ବୁଗୁଡ଼ା : ତା ୦୯/୦୨/୨୨ : ବୁଗୁଡ଼ା ବ୍ଲକ ଗୌଡ଼ିଆବୋରଦା ପଞ୍ଚାୟତ ଅନ୍ତର୍ଗତ କାନସୁକା ଗ୍ରାମର ଖଦାଳ ସାହିରେ ଗତ ରାତିରେ ଅଗ୍ନିକାଣ୍ଡ ଘଟି ଦୁଇ ବଖରା ଘର ପୋଡ଼ି ଯାଇଥିବା ଜଣାଯାଇଛି । ଘଟଣାରୁ ପ୍ରକାଶ ଯେ , ମଙ୍ଗଳବାର ରାତି ପ୍ରାୟ ସାଢେ ବାରଟା ସମୟରେ ରେବତୀ ନାୟକ ସପରିବାର ସହ ଶୋଇଥିବା ବେଳେ ବିଦ୍ୟୁତ୍ ସର୍ଟ ସର୍କିଟା ଯୋଗୁଁ ଘରେ ନିଆଁ ଘଟିଥିଲା । ନିଆଁ ଝୁଲ ଉପରେ ପଡିବା ପରେ ସେମାନଙ୍କ ନିଦ ଭାଙ୍ଗିଯାଇଥିଲା ଏବଂ ଚାଳଘରଟି ହୁତୁ ହୁତୁ ଜଳୁଥିବା ଦେଖିବାକୁ ପାଇଥିଲେ । ପରିବାର ଲୋକେ ପ୍ରାଣ ବିକଳରେ ଘର ବାହାରକୁ ଚାଲି ଆସିଥିଲେ । ଏହି ଅଗ୍ନିକାଣ୍ଡ ସମ୍ପର୍କେ ଖବର ପାଇ ବୁଗୁଡ଼ା ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଲିଭାଇଥିଲେ । ଅଗ୍ନିକାଣ୍ଡରେ ରେବତୀଙ୍କ ଘରର ଆସବାବପତ୍ର ସାଙ୍ଗକୁ ଚାଉଳ ବସ୍ତା ଗୁଡିକ ପୋଡି ଯାଇଥିବା ଜଣାଯାଇଛି ।
