‘ବନ୍ଦେ ମାତରମ୍’ର କେବଳ ଦୁଇଟି ଅନ୍ତରା ଗାଇବା ନେଇ କଂଗ୍ରେସର ନିଷ୍ପତ୍ତି ଉପରେ ମାନନୀୟ କେନ୍ଦ୍ରୀୟ ଗୃହ ଓ ସମବାୟ ମନ୍ତ୍ରୀ ତଥା ବିଜେପିର ବରିଷ୍ଠ ନେତା ଶ୍ରୀ ଅମିତ ଶାହଙ୍କ କଡ଼ା ଜବାବ

ମାନନୀୟ କେନ୍ଦ୍ରୀୟ ଗୃହ ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହ କଂଗ୍ରେସକୁ ଟାର୍ଗେଟ କରି କହିଛନ୍ତି ଯେ, କଂଗ୍ରେସ କାର୍ଯ୍ୟସମିତି ‘ବନ୍ଦେ ମାତରମ୍’ର କେବଳ ଦୁଇଟି ଅନ୍ତରା ଗାଇବାକୁ ନିଷ୍ପତ୍ତି ନେଇ ପୁଣିଥରେ ତୁଷ୍ଟିକରଣର ରାଜନୀତିକୁ ଦୋହରାଇଛି। ଶ୍ରୀ ଶାହ କହିଛନ୍ତି ଯେ, ୧୯୩୭ରେ କଂଗ୍ରେସ ନେଇଥିବା ଏହି ନିଷ୍ପତ୍ତି ହିଁ ଦେଶ ବିଭାଜନର ମୂଳଦୁଆ ପକାଇଥିଲା। ‘ବନ୍ଦେ ମାତରମ୍’ର ୧୫୦ତମ ବର୍ଷପୂର୍ତ୍ତି ଅବସରରେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ କେନ୍ଦ୍ର ସରକାର ଏହି ଐତିହାସିକ ଭୁଲକୁ ସୁଧାରି ସରକାରୀ କାର୍ଯ୍ୟକ୍ରମ ଗୁଡ଼ିକରେ ‘ବନ୍ଦେ ମାତରମ୍’ର ସମ୍ପୂର୍ଣ୍ଣ ଗୀତ ଗାଇବାକୁ ନିଷ୍ପତ୍ତି ନେଇଛନ୍ତି। ମାନନୀୟ କେନ୍ଦ୍ର ଗୃହମନ୍ତ୍ରୀ କଂଗ୍ରେସର ଏହି ନିଷ୍ପତ୍ତିକୁ ତୁଷ୍ଟିକରଣର ରାଜନୀତି ଏବଂ ବଙ୍କିମଚନ୍ଦ୍ର ଚଟ୍ଟୋପାଧ୍ୟାୟ ତଥା ସ୍ୱାଧୀନତା ସଂଗ୍ରାମୀମାନଙ୍କ ପ୍ରତି ଅପମାନ ବୋଲି କହିବା ସହ ଏହା ବିରୋଧରେ ସ୍ୱର ଉଠାଇବାକୁ ଦେଶବାସୀଙ୍କୁ ଆହ୍ୱାନ କରିଛନ୍ତି।

ଶ୍ରୀ ଶାହ କହିଛନ୍ତି ଯେ, କଂଗ୍ରେସ କାର୍ଯ୍ୟସମିତି ଗତକାଲି ଏକ ଆଶ୍ଚର୍ଯ୍ୟଜନକ ଏବଂ ରାଷ୍ଟ୍ରବିରୋଧୀ ନିଷ୍ପତ୍ତି ନେଇଛି। କଂଗ୍ରେସ ୧୯୩୭ରେ ନିଜ ଦଳ ନେଇଥିବା ନିଷ୍ପତ୍ତିକୁ ଅନୁସରଣ କରି ମହାନ ଗୀତ ‘ବନ୍ଦେ ମାତରମ୍’ର କେବଳ ଦୁଇଟି ଅନ୍ତରା ଗାଇବାକୁ ନିଷ୍ପତ୍ତି ନେଇଛି। ଶ୍ରୀ ଶାହ କହିଛନ୍ତି ଯେ, ସାରା ଦେଶବାସୀ ଏହା ମନେ ରଖିବା ଉଚିତ ଯେ, ୧୯୩୭ରେ କଂଗ୍ରେସ ପାର୍ଟି ମୁସଲିମ ତୁଷ୍ଟିକରଣ ପାଇଁ ‘ବନ୍ଦେ ମାତରମ୍’କୁ ଦୁଇ ଭାଗରେ ବିଭକ୍ତ କରିଥିଲା ଏବଂ ଦେଶ ବିଭାଜନର ମୂଳଦୁଆ ପକାଇଥିଲା। ସେହିଠାରୁ ଦ୍ୱି-ରାଷ୍ଟ୍ର ତତ୍ତ୍ୱକୁ ଶକ୍ତି ମିଳିଥିଲା, ଯାହା ଶେଷରେ ଦେଶ ବିଭାଜନ ଏବଂ ପାକିସ୍ତାନର ଜନ୍ମର ପଥ ପ୍ରଶସ୍ତ କରିଥିଲା।

ଶ୍ରୀ ଶାହ କହିଛନ୍ତି ଯେ, ଆଜି ‘ବନ୍ଦେ ମାତରମ୍’ର ରଚନାର ୧୫୦ତମ ବର୍ଷରେ ମୋଦି ସରକାର ବଙ୍କିମ ବାବୁଙ୍କ ଏହି ଅମର ରଚନାକୁ ସମ୍ପୂର୍ଣ୍ଣ ଭାବେ ଗାଇ ଜାତୀୟ ଏକତାକୁ ପୁଣିଥରେ ସୁଦୃଢ଼ କରିବା ପାଇଁ ନିଷ୍ପତ୍ତି ନେଇ ସେହି ଐତିହାସିକ ଭୁଲକୁ ସୁଧାରିଛନ୍ତି। ସରକାର ଏହା ମଧ୍ୟ ନିଷ୍ପତ୍ତି ନେଇଛନ୍ତି ଯେ, ସମସ୍ତ ସରକାରୀ କାର୍ଯ୍ୟକ୍ରମରେ ‘ବନ୍ଦେ ମାତରମ୍’ର ସମ୍ପୂର୍ଣ୍ଣ ଗୀତ ଗାଇବାକୁ ହେବ ଏବଂ ଏହି ନିଷ୍ପତ୍ତିକୁ ଆଇନଗତ ସ୍ୱୀକୃତି ମଧ୍ୟ ଦିଆଯାଇଛି। ଅନ୍ୟପକ୍ଷରେ କଂଗ୍ରେସ ଗତକାଲି ଏହି ନିଷ୍ପତ୍ତିକୁ ଅବହେଳା କରିବାର ନିଷ୍ପତ୍ତି ନେଇଛି।

କେନ୍ଦ୍ରୀୟ ଗୃହ ଓ ସମବାୟ ମନ୍ତ୍ରୀ କହିଛନ୍ତି ଯେ, କଂଗ୍ରେସର ଏହି ନିଷ୍ପତ୍ତି ତାହାର ଖୋଲା ତୁଷ୍ଟିକରଣ ନୀତିକୁ ପୁଷ୍ଟି କରୁଛି। ଶ୍ରୀ ଶାହ କହିଛନ୍ତି ଯେ, ନିଜ ଭୋଟ ବ୍ୟାଙ୍କକୁ ଖୁସି କରିବା ପାଇଁ କଂଗ୍ରେସ କେବଳ ଦିବଙ୍ଗତ ବଙ୍କିମ ବାବୁଙ୍କ ଅମର ରଚନାକୁ ଅପମାନ କରିନାହିଁ, ବରଂ ସେହି ଲକ୍ଷ ଲକ୍ଷ ଶହୀଦଙ୍କୁ ମଧ୍ୟ ଅପମାନ କରିଛି, ଯେଉଁମାନେ ‘ବନ୍ଦେ ମାତରମ୍’ର ଉଦ୍‌ଘୋଷ କରି ଦେଶର ସ୍ୱାଧୀନତା ପାଇଁ ନିଜ ପ୍ରାଣ ଉତ୍ସର୍ଗ କରିଥିଲେ ଏବଂ ବର୍ଷ ବର୍ଷ ଧରି କାରାଗାରରେ ନିର୍ଯାତନା ସହିଥିଲେ।

ଶ୍ରୀ ଅମିତ ଶାହ କହିଛନ୍ତି ଯେ, କଂଗ୍ରେସ ପାର୍ଟି ଆଜି ସଂସଦ ଦ୍ୱାରା ପ୍ରଣୀତ ଆଇନକୁ ଅସ୍ୱୀକାର କରି ନିଜର ୧୯୩୭ର ପାର୍ଟି ପ୍ରସ୍ତାବକୁ ଅନୁସରଣ କରୁଛି। ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସ ପାର୍ଟି ପୁଣିଥରେ ଦେଶରେ ତୁଷ୍ଟିକରଣର ରାଜନୀତିକୁ ପୂର୍ଣ୍ଣ ଶକ୍ତି ସହ ଆଗକୁ ବଢ଼ାଉଛି, ଯାହା ଅତ୍ୟନ୍ତ ଆଶ୍ଚର୍ଯ୍ୟଜନକ। ସେ ଦେଶବାସୀଙ୍କୁ ଆହ୍ୱାନ କରି କହିଛନ୍ତି ଯେ, ଦେଶ ଥରେ ‘ବନ୍ଦେ ମାତରମ୍’କୁ ଦୁଇ ଭାଗରେ ବିଭକ୍ତ କରିବାର ଭୁଲ କରିଥିଲା ଏବଂ ସେହି ଭୁଲର ଗୁରୁତର ପରିଣାମ ଦେଶକୁ ଭୋଗିବାକୁ ପଡ଼ିଥିଲା।

ଶ୍ରୀ ଶାହ କହିଛନ୍ତି ଯେ, ଏବେ ଦେଶବାସୀଙ୍କୁ ଏକଜୁଟ ହୋଇ କଂଗ୍ରେସ ପାର୍ଟିର ଏହି ନିଷ୍ପତ୍ତି ବିରୋଧରେ ସ୍ୱର ଉଠାଇବା ଉଚିତ ଏବଂ ସ୍ପଷ୍ଟ କରିଦେବା ଉଚିତ ଯେ, ଦେଶରେ ଆଉ ତୁଷ୍ଟିକରଣର ରାଜନୀତିକୁ ବରଦାସ୍ତ କରାଯିବ ନାହିଁ। ସେ କହିଛନ୍ତି ଯେ, ଏହା ଏକ ସ୍ୱାଧୀନ ଦେଶ। ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ସ୍ୱାଧୀନତାର ୮୦ ବର୍ଷ ପରେ ୧୯୩୭ରେ କଂଗ୍ରେସ ନେଇଥିବା ନିଷ୍ପତ୍ତିକୁ ସୁଧାରିବାର କାର୍ଯ୍ୟ କରିଛନ୍ତି। ଶ୍ରୀ ଶାହ କହିଛନ୍ତି ଯେ, ଦେଶର ଜନତା ଏବେ ଏହି ସୁଧାରର ବିରୋଧକୁ ବରଦାସ୍ତ କରିବେ ନାହିଁ।

ଭାରତୀୟ ଜନତା ପାର୍ଟି, କଂଗ୍ରେସ ପାର୍ଟିର ଏହି ନିଷ୍ପତ୍ତିକୁ କଡ଼ା ନିନ୍ଦା କରୁଛି ଏବଂ ଜନସାଧାରଣଙ୍କ ମଧ୍ୟରେ ତଥା ବିଧାନମଣ୍ଡଳ ଗୁଡ଼ିକରେ ମଧ୍ୟ ଏହାର ଦୃଢ଼ ବିରୋଧ କରିବ।