହାକ ଗାଡିରେ ଶବକୁ ବୁଧବାର ସକାଳେ ଭଞ୍ଜନଗର ଅଣାଯାଇଥିଲା । ମୃତ କର୍ମ·ରୀ ସ୍ଥାନୀୟ ଉତ୍ତର ବନଖଣ୍ଡର ଜଣେ ଡ୍ରାଇଭର ଭାବେ କାର୍ଯ୍ୟ କରୁଥିବାରୁ ତାଙ୍କ ମୃତ୍ୟୁରେ ବନ ବିଭାଗର ବହୁ ପଦସ୍ଥ ଅଧିକାରୀଙ୍କ ସମେତ ୫୦ରୁ ଉର୍ଦ୍ଧ କର୍ମଚାରୀ ତାଙ୍କର ଅନ୍ତିମ ଦର୍ଶନ କରିଥିଲେ ।
କିଛି ଅବସରପ୍ରାପ୍ତ ଅଧିକାରୀ ମଧ୍ୟ ଶେଷଦର୍ଶନ କରିବାସହ ଶ୍ମଶାନକୁ ବି ସାଙ୍ଗରେ ଯାଇଥିଲେ । ସେହିପରି କୋଭିଡ କଟକଣା ନଥିବାରୁ ପରିବାର ଓ ଜ୍ଞାତିକୁଟୁମ୍ବ ସଭିଏଁ ଶବ ସକ୍ରାର ବେଳେ ଉପସ୍ଥିତ ରହିଥିଲେ । ଆଉ ବୁଧବାର ସକାଳ ୧୨ଟା ସୁଦ୍ଧା ଶବ ସକ୍ରାର କାର୍ଯ୍ୟ ଶେଷ ହୋଇଥିଲା । ଆଉ ଏହାପରେ ମୃତ ବନ କର୍ମଚାରୀ ଜଣକ କରୋନାରେ ମୃତ୍ୟୁବରଣ କରିଥିବା ନେଇ ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଥିଲା । ସ୍ଥାନୀୟ ତହସିଲଦାର ଆଲୋକ କୁମାର ପ୍ରଧାନ ମୃତକଙ୍କ ଘରକୁ ଆସି ସେ କରୋନାରେ ମୃତ୍ୟୁବରଣ କରିଥିବା ସରକାରୀ ରିପୋର୍ଟ ଆସିଥିବା କହିବାପରେ ଏବେ ସମସ୍ତଙ୍କ ମନରେ ଟେନସନ୍ ବଢିଛି । ଶବ ସକ୍ରାରରେ ଅଂଶଗ୍ରହଣ କରିଥିବା ସାହିଭାଇଙ୍କ ଠାରୁ ଆରମ୍ଭ କରି ବନ ବିଭାଗର କର୍ମଚାରୀଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି । କାଳେ ମୃତକ ବନି ପାରନ୍ତି କି ସୁପର ସ୍ପ୍ରେଡର୍ । ଏଭଳି ଅନେକ ଦୁଶ୍ଚିନ୍ତା ଏବେ ଏହି ଲୋକଙ୍କ ମନକୁ ଆନେ୍ଦାଳିତ କରୁଛି । ଅନେକ ନିଜେ ନିଜେ ଆଇସୋଲେସନ୍ରେ ରହିଛନ୍ତି ।
ତେବେ ଏଠାରେ ପ୍ରଶ୍ନ ଉଠୁଛି ଗୋଟିଏ ଦିନରେ କରୋନା ପଜିଟିଭ୍ ରିପୋର୍ଟ ଜଣାପଡିବା କଥା । ଜିଲ୍ଲା ପ୍ରଶାସନ ପକ୍ଷରୁ ମଧ୍ୟ ଏଭଳି ଦୈନିକ ରିପୋର୍ଟ ପ୍ରକାଶ ପାଉଛି । ତେବେ ଜୁଲାଇ ୧୨ ତାରିଖରେ ଭଞ୍ଜନଗର ସ୍ୱାବ ସଂଗ୍ରହ କେନ୍ଦ୍ରର ରିପୋର୍ଟ ୧୨ ତାରିଖ ରାତିରେ କିମ୍ବା ୧୩ ତାରିଖ ସକାଳୁ ପହଞ୍ଚିବା କଥା । କିନ୍ତୁ ଏଠାରେ ଏହାର ବ୍ୟତିକ୍ରମ ହୋଇଛି । ୧୩ ତାରିଖରେ ରିପୋର୍ଟ ଆସିବାସହ ୨୧ ତାରିଖ ଯାଏଁ ପ୍ରତିଦିନର ରିପୋର୍ଟ ଅପଡେଟ୍ ହୋଇ ଆସିଥିବାବେଳେ କିଭଳି ୧୨ ତାରିଖର ରିପୋର୍ଟ ୨୨ ତାରିଖରେ ପହଞ୍ଚିଲା ତାକୁ ନେଇ ସାଧାରଣ ଲୋକଙ୍କ ମନରେ ଅଜସ୍ର ପ୍ରଶ୍ନ ଉଠିଛି । ଏଥିପାଇଁ କିଏ ଦାୟୀ ? ଜଣକ ମୃତ୍ୟୁ ଏଠାରେ ଯେତିକି ଗୁରୁତ୍ୱପୂର୍ଣ୍ଣ ନୁହଁ ତାଠାରୁ ଅଧିକ ଗୁରୁତ୍ୱପୂର୍ଣ୍ଣ ହେଲା ତାଙ୍କ ସହ ଶ୍ମଶାନକୁ ଯାଇଥିବା ଜ୍ଞାତିକୁଟୁମ୍ବଙ୍କୁ ନେଇ । କାରଣ କରୋନାରେ ବନ କର୍ମଚାରୀଙ୍କ ମୃତ୍ୟୁକୁ ନେଇ ପୂର୍ବରୁ ଯଦି ପ୍ରଶାସନ ସ୍ପଷ୍ଟ କରିଥାନ୍ତା ତେବେ ଶବ ବ୍ରହ୍ମପୁରରୁ ଏଠାକୁ ଆସିନଥାନ୍ତା ।
ଏକଥା ସତଯେ ଯଦି ରିପୋର୍ଟ ସମ୍ପର୍କରେ ପରିବାର ଲୋକଙ୍କୁ ପୂର୍ବରୁ ସୂଚନା ଦିଆଯାଇଥାନ୍ତା ତେବେ ଜ୍ଞାତିକୁଟୁମ୍ବ କିମ୍ବା ବିଭାଗର ଅନ୍ୟ କର୍ମଚାରୀ କେହି ଶବ ନିକଟକୁ ଆସିନଥାନ୍ତେ । ଯେହେତୁ ୧୨ ତାରିଖରୁ ତାଙ୍କର ସ୍ୱାବ ସଂଗ୍ରହ କରାଯାଇଛି ଓ ତାଙ୍କ ନିକଟକୁ କୌଣସି ସୂଚନା ଆସିନାହିଁ ତେଣୁ ସେ କରୋନା ଆକ୍ରାନ୍ତ ବୋଲି କହିବି ସନେ୍ଦହ କରିନଥିଲେ । ଆଉ ମୃତ୍ୟୁପରେ ତାଙ୍କ ଶବଧାର ସହ ଶ୍ମଶାନ ଯାଏଁ ଯାଇଥିଲେ । ଏବେ ଯଦି ମୃତକ ଜଣକ ସୁପର ସ୍ପ୍ରେଡର ପାଲଟନ୍ତି ତେବେ ଏଥିପାଇଁ କିଏ ଦାୟୀ ଓ ଦୋଷ କାହାର ବୋଲି ଅଧିକାଂଶ ବନ କର୍ମଚାରୀ ନିଜ ନାମକୁ ଗୋପନ ରଖିବା ସର୍ତ୍ତରେ ପ୍ରଶ୍ନ ଉଠାଇଛନ୍ତି । ବାସ୍ତବରେ କରୋନାକୁ ନେଇ ଏବେ ସଭିଏଁ ଚିନ୍ତିତ ଥିବାବେଳେ ରିପୋର୍ଟ ପ୍ରକାଶରେ ୧୦ ଦିନ ବିଳମ୍ବକୁ ନେଇ ସାଧାରଣରେ ଭୃକୁଞ୍ଚନ ସୃଷ୍ଟି ହେବା ସ୍ୱଭାବିକ ।
