ଫୁସଫୁସ ସଂକ୍ରମିତଙ୍କ ପାଇଁ ମୃତ୍ୟୁ ସଞ୍ଜିବନୀ ଏକ୍ମୋ ଚିକିତ୍ସା : ପ୍ରଫେସର ଡାକ୍ତର ଉମେଶ ଚନ୍ଦ୍ର ପାତ୍ର

ପ୍ରଫେସର ଡାକ୍ତର ଉମେଶ ଚନ୍ଦ୍ର ପାତ୍ର(ବିଭାଗୀୟ ମୁଖ୍ୟ, ହେପାଟୋଲୋଜି ବିଭାଗ, ଶ୍ରୀରାମଚନ୍ଦ୍ର ଭଞ୍ଜ ମେଡ଼ିକାଲ କଲେଜ, କଟକ) : ସଂପ୍ରତି ରାଜ୍ୟରେ କୋଭିଡ଼ ସ୍ଥିତି ଅତି ଉଦ୍ବେଗଜନକ ରହିଛି ଓ ପ୍ରତିଦିନ ଫୁସ୍ଫୁସ୍ ଜନିତ ସଂକ୍ରମଣ କାରଣରୁ ଅନେକ ଲୋକଙ୍କର ପ୍ରାଣହାନି ଘଟୁଛି । କଟକସ୍ଥିତ ଶ୍ରୀରାମଚନ୍ଦ୍ର ଭଞ୍ଜ ମେଡ଼ିକାଲ କଲେଜରେ ଏକ୍ମୋ ଚିକିତ୍ସା ସେବା ଖୁବ୍ ଶୀଘ୍ର ଆରମ୍ଭ ହେବାକୁ ଯାଉଛି । ଏଥିପାଇଁ ଛଅଟି ମେସିନ ଆସିବାର ବ୍ୟବସ୍ଥା ରହିଛି । କରୋନା ସଂକ୍ରମିତ ହେବା ପରେ ଶରୀରରେ ଫୁସ୍ଫୁସ୍ ଜନିତ ସମସ୍ୟା ଦେଖାଦିଏ । ଫୁସଫୁସ ସଂକ୍ରମଣ ମାତ୍ରା ଅଧିକ ଥିଲେ ଜଣେ ରୋଗୀ ମୃତ୍ୟୁ ମୁଖରେ ପଡ଼ିପାରେ । ହେଲେ ଏକ୍ମୋ ମେସିନ ଦ୍ୱାରା ଫୁସ୍ଫୁସ୍ ସଂକ୍ରମଣକୁ ହ୍ରାସ କରାଯାଇପାରେ । ଏକ ରିପୋର୍ଟରୁ ଜଣାପଡ଼େ ଯେ, ଦେଶର ମୋଟ ୨୧ଟି ହସ୍ପିଟାଲରେ ଏକ୍ମୋ ୟୁନିଟ କାର୍ଯ୍ୟ କରୁଛି । ତନ୍ମଧ୍ୟରୁ ୧୯ଟି ଘରୋଇ ମେଡ଼ିକାଲରେ ଥିବାବେଳେ ୨ଟି ରହିଛି ସରକାରୀ ମେଡ଼ିକାଲରେ । ଲକ୍ଷ୍ନୋ ଡ.ରାମ ମନୋହର ଲୋହିଆ ଇନ୍ଷ୍ଟିଚୁ୍ୟଟ ଅଫ ମେଡ଼ିକାଲ ସାଇନ୍ସ ଓ ନୂଆଦିଲ୍ଲୀର ଏମ୍ସ ଭଳି ସରକାରୀ ମେଡ଼ିକାଲରେ ଉକ୍ତ ୟୁନିଟ କାର୍ଯ୍ୟକ୍ଷମ ହେଉଛି । ଏହାଛଡ଼ା ଓଡ଼ିଶାର କିମ୍ସ ଓ ସମ୍ ହସ୍ପିଟାଲରେ ମଧ୍ୟ ମିଳିପାରୁଛି ଏହି ଅତ୍ୟାଧୁନିକ ଚିକିତ୍ସା ସେବା ।

ଫୁସ୍ଫୁସ୍ ଟ୍ରାନ୍ସପ୍ଲାଣ୍ଟ କରିବା ପୂର୍ବରୁ ରୋଗୀଙ୍କୁ ଏହି ୟୁନିଟରେ ରଖାଯାଏ । ୩୦ଦିନ ଧରି ଜଣେ ଫୁସଫୁସ ସଂକ୍ରମିତ ୟୁନିଟ୍ରେ ରହିବେ । ଶରୀରରେ ରୋଗ ପ୍ରତିରୋଧକ ଶକ୍ତି ବଢ଼ିବା ସହ ଯଦି ଫୁସଫୁସ ସଂକ୍ରମଣ କମେ, ତାହେଲେ ଟ୍ରାନ୍ସପ୍ଲାଣ୍ଟର ଆବଶ୍ୟକତା ପଡ଼ିବ ନାହିଁ । କରୋନା କାଳରେ ଫୁସ୍ଫୁସ୍ ସଂକ୍ରମଣରେ ଗୁରୁତର ହୋଇଥିବା ରୋଗୀଙ୍କ ପାଇଁ ଏକମୋ ୟୁନିଟ ନିଶ୍ଚିତ ଭାବେ ଏକ ମୃତୁ୍ୟ ସଞ୍ଜୀବନୀ ପାଲଟିବ । ହେଲେ ୩୦ ଦିନରୁ ଅଧିକ ସମୟ ୟୁନିଟରେ ରହିଲେ ଅନ୍ୟ କିଛି ସ୍ୱାସ୍ଥ୍ୟଗତ ସମସ୍ୟା ଦେଖାଦେଇପାରେ । ଜଣେ କରୋନା ଆକ୍ରାନ୍ତଙ୍କ ଫୁସ୍ଫୁସ୍ରେ ସଂକ୍ରମଣର ମାତ୍ରା ଯେତେ ଅଧିକ ଥିଲେ ମଧ୍ୟ ୟୁନିଟ୍ ଦ୍ୱାରା ସେ ସୁସ୍ଥ ହେବାର ସମ୍ଭାବନା ରହିଛି । ୟୁନିଟରେ ରହିବା ସମୟରେ ଫୁସ୍ଫୁସ୍କୁ ଶରୀର ଭିତରୁ କଢ଼ାଯାଏ । ଏହି ସମୟ ଭିତରେ ୨୪ ଘଣ୍ଟା ଧରି ରକ୍ତ ସଞ୍ଚାଳକ ରୋଗୀଙ୍କୁ ଜଗି ରହିବେ । ଫୁସଫୁସ ଅମ୍ଳଜାନ ଯୋଗାଇ ଏହାକୁ ସମ୍ପୂର୍ଣ୍ଣ ସୁସ୍ଥ କରିବାକୁ ଚେଷ୍ଟା କରାଯାଏ ।

ଗୁରୁତର ଅସୁସ୍ଥ ରୋଗୀମାନଙ୍କ ନିକଟରେ ଯେତେବେଳେ ଅମ୍ଳଜାନ ସହାୟତା ବିଫଳ ହୁଏ, ଅମ୍ଳଜାନକୁ ବଜାୟ ରଖିବାରେ ବିଶେଷଜ୍ଞମାନେ ଯାନ୍ତ୍ରିକ ଭେଣ୍ଟିଲେସନ ବ୍ୟବହାର କରିବାକୁ ଚେଷ୍ଟା କରନ୍ତି । ଅର୍ଥାତ୍ ଅତି ଗୁରୁତର ପରିିସ୍ଥିତିରେ, ଡାକ୍ତରମାନେ ଏକ୍ମୋ (ଏକ୍ସଟ୍ରାକୋରୋରାଲ ମେମ୍ବ୍ରନ୍ ଅମ୍ଳଜାନ) ପ୍ରୟୋଗ କରିବାକୁ ବାଛି ପାରନ୍ତି । ଯାହା ଏକ କୃତ୍ରିମ ହୃଦୟ ବା ଆହୁରି ସରଳ ଭାବେ କହିଲେ ଶରୀର ବାହାରେ କୃତ୍ରିମ ଫୁସ୍ଫୁସ୍ ଭାବରେ କାର୍ଯ୍ୟ କରିଥାଏ । ଏହା ରୋଗୀର ରକ୍ତରୁ ଅଙ୍ଗାରକାମ୍ଳ ବାହାର କରିଥାଏ ଏବଂ ଏଥିରେ ଅମ୍ଳଜାନ ଯୋଗ କରିଥାଏ । ଚିକିତ୍ସା ବିଜ୍ଞାନୀଙ୍କ ମତରେ କୋଭିଡ଼-୧୯ ରୋଗୀଙ୍କ ପାଇଁ ଏହା ବିଶେଷ ପ୍ରଭାବ ରଖେ । ଏହା ବ୍ୟକ୍ତିକୁ ଜୀବାଣୁ ମୁକାବିଲା ପାଇଁ ଅତିରିକ୍ତ ସମୟ ଦେଇଥାଏ । ଅତ୍ୟଧିକ ରୋଗରେ ପୀଡ଼ିତ ରୋଗୀଙ୍କ ପାଇଁ ଏହି ଅତିରିକ୍ତ ସମୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।

ଏହାଦ୍ୱାରା ଜଣେ ରୋଗୀକୁ ୩୦ଦିନ ପର୍ଯ୍ୟନ୍ତ ରଖାଯାଇପାରିବ । ଗୋଟିଏ ଧାଡ଼ିରେ କହିଲେ ଯେଉଁ କୋଭିଡ଼-୧୯ ନିମୋନିଆରେ ପୀଡ଼ିତ ଗୁରୁତର ରୋଗୀଙ୍କୁ ରକ୍ତ ଅମ୍ଳଜାନ ସ୍ତର ବଜାୟ ରଖିବା ଲାଗି ଭେଣ୍ଟିଲେସନ ପର୍ଯ୍ୟାପ୍ତ ହେଉନାହିଁ, ସେମାନଙ୍କୁ ବର୍ତ୍ତମାନ ଏହି ଚିକିତ୍ସା ଅନେକ ସାହାଯ୍ୟ କରିପାରିବ ବା ଅନେକଙ୍କ ଜୀବନ ରକ୍ଷା ହୋଇପାରିବ ।

ଜାତୀୟସ୍ତରରେ ଅନେକ ବିଶେଷଜ୍ଞଙ୍କ ମତ ହେଉଛି ଠିକ୍ ସମୟରେ ଯଦି ଏକ୍ମୋ ଯନ୍ତ୍ର ବ୍ୟବହାର କରାଯାଏ ତେବେ ୫୫ ପ୍ରତିଶତ ରୋଗୀ ବଞ୍ଚôଯିବେ । ହେଲେ ସେମାନଙ୍କର ଅନ୍ୟ କୌଣସି ବିଶେଷ ସମସ୍ୟା ଯେମିତିକି ସେମାନେ ଅତ୍ୟନ୍ତ ବୟସ୍କ ହୋଇନଥିବେ କିମ୍ବା ଦୀର୍ଘସ୍ଥାୟୀ ରୋଗ ନଥିବ । ଏତେ ଗୁରୁତର ସେବା ଯୋଗାଉଥିବା ଏଭଳି ଏକ ଉପଯୋଗୀ ଯନ୍ତ୍ର ଓଡ଼ିଶା କାହିଁକି କରିପାରିବନାହିଁ? ଏଠାରେ ସୂଚାଇ ଦିଆଯାଇପାରେ କି ଯେ ସାରା ଭାରତରେ ମାତ୍ର ୨୧ଟି ସ୍ଥାନରେ ସରକାରୀ ଭାବେ ଏହି ଯନ୍ତ୍ର ଉପଲବ୍ଧ ଅଛି । ଏହା ହିଁ ସୂଚାଉଛି, ଏହି ଚିକିତ୍ସାରେ କେତେ ଜଟିଳତା ରହିଛି । ଏକଥା ସତ ଯେ ଏକ୍ମୋ ମେସିନ ଏବଂ ଫୁସଫୁସ ପ୍ରତିରୋପଣ ବ୍ୟବସ୍ଥା ଉଭୟ କୋଭିଡ଼-୧୯ କ୍ଷେତ୍ରରେ ସଂଜୀବନୀ ହେବ, କିନ୍ତୁ ଏହା କାର୍ଯ୍ୟକାରୀ କରିବା ସେତେ ସହଜ ନୁହେଁ, ଯେମିତି କୁହାଯାଉଛି ।

ଏକ୍ମୋ ଯନ୍ତ୍ର ଆଣିବା ପାଇଁ ହେଲେ ଅତିକମ୍ରେ ଆଉ ଚାରିଜଣ ରକ୍ତସଞ୍ଚାଳକ ଏବଂ ଅଧିକ ହୃଦ୍ବକ୍ଷଶଲ୍ୟଙ୍କର ଆବଶ୍ୟକତା ରହିଛି । ଏଠାରେ ଉଲ୍ଲେଖଥାଉକି, କେବଳ ଟିକା, ଅମ୍ଳଜାନ, ଆଇସିୟୁ ବା ଭେଣ୍ଟିଲେଟର ନୁହେଁ, ଫୁସଫୁସ ପ୍ରତିରୋପଣ ଏବଂ ଏକ୍ମୋ ଯନ୍ତ୍ର ଅଥବା କୃତ୍ରିମ ଫୁସ୍ଫୁସ୍ ବ୍ୟବସ୍ଥା କୋଭିଡ଼ କ୍ଷେତ୍ରରେ ବଡ଼ ଉପାଦେୟ ହେବ । କରୋନା ଜନିତ ମୃତୁ୍ୟକୁ ହ୍ରାସ କରିବା ପାଇଁ ରାଜ୍ୟ ସରକାର ଅନେକ ଦୃଷ୍ଟାନ୍ତମୂଳକ କାର୍ଯ୍ୟକ୍ରମ ହାତକୁ ନେଉଛନ୍ତି । କଟକ ବଡ଼ମେଡ଼ିକାଲରେ ଖୋଲିବାକୁ ଯାଉଥିବା ଏକ୍ସଟ୍ରାକର୍ପୋରିଏଲ ମେମ୍ବ୍ରେନ ଅକ୍ସିଜିନେସନ୍ ତଥା ଏକ୍ମୋ ୟୁନିଟ ନିଶ୍ଚିନ୍ତ ଭାବେ ରାଜ୍ୟ ସ୍ୱାସ୍ଥ୍ୟସେବା ବ୍ୟବସ୍ଥା ପାଇଁ ଏକ କ୍ରାନ୍ତିକାରୀ ଅଧ୍ୟାୟ ଓ ଫୁସ୍ଫୁସ୍ ସଂକ୍ରମିତଙ୍କୁ ଏହା ନିଶ୍ଚିନ୍ତ ମୃତୁ୍ୟମୁଖରୁ ବଞ୍ଚାଇବା ପାଇଁ ସହାୟକ ହେବ ।