ମାସ୍କର ବ୍ୟବହାର ଓ ଶରୀରରେ ଭିଟାମିନ-ଡି : ଆସନ୍ତୁ ଜାଣିବା ସର୍ଜରୀ ବିଶେଷଜ୍ଞ ଡାକ୍ତର ବିରଞ୍ଚି ନାରାୟଣ ମଲ୍ଲିକ କଣ କହୁଛନ୍ତି

ଡାକ୍ତର ବିରଞ୍ଚି ନାରାୟଣ ମଲ୍ଲିକ : ମୁଖମଣ୍ଡଳ ସଂକ୍ରମଣକୁ ରୋକିବା ପାଇଁ ନିକଟରେ ବିଶେଷଜ୍ଞମାନେ ମୁହଁରେ ଦୁଇଟି ମାସ୍କ (ଗୋଟିଏ ସର୍ଜିକାଲ ଓ ଅନ୍ୟଟି ଘରେ ପ୍ରସ୍ତୁତ କପଡ଼ାର) ପରିଧାନ ଉପରେ ଜୋର ଦେଇଛନ୍ତି । ତେବେ ଦୁଇଟି ମାସ୍କ ପିନ୍ଧିବା ଯେତିକି ଗୁରୁତ୍ୱପୂର୍ଣ୍ଣ ନୁହେଁ, ତାହା ଅପେକ୍ଷା ମାସ୍କଟି ମୁହଁରେ ଖାପ ଖାଇ ରହିବା ଅଧିକ ଜରୁରୀ । ସେହିପରି ଯଦି ଜଣେ ଏନ୍୯୫ ବା ତିନିସ୍ତରୀୟ ମାସ୍କ ବ୍ୟବହାର କରୁଛି, ତେବେ ସେହି ଏକକ ମାସ୍କ ବି ଯଥେଷ୍ଟ ହେବ । ତେବେ ସଂପୃକ୍ତ ମାସ୍କଟି ଗାଲରେ ନାକ ଓ ପାଟି ଅଂଶକୁ ନିବୁଜ କରି ଧରି ରଖିବା ଦରକାର । ସେପରି ନହେଲେ ଫାଙ୍କ ବାଟେ ଅଛଣା ବାୟୁ ଶ୍ୱାସକ୍ରିୟା ଶରୀରକୁ ପ୍ରବେଶ କରିବ । ସେହିପରି ତାହା ଭୂତାଣୁ ପ୍ରତିରୋଧୀ ହେବା ସହ ତାହା ଦେଇ ଶ୍ୱାସକ୍ରିୟା ଯେପରି ସୁଗମ ହେଉଥିବ, ସେଥିପ୍ରତି ଧ୍ୟାନ ଦେବା ଆବଶ୍ୟକ । ଦୁଇଟି ମାସ୍କ ପିନ୍ଧିବା ଦ୍ୱାରା ମୁଖମଣ୍ଡଳରେ ବିଶେଷକରି ପାଟି ଓ ନାକକୁ ତାହା ଉତ୍ତମ ଭାବେ ଖାପି କରି ରହି ପାରିବା ସହ ଅଧିକ ସୁରକ୍ଷା ମିଳିପାରିବ । ମାତ୍ର ଏନ୍୯୫ ମାସ୍କ ପରିଧାନ କରୁଥିଲେ ଦ୍ୱିତୀୟ ମାସ୍କର ଆବଶ୍ୟକତା ନାହିଁ ।

ମାସ୍କ ପରିଧାନ ପାଇଁ ପରାମର୍ଶାବଳି :
କ’ଣ କରିବେ ? : ଗୋଟିଏ ଏନ୍୯୫ ବା ତିନିସ୍ତରୀୟ ମାସ୍କ ଅଥବା ଦୁଇଟି ମାସ୍କ ପରିଧାନ କରିବେ । ଗୋଟିଏ ସର୍ଜିକାଲ ମାସ୍କ ଓ ଅନ୍ୟଟି କପଡ଼ା ନିର୍ମିତ ମାସ୍କ ହେବା ଦରକାର । ନିଜର କପଡ଼ା ମାସ୍କକୁ ପ୍ରତ୍ୟହ ଧୋଇବାକୁ ହେବ । ମାସ୍କଟି ଏପରି ପିନ୍ଧିବେ ଯେପରି ନିଜର ନାକ, ପାଟି ଓ ଚିବୁକକୁ ତାହା ଶକ୍ତ କରି ଜାବୁଡ଼ି ଧରିବ ଓ ଅଡ଼ୁଆ ଲାଗୁନଥିବ । ମୁହଁରୁ ମାସ୍କ କାଢ଼ିଲା ପରେ ହାତକୁ ଭଲଭାବରେ ଧୋଇବା ଜରୁରୀ ।
କ’ଣ ନକରିବେ ? : ମାସ୍କକୁ ମୁହଁରୁ ଖୋଲି ବେକ କିମ୍ବା ଚିବୁକରେ ଝୁଲାଇ ଦେବେ ନାହିଁ । ବାରମ୍ବାର ମାସ୍କକୁ ଛୁଇଁବେ ନାହିଁ କି ଆଙ୍ଗୁଠି ଗଳାଇ ନାକପାଟି କୁଣ୍ଡାଇବେ ନାହିଁ । କଥାବାର୍ତ୍ତା ବେଳେ କିମ୍ବା ଛିଙ୍କିଲା ବେଳେ ମାସ୍କକୁ ଆଦୌ ଖୋଲିବେ ନାହିଁ । ନିଜ ମାସ୍କକୁ ପରିବାରର ଅନ୍ୟ କାହା ମାସ୍କ ସହ ଅଦଳବଦଳ କରିବେ ନାହିଁ ।

ଶରୀରରେ ଯଥେଷ୍ଟ ମାତ୍ରାରେ ଭିଟାମିନ୍ ଡି କରୋନା ସଂକ୍ରମଣ ହ୍ରାସ କରିବାରେ ପ୍ରମୁଖ ଭୂମିକା ନେଇଥାଏ । ଏ ସଂକ୍ରାନ୍ତରେ ହାଇଦ୍ରାବାଦସ୍ଥିତ ନିଜାମ ଇନ୍ଷ୍ଟିଚୁ୍ୟଟ ଅଫ୍ ମେଡ଼ିକାଲ ସାଇନ୍ସ ପକ୍ଷରୁ କରାଯାଇଥିବା ଏକ ଅଧ୍ୟୟନରୁ ଜଣାପଡ଼ିଛି । ବିଶେଷକରି ଶ୍ୱାସକ୍ରିୟାଜନିତ ସଂକ୍ରମଣ ରୋକିବାରେ ଭିଟାମିନ୍ ଡି ସହାୟକ ହୋଇଥାଏ ବୋଲି ଙ୍ଗଙ୍ଗଙ୍ଗ.ଦ୍ଭବଗ୍ଧଙ୍କକ୍ସର.ମକ୍ଟଜ୍ଞ ୱେବସାଇଟରେ ରିପୋର୍ଟ ପ୍ରକାଶ ପାଇଛି । ଶରୀରରେ ଭିଟାମିନ ଡି ସ୍ତର ୮୦/୧୦୦ ନାନୋଗ୍ରାମ / ମିଲିଲିଟରକୁ ବୃଦ୍ଧି ପାଇଲେ ଗୁରୁତର ସଂକ୍ରମଣ ଆଶଙ୍କା କମ୍ ରହିଥାଏ ବୋଲି ଏଥିରେ ଦର୍ଶାଯାଇଛି । ସିକନ୍ଦରାବାଦସ୍ଥିତ ଗାନ୍ଧୀ ହସ୍ପିଟାଲର କୋଭିଡ଼ ରୋଗୀଙ୍କ ଉପରେ ଏହି ଅଧ୍ୟୟନ କରାଯାଇଥିଲା । କୋଭିଡ଼ଜନିତ ସଂକ୍ରମଣ ହ୍ରାସ କରିବାରେ ପଲ୍ସ ଡି ଥେରାପିର ପ୍ରଭାବ ଜାଣିବା ଏହି ଅନୁସନ୍ଧାନର ଲକ୍ଷ୍ୟ ରହିଥିଲା । ରିପୋର୍ଟ ପ୍ରସ୍ତୁତକାରୀ ହାଇଦ୍ରାବାଦ ବିବିନଗର ଏମ୍ସ ଅର୍ଥୋପେଡ଼ିକ୍ସ ମୁଖ୍ୟ ଡା.ମହେଶ୍ୱର ଲକ୍କିରେଡ୍ଡିଙ୍କ କହିବା ମୁତାବକ, ଭିଟାମିନ ଡି ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବା ସହ ସଂକ୍ରମିତଙ୍କ ଚିକିତ୍ସାରେ ପ୍ରମୁଖ ଭୂମିକା ନେଇଛି । ସାମାନ୍ୟ ଲକ୍ଷଣ ଥିବା ୧୩୦ ରୋଗୀଙ୍କ ଉପରେ ପଲ୍ସ ଡି ଥେରାପି କରାଯାଇଥିଲା । ସଂକ୍ରମିତଙ୍କୁ ଭିଟାମିନ୍ ଡି(ଭିଡି) ଏବଂ ନନ୍-ଭିଟାମିନ୍-ଡି ଦୁଇଟି ଗ୍ରୁପ୍ କରାଯାଇଥିଲା । ସାଧାରଣ ଚିକିତ୍ସା ସମେତ ଭିଡ଼ି ଗ୍ରୁପ୍କୁ ପଲ୍ସ ଡି ଥେରାପି ଦିଆଯାଇଥିଲା । ଏନ୍ଭିଡ଼ିରେ ଥିବା ରୋଗୀଙ୍କ କେବଳ ସାଧାରଣ ଚିକିତ୍ସା କରାଯାଇଥିଲା । ଭିଡ଼ି ଗ୍ରୁପ୍ରେ ସଂକ୍ରମଣ ମାତ୍ରା କମିଥିବାବେଳେ ଏନ୍ଭିଡ଼ି ଗ୍ରୁପ୍ରେ ତାହା ସେତେମାତ୍ରାରେ ପରିଲକ୍ଷିତ ହୋଇ ନଥିଲା । ମାସ୍କ ବ୍ୟବହାର, ସାମାଜିକ ଦୂରତା ଓ ଡାକ୍ତରୀ ପରାମର୍ଶରେ ଭିଟାମିନ-ଡି ବ୍ୟବହାର ସହିତ ଆବଶ୍ୟକତା ସ୍ୱାସ୍ଥ୍ୟ ବିଭାଗର ସତର୍କତା ମାନିଲେ ଆପଣ କରୋନାରୁ ମୁକ୍ତ ହୋଇପାରିବେ ।

ସର୍ଜରୀ ବିଶେଷଜ୍ଞ, ଫ୍ଲାଟ ନଂ-୪୦୩, କିରଣ ପାରିଜାତକ ଏନ୍କ୍ଲେଭ, କ୍ୟାଣ୍ଟନମେଣ୍ଟ ରୋଡ଼,କଟକ,