Odisha news

ଜଣେ ୧୯ ବର୍ଷିୟ ତରୁଣର କରୁଣା କାହାଣୀ : ସେନାରେ ଭର୍ତି ହେବାପାଇଁ ରାତି ଅଧରେ ନଇଡ଼ାର ଗୋଟାଏ ରାସ୍ତାରେ ଦୌଡ଼ି ଦୌଡ଼ି ଘରକୁ ଫେରୁଥିବା ଦୃଶ୍ୟ ଭିଡିଓ ଭାଇରାଲ୍‌ ହେବାରେ ଲାଗିଛି

0

ନଇଡ଼ା: ସ୍ବଇଚ୍ଛାରେ ଜଣେ ୧୯ ବର୍ଷିୟ ତରୁଣ ରାତି ଅଧରେ ନଇଡ଼ାର ଗୋଟାଏ ରାସ୍ତାରେ ଦୌଡ଼ି ଦୌଡ଼ି ଘରକୁ ଫେରୁଥିବା ଦୃଶ୍ୟ ସମ୍ବଳିତ ଭିଡିଓ ରବିବାର ସନ୍ଧ୍ୟାରେ ସାମାଜିକ ଗଣମାଧ୍ୟମରେ ପୋଷ୍ଟ୍‌ ହେବାର କେଇ ମୁହୂର୍ତ୍ତ ମଧ୍ୟରେ ଭାଇରାଲ୍‌ ହୋଇଛି।

ଦୌଡ଼ି ଦୌଡ଼ି ନୟାନ୍ତ ହେବା ସହ ଝାଳନାଳ ହୋଇଯାଇଥିବା ଉକ୍ତ ଯୁବକଙ୍କୁ ଗାଡ଼ିରେ ନେଇ ଘରେ ଛାଡ଼ି ଆସିବାକୁ ଚଳଚ୍ଚିତ୍ର ନିର୍ମାତା ତଥା ଲେଖକ ବିନୋଦ କାପ୍ରିଙ୍କ ବାରମ୍ବାର କରିଥିବା ଅନୁରୋଧକୁ ପ୍ରଦୀପ ମେହରା ନାମକ ସେ ତରୁଣ ସବିନୟ ଟାଳି ଦେଇଥିଲେ।

‘ମ୍ୟାକ୍‌ ଡୋନାଲଡ୍‌’ରେ କାମ କରୁଥିବା ଉକ୍ତ ତରୁଣ ‘ସଫ୍ଟ୍‌’ ଶେଷ କରି ଅଧରାତିରେ ଦୌଡ଼ି ଦୌଡ଼ି ଘରକୁ ଯାଉଥିବା ଦୃଶ୍ୟର ଭିଡିଓ କାର୍‌ ଭିତରୁ ଥାଇ ସୁଟିଙ୍ଗ୍‌ କରିଥିଲେ ବିନୋଦ କାପ୍ରି। କାପ୍ରିଙ୍କ ‘ଲିଫ୍ଟ୍‌ ଅଫର୍‌’କୁ ଅଗ୍ରାହ୍ୟ କରିବାର କାରଣ ଦର୍ଶାଇ ତରୁଣ ପ୍ରଦୀପ କହିଥିଲେ, ଦୌଡ଼ାଦୌଡ଼ି କରିବାକୁ ସମୟ ପାଉ ନ ଥିବାରୁ ସେ ଦୌଡ଼ି ଦୌଡ଼ି ଘରକୁ ଯିବାକୁ ଉଚିତ ମଣୁଛନ୍ତି।

ଦୌଡ଼ କିଛି କଥା ନାହିଁ, କିନ୍ତୁ ଏତେ ରାତିରେ କାହିଁକି ଦୌଡୁଛ ବୋଲି ପଚାରନ୍ତେ ସେ କହିଲେ, ସେନାବାହିନୀରେ ଯୋଗ ଦେବା ଲାଗି ଦୌଡ଼ ଅଭ୍ୟାସ କରୁଛି। ସକାଳେ ଦୌଡ଼ିବାକୁ କହି କାପ୍ରି ତାଙ୍କୁ ଗାଡ଼ିରେ ବସି ଘରକୁ ଯିବାକୁ ପୁଣି କହିବାରୁ ସେ କହିଲେ ଯେ, ସେତେବେଳେ ଦୌଡ଼ ଅଭ୍ୟାସ କରିବାକୁ ତାଙ୍କର ସମୟ ନାହିଁ। କାରଣ, ସେ ଉଠୁ ଉଠୁ ସବୁଦିନ ସକାଳ ୮ଟା ବାଜେ। ପୁଣି କାମକୁ ବାହାରିଯିବା ପୂର୍ବରୁ ତାଙ୍କୁ ରନ୍ଧାବଢ଼ା ଶେଷ କରିବାକୁ ପଡ଼େ।

ସୂଚନାଯୋଗ୍ୟ, ଉତ୍ତରାଖଣ୍ଡର ମୂଳ ବାସିନ୍ଦା ପ୍ରଦୀପ ମେହରା ବରୋଲାରେ ତାଙ୍କ ଭାଇଙ୍କ ସହ ରହନ୍ତି। ପ୍ରତିଦିନ ଆପଣା କର୍ମସ୍ଥଳୀ ନଇଡ଼ାର ସେକ୍ଟର୍‌ ୧୬ରୁ ଦୌଡ଼ି ଦୌଡ଼ି ଘରକୁ ଫେରନ୍ତି।

ବାପାମାଆଙ୍କ କଥା ପଚରାଯିବାରୁ କାପ୍ରିଙ୍କୁ ତରୁଣ ପ୍ରଦୀପ କହିଲେ ଯେ, ତାଙ୍କ ଅସୁସ୍ଥ ମାଆ ଡାକ୍ତରଖାନାରେ ପଡ଼ିଛନ୍ତି। ପ୍ରଦୀପଙ୍କ ସହ ତାଳ ମିଳାଇ ଗାଡ଼ିରେ ଯାଉଥିବା କାପ୍ରି ତାଙ୍କୁ କହିଲେ ଯେ, ସେ ଉତ୍ତୋଳନ କରୁଥିବା ଏହି ଭିଡିଓଟି ଭାଇରାଲ୍‌‌ ହେବ।

ପ୍ରତ୍ୟୁତ୍ତରରେ ହସି ପକାଇ ପ୍ରଦୀପ କହିଲେ, ମତେ କିଏ ଚିହ୍ନିବ? ହଉ, ଭାଇରାଲ୍‌ ହେଲେ , ହବ, ମୁଁ ତ କିଛି ମନ୍ଦ କାମ କରୁନି।

ଘରେ ପହଞ୍ଚିବା ପରେ ରୋଷେଇବାସ କରିବେ ଜାଣିବା ପରେ କାପ୍ରି ପ୍ରଦୀପଙ୍କୁ ‌ତାଙ୍କ ରାତ୍ର ଭୋଜନ କରିବାକୁ କହିଲେ। କିନ୍ତୁ, ତାଙ୍କୁ ଆମନ୍ତ୍ରଣ ରକ୍ଷା ନ କରି ପ୍ରଦୀପ କହିଲେ, ସେମିତି ହେଲେ ମୋ ବଡ଼ଭାଇ ଉପାସ ରହିବେ। କାରଣ, ଠାଏ ‘ନାଇଟ୍‌ ସିଫ୍ଟ୍‌’ରେ କାମ କରୁଥିବାରୁ ରୋଷେଇବାସ କରିବାକୁ ଭାଇଙ୍କ ପାଖରେ ମୁହୂର୍ତ୍ତେ ସମୟ ନାହିଁ।

ଶେଷକୁ ଘରେ ଛାଡ଼ି ଦେବେ ବୋଲି ଆଉ ଥରେ ଅନୁରୋଧ କଲେ ବି ପ୍ରଦୀପ ମନା କରିଦେଲେ। ଆଚମ୍ବିତ ହୋଇ କାପ୍ରି କହିଲେ, ପ୍ରଦୀପ ତୁମେ ବଡ଼ ବିଚିତ୍ର।

ପ୍ରଦୀପଙ୍କୁ ଶୁଭକାମନା ଜଣାଇ ଘରକୁ ଫେରିବା ପରେ ଉତ୍ତୋଳନ କରିଥିବା ଭିଡିଓକୁ କାପ୍ରି ସାମାଜିକ ଗଣମାଧ୍ୟମରେ ପୋଷ୍ଟ୍‌ କରି ପରିଚୟୋକ୍ତିରେ ଲେଖିଲେ: ପ୍ରଦୀପଙ୍କ କଥା ଅସଂଖ୍ୟ ଜନସାଧାରଣଙ୍କୁ ପ୍ରେରଣା ଦେବ।

ସତକୁ ସତ ପୋଷ୍ଟ୍‌ ହେବାର ୩ ଘଣ୍ଟାରେ ଭିଡିଓଟିର ‘ଭିୟୁ’ ୭ ଲକ୍ଷ ଟପିଯାଇଥିଲା।

Leave A Reply