ନର୍ଲା, (ଦୀପକ ଠାକୁର): ପ୍ରଥମେ ସୁପ୍ରିମ୍ କୋର୍ଟ୍ଙ୍କ ନିର୍ଦ୍ଦେଶ, ତାପରେ କେନ୍ଦ୍ର ସରକାରଙ୍କ ଯୋଜନା, ପୁଣି ରାଜ୍ୟ ସରକାରଙ୍କ ଘୋଷଣା । ଏତେ ପରେ ବି ତୃଣମୂଳ ସ୍ତରରେ ଅପହଂଚ ସରକାରୀ ଯୋଜନା । ଏଭଳି ଚିତ୍ର ଦେଖିବାକୁ ମିଳିଛି କଳାହାଣ୍ଡି ଜିଲ୍ଲାର ନର୍ଲା ବ୍ଲକ୍ରେ । ସୁପ୍ରିମ୍ କୋର୍ଟଙ୍କ ରାୟକୁ ଭିତ୍ତି କରି ମାସେ ତଳେ କରୋନା ମୃତକଙ୍କ ପରିବାରକୁ ୫୦ ହଜାର ଟଙ୍କା ଆର୍ଥକ ସହାୟତା ଦେବାକୁ ରାଜ୍ୟ ସରକାର ଘୋଷଣା କରିଥିଲେ । ଏହି ଅର୍ଥ ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠିରୁ ଯୋଗାଇ ଦିଆଯିବ ବୋଲି କୁହାଯାଇଥିଲା । ତେବେ ପ୍ରଶାସନ ବର୍ତ୍ତମାନ ସୁଦ୍ଧା ଏନେଇ କୌଣସି ତତ୍ପରତା ପ୍ରକାଶ କରିନାହିଁ । ପ୍ରାପ୍ତ ସୂଚନାରୁ ପ୍ରକାଶ ଯେ, ନର୍ଲା ଉଚ୍ଚ ପ୍ରାଥମିକ ବିଦ୍ୟାଳୟର କ୍ରୀଡ଼ା ଶିକ୍ଷକ ପ୍ରଜ୍ଞାନନ୍ଦ ନାଏକ, ଗୁଡ଼ିପଟା ପ୍ରାଥମିକ ବିଦ୍ୟାଳୟର ଶିକ୍ଷକ ବିଜୟ ଭୋଇ, କରଞ୍ଜା ପ୍ରାଥମିକ ବିଦ୍ୟାଳୟର ଶିକ୍ଷକ ପ୍ରେମାନନ୍ଦ ସାହୁ ଓ ଖଇରମାଳ ପ୍ରାଥମିକ ବିଦ୍ୟାଳୟର ଶିକ୍ଷକ ତୁମ୍ବେଶ୍ୱର ମାଝୀ କରୋନା ମହାମାରୀରେ ମୃତ୍ୟୁବରଣ କରିଥିଲେ । ଆଜକୁ ଛଅ ସାତ ମାସ ହେଲା ରୋଜଗାରକ୍ଷମ ବ୍ୟକ୍ତିଙ୍କୁ ହରାଇ ସେମାନଙ୍କ ପରିବାର ଦୁଃଖ କଷ୍ଟରେ କାଳାତିପାତ କରୁଛନ୍ତି । ତେବେ ଏପର୍ଯ୍ୟନ୍ତ ସେମାନଙ୍କ ପରିବାରକୁ କୌଣସି ସରକାରୀ ସହାୟତା ମିଳିନାହିଁ । ଏନେଇ ପ୍ରଶାସନ ଦୃଷ୍ଟି ଦେବା ସହ ତୁରନ୍ତ ପଚାଶ ହଜାର ଟଙ୍କା ଲେଖାଏଁ ଦେବାକୁ ମୃତକ ଶିକ୍ଷକମାନଙ୍କ ପରିବାରବର୍ଗ ଦାବି ଜଣାଇଛନ୍ତି ।
Comments are closed.