ମାଫିଆଙ୍କ ଦ୍ୱାରା ଜବର ଦଖଲ ହୋଇ ଚାଲିଛି କୋଟି କୋଟି ଟଙ୍କାର ଶହଶହ ଏକର ମୂଲ୍ୟବାନ ସରକାରୀ ଜମି : ଜିଲ୍ଲା ପ୍ରଶାସନ ନିରବ,, ”ଗରିବଙ୍କୁ ଗୁଣ୍ଠେ ଦେବାକୁ ଜମି ମିଳୁନି”

ଚଣ୍ଡିଖୋଲ,୨୭/୨ : ହଜାର ହଜାର କୋଟି ଟଙ୍କାର କଳାପଥର ଲୁଟପାଟ ଓ ରାଜସ୍ୱ ଫାଙ୍କି ପାଇଁ ଯାଜପୁର ଜିଲ୍ଲାର ଧର୍ମଶାଳା ତହସିଲ ରାଜ୍ୟରେ ଖୁବ ଚର୍ଚ୍ଚାରେ ରହିଥିଲାବେଳେ ଏବେ ଏହି ତହସିଲ ଅଞ୍ଚଳରେ ଶହଶହ କୋଟି ଟଙ୍କାର ମୂଲ୍ୟବାନ ସରକାରୀ ଜମିକୁ ମାଫିଆମାନେ କଳବଳ ଲଗାଇ ଜବରଦଖଲ କରି ନିଜ କବଜାକୁ ନେଇଯାଉଥିବା ଘଟଣା ଆଲୋଡନ ସୃଷ୍ଟି କରିଛି! ଚଳିତ ୧୦ ବର୍ଷ ମଧ୍ୟରେ ଉକ୍ତ ତହସିଲର ଜେନାପୁର ଥାନା ଅନ୍ତର୍ଗତ ଅଞ୍ଜିରା, ସୁକୁଟିଝର,ଚକତେଲିପୋଖରୀ,ପୁରୁଣାବଉଳମାଳ,ଲୁଣିବର,ବରଡା,ରାହାଡପୁର,ବାରମାଣ ମୌଜାରୁ ମାଫିଆମାନେ ପ୍ରାୟ ୧୧ଶହ ଏକରରୁ ଉର୍ଦ୍ଧ୍ବ ମୂଲ୍ୟବାନ ସରକାରୀ ଅନାବାଦୀ, ଗୋଚର ଓ ଜଙ୍ଗଲ କିଶମ ଜମିକୁ ଜବର ଦଖଲ କରି ନିଜ କବଜାକୁ ନେଇଯାଇଥିବା ଦେଖାଯାଇଛି! ଜବର ଦଖଲ ହୋଇଥିବା ଏହି ସରକାରୀ ଜମିର ମୂଲ୍ୟ ଅତିକମରେ ୫ଶହ କୋଟିରୁ ଉର୍ଦ୍ଧ୍ବ ହେବବୋଲି ଅଭିଯୋଗ ହୋଇଛି!ବିଶେଷକରି ଚଣ୍ଡିଖୋଲ – ଡୁବୁରୀ ୫୩ ନମ୍ବର ଜାତୀୟ ରାଜପଥ ପାର୍ଶ୍ଵ ଓ ତତସଲଗ୍ନ ଆଦିବାସୀ ଅଧ୍ୟୁଷିତ ଗ୍ରାମ ପାଖାପାଖି ଅଞ୍ଚଳରେ ଏହି ସବୁ ସରକାରୀ ଜମିକୁ ମାଫିଆମାନେ ଜବରଦଖଲ କରି ବାଡବନ୍ଦୀ କରିବା ପରେ ନିଜନିଜ କଵଜାକୁ ନେଇଛନ୍ତି! ଏପରିକି ଏହିସବୁ ସରକାରୀ ଜମିଉପରେ ବେଆଇନ ଭାବେ ଘରଦ୍ୱାର ଓ ବିଭିନ୍ନ ବ୍ୟବସାୟିକ ସସ୍ଥା ପ୍ରତିଷ୍ଠା କରିଥିବା ଦେଖାଯାଇଛି! ଅନେକ ସ୍ଥାନରେ ସରକାରୀ ଜମିକୁ କବଜାକରି ବାଡବନ୍ଦୀ କରିବାପରେ ସେହି ଜମିକୁ ଭଡା ଲଗାଇ ମାଫିଆମାନେ ମାସିକ ଲକ୍ଷଲକ୍ଷ ଟଙ୍କା କମାଉଥିବା ମଧ୍ୟ ଦେଖାଯାଉଛି!କେତେକ ମାଫିଆ ଗଡମଧୁପୁର,ବଳରାମପୁର ଓ ଦର୍ପଣ ରାଜା ଓ ଜମିଦାରଙ୍କ ଜାଲ ହାତପଟ୍ଟା ମାଧ୍ୟମରେ ଜବର ଦଖଲ ଜମିକୁ ନିଜ ନାମରେ ରେକର୍ଡ କରାଇ ନେବାକୁ ଅପଚେଷ୍ଟା ଚଳାଇଥିଲା ବେଳେ ଆଉ କେତେକ ସେହି ଜାଲ ହାତପଟ୍ଟାକୁ ସଠିକ ଦର୍ଶାଇ ତାହା ବଳରେ ବେଆଇନ ଭାବେ  ବିଭିନ୍ନ କୋର୍ଟ କଚେରୀରେ ନାମକୁ ମାତ୍ର ମାମଲା ଦରଜକରି ସେହି ବାହାନାରେ ମୂଲ୍ୟବାନ ସରକାରୀ ଜମିକୁ ଭୋଗ ଦଖଲକରି ଚାଲିଛନ୍ତି! ଏହି ବେଆଇନ ଜମି ଜବରଦଖଲ ସମ୍ପର୍କରେ ଧର୍ମଶାଳା ତହସିଲ ଓ ଯାଜପୁର ଜିଲ୍ଲା ପ୍ରଶାସନ ସମ୍ପୂର୍ଣ୍ଣ ଅବଗତ ଥିଲେ ମଧ୍ୟ ଏହିସବୁ ମୂଲ୍ୟବାନ ସରକାରୀ ଭୂସମ୍ପତିକୁ ଜବର ଦଖଲ ମୁକ୍ତ କରିବା ପାଇଁ କାହିଁକି ସାମାନ୍ୟତ୍ତମ ଚେଷ୍ଟା କରୁନାହାନ୍ତି ତାହା ଏବେ ସାଧାରଣରେ ପ୍ରଶ୍ନ ହେଉଛି! ପ୍ରଶାସନିକ ଅପାରଗତା କାରଣରୁ ଏହି ଅଞ୍ଚଳରେ ପ୍ରତ୍ୟେକ ଦିନ ଅଧକରୁ ଅଧିକ ମୂଲ୍ୟବାନ ସରକାରୀ ଜମି ମାଫିଆ ଓ ପ୍ରଭାବଶାଳୀ ମାନେ ଜବର ଦଖଲ କରି ଚାଲିଛନ୍ତି!ଏଥିନେଇ ବାରମ୍ବାର ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବାସହ ଜବର ଦଖଲରେଥିବା ଏହିସବୁ ସରକାରୀ ଜମିକୁ ଉଦ୍ଧାର ପାଇଁ ବହୁ ହିତାଧିକାରୀ ଯାଜପୁର ଜିଲ୍ଲାପାଳଙ୍କ ନିକଟରେ ଫେରାଦ ହୋଇଛନ୍ତି!ହେଲେ ତାହା।ଉପରେ କେହି ଦୃଷ୍ଟି ଦେଉନଥିବା ଅଭିଯୋଗ ହୋଇଛି! ଅପରପକ୍ଷରେ ଏହି ତହସିଲର ଅଞ୍ଜିରା ଓ ତାର ପାର୍ଶ୍ବବର୍ତୀ ମୌଜାରେ ବହୁ ବର୍ଷଧରି ସ୍ଥିତିବାନ ଜମିରେ ଲୋକେ ବସବାସ କରିଆସୁଥିଲା ବେଳେ ସେମାନଙ୍କ ଜମିକୁ ଜଙ୍ଗଲ କିଶମ ଦର୍ଶାଇ ଗତ ବନ୍ଦୋବସ୍ତ ସମୟରେ ସରକାରୀ ଖାତାରେ ସାମିଲ କରିଦିଆଯାଇଛି! ଫଳରେ ସ୍ଥାନୀୟ ୧୨ଟି ଗ୍ରାମର ୧୩ ହଜାରରୁ ଉର୍ଦ୍ଧ୍ବ ଲୋକ ସେମାନଙ୍କ ଘରଡିହ ଓ ଜମି ହରାଇଛନ୍ତି! ସେହିପରି ଏହି ଅଞ୍ଚଳରେ ଘରଡିହ ନଥିବା ପ୍ରାୟ ୫ହଜାରରୁ ଉର୍ଦ୍ଧ୍ବ ଲୋକ ଗୁଣ୍ଠିକିଆ ଘରଡିହ ପଟ୍ଟା ପାଇଁ ଚାହିଁ ରହିଥିଲା ବେଳେ ସେମାନଙ୍କୁ ସରକାର ଓ ସ୍ଥାନୀୟ ପ୍ରଶାସନ ପକ୍ଷେ ଗୁଣ୍ଠେ ଜମି ଦେବା ସମ୍ଭବ ହୋଇନାହିଁ! ହେଲେ ପରିତାପର ବିଷୟ ମାଫିଆମାନେ ଏହି ଅଞ୍ଚଳରୁ ଶହଶହ ଏକର ମୂଲ୍ୟବାନ ସରକାରୀ ଜମି ମାଡିବସୀ ନିଜ କବଜାକୁ ନେଇ ତାହାକୁ ଭୋଗଦଖଲ କରିଚାଲିବା ଘଟଣା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି! ଜବରଦଖଲ ହୋଇଥିବା ଏହି ମୂଲ୍ୟବାନ ସରକାରୀ ଜମିକୁ ଉଦ୍ଧାରକରି ସରକାର ନିଜ ଅଧିନକୁ ନେବାସହ ଭୂମିହୀନ ମାନଙ୍କୁ ଜଥାଶିଘ୍ର ଘରଡିହ ପଟ୍ଟା ପ୍ରଦାନ ପାଇଁ ବୁଦ୍ଧିଜୀବୀ ମହଲରୁ ଦାବି ହୋଇଛି