ବୁଗୁଡା : ତା ୦୭/୦୩/୨୨ : ବୁଗୁଡ଼ା ବ୍ଲକ ଅନ୍ତର୍ଗତ କରଚୁଲି ଅଙ୍ଗନୱାଡି କେନ୍ଦ୍ର-୨ର ସହାୟିକାଙ୍କୁ ନିୟମିତ କାର୍ଯ୍ଯ କରିବାକୁ ଅନୁମତି ଦେବାକୁ ଆଜି ଅଲ୍ ଓଡିଶା ଅଙ୍ଗନୱାଡି ଲେଡିଜ୍ ଓ୍ବାର୍କ୍ସ ଆସୋସିଏସନ ବୁଗୁଡ଼ା ଶାଖା ପକ୍ଷରୁ ଲିଖିତ ଆକାରରେ ସ୍ଥାନୀୟ ସିଡିପିଓଙ୍କ ନିକଟରେ ଦାବି କରାଯାଇଛି । ପ୍ରକାଶ ଯେ , କରଚୁଲି ଅଙ୍ଗନୱାଡି କେନ୍ଦ୍ର-୨ର ସହାୟିକା ଲକ୍ଷ୍ମୀ ବେହେରାଙ୍କ ବିଦ୍ୟାଳୟ ପ୍ରମାଣ ପତ୍ର ଅନୁସାରେ ୬୨ ବର୍ଷ ପୂରଣ ହୋଇନାହିଁ ।
ପ୍ରମାଣ ପତ୍ର ଅନୁଯାୟୀ ସଂପୃକ୍ତା ସହାୟିକାଙ୍କ ଅବସର ସମୟ ହୋଇନଥିଲେ ମଧ୍ୟ ତାଙ୍କୁ ସିଡିପିଓଙ୍କ କାର୍ଯାଳୟ ପକ୍ଷରୁ ୧୫-୦୩-୨୦୨୨ରୁ ଅବସର ନେବା ପାଇଁ ପତ୍ର ପ୍ରଦାନ କରାଯାଇଛି । ତେଣୁ କେଉଁ ଆଧାରରେ ତାଙ୍କୁ ଅବସର ଗ୍ରହଣ ପାଇଁ ପତ୍ର ପ୍ରେରଣ କଲେ ତାହାର ପ୍ରମାଣ ପତ୍ର ସଂଘକୁ ପ୍ରଦାନ କରାଯାଉ ନତୁବା ତାଙ୍କୁ ନିୟମିତ କାର୍ଯ୍ଯ କରିବାକୁ ଅନୁମତି ଦିଆଯାଉ ବୋଲି ସିଡିପିଓଙ୍କ ଠାରେ ସଂଘର ସଭାନେତ୍ରୀ ବାସନ୍ତୀ କୁମାରୀ ପ୍ରଧାନ ଓ ସମ୍ପାଦିକା ଅନିତା କୁମାରୀ ମିଶ୍ର ଦାବି କରିଛନ୍ତି । ସଂଘର ଦାବିକୁ ବିଚାରକୁ ନିଆ ନଗଲେ ସଂଘ ତରଫରୁ ଜିଲ୍ଲାପାଳ ଏବଂ ଉପଜିଲ୍ଲାପାଳଙ୍କୁ ଜଣାଇବେ ବୋଲି କହିଛନ୍ତି । ଦାବିପତ୍ରର ଏକକିତା ନକଲ ବୁଗୁଡ଼ା ବିଡ଼ିଓଙ୍କୁ ମଧ୍ୟ ପ୍ରଦାନ କରିଛନ୍ତି । ଏ ସମ୍ପର୍କରେ ସିଡିପିଓ ରଞ୍ଜିତା ତ୍ରିପାଠୀଙ୍କୁ ପଚାରିବାରେ ସେ ସଂଘର ଦାବି ବିଷୟରେ ପ୍ରସାଶନିକ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଇବେ ବୋଲି ପ୍ରକାଶ କରିଥିଲେ ।
