ବେଲଗୁଣ୍ଠା, 02/03,ଗାଙ୍ଗପୁର ଥାନା ଅନ୍ତର୍ଗତ ଷଡ଼ଙ୍ଗୀପଲ୍ଲୀ ଏବଂ କଣ୍ଟେଇପଲ୍ଲୀ ମଝିରେ ଥିବା ସୋମନାଥପଲ୍ଲୀ ଜଂଗଲରେ ଆଜି ସକାଳେ ଏକ ଗଛରେ ଜଣେ ଯୁବକଙ୍କ ମୃତ ଦେହ ଝୁଲୁଥିବା ଦେଖିବାକୁ ମିଳିଥିଲା I ନିକଟରେ ଯୁବକ ଜଣଙ୍କ ମୋଟରସାଇକେଲ୍ ମଧ୍ଯ ଥୁଆ ହୋଇଥିଲା I ଏନେଇ ଗାଙ୍ଗପୁର ଥାନାକୁ ଖବର ଦେବା ପରେ ଥାନା ଅଧିକାରୀ ଦେବ୍ କୁମାର ଗମାଙ୍ଗଙ୍କ ନିର୍ଦ୍ଦେଶରେ ପୋଲିସ୍ ଘଟଣାସ୍ଥଳରେ ପହଞ୍ଚି ତନାଘନା କରିଥିଲେ I
ଆଖପାଖ ଅଞ୍ଚଳରେ ଜମା ହୋଇଥିବା ଲୋକମାନେ କେହି ଯୁବକ ଜଣଙ୍କ ପରିଚୟ ପାଇପାରିନଥିଲେ I ପରେ ଯୁବକ ଜଣଙ୍କ ଗାଡ଼ି ନମ୍ବର୍ କୁ ଟ୍ରାକ୍ କରି ଯୁବକ ଜଣଙ୍କ ଖୋର୍ଦ୍ଧା ଜିଲ୍ଲାର ବାଣପୁର ଗ୍ରାମର ଦେବରାଜ ଘଡ଼େଇ (35) ବୋଲି ଜଣାପଡ଼ିଥିଲା I
ଏନେଇ ଯୁବକ ଜଣଙ୍କ ଘର ଲୋକଙ୍କ ସହ ଯୋଗାଯୋଗ କରିବା ପରେ ଦେବରାଜଙ୍କ ବଡ଼ଭାଇ ବୈକୁଣ୍ଠନାଥ ଘଡ଼େଇ ଘଟଣାସ୍ଥଳରେ ପହଞ୍ଚି ଶବ ଚିହ୍ନଟ କରିଥିଲେ I ଏହାପରେ ପୋଲିସ୍ ଦେବରାଜଙ୍କ ଶବକୁ ବ୍ୟବଚ୍ଛେଦ ପାଇଁ ଭଞ୍ଜନଗର ମେଡିକାଲ୍ କୁ ପଠାଇବା ସହ 05/22 ରେ ଏକ ମାମଲା ରୁଜୁ କରି ଗାଙ୍ଗପୁର ଥାନା ଏସ୍ଆଇ ଉମା ଚରଣ ପ୍ରଧାନ ଘଟଣାର ତଦନ୍ତ କରୁଛନ୍ତି I ଦେବରାଜ ଏବଂ ତାଙ୍କ ସ୍ତ୍ରୀଙ୍କ ସହିତ ମନୋମାଳିନ୍ଯ ହେବା ଯୋଗୁଁ ସେ କିଛି ଦିନ ହେବ ମାନସିକ ଭାରସାମ୍ୟ ହରାଇ ଅବସାଦରେ ରହୁଥିଲେ I ସେ ଏକ ମେଡିସିନ୍ କମ୍ପାନିରେ କାମ କରି ଆସ୍କାରେ ରହୁଥିଲେ I ସେ ପ୍ରତିଦିନ ବ୍ରହ୍ମପୁର ଏବଂ ଭଞ୍ଜନଗର ମଧ୍ୟରେ ବିଭିନ୍ନ ଡ଼ାକ୍ତରଙ୍କୁ ଭେଟି ନିଜ କମ୍ପାନିର ପ୍ରଚାର କରୁଥିଲେ I
