ଚନ୍ଦ୍ରଭାଗା ମାଘସପ୍ତମୀ ବୁଡ଼ରୁ ବଂଚିତ ହେଲେ ଶ୍ରଦ୍ଧାଳୁ ସ୍ନାନ କଲେ ୩୦୦ ଜଣରୁ ୩୦ ଜଣ ସେବାୟତ ଓ ସରକାରୀ କର୍ମଚାରୀ

କୋଣାର୍କ ,୭/୨ ଚଳିତବର୍ଷ ମହାମାରୀ କରୋନା ର ତୃତୀୟ ଲହର ର ସଂକ୍ରମଣ କୁ ନଜରରେ ରଖି ଚନ୍ଦ୍ରଭାଗା ମାଘସପ୍ତମୀ ବୁଡ଼ ପାଇଁ ପ୍ରଶାସନ ପକ୍ଷରୁ କଟକଣା ଜାରି କରାଯାଇଥିଲା । ଶ୍ରଦ୍ଧାଳୁ ଓ ଜନଗହଳି ଉପରେ ରୋକ ଲଗାଇବା ପାଇଁ ପୁରୀ ଜିଲ୍ଲା ପ୍ରଶାସନ ପକ୍ଷରୁ ଚନ୍ଦ୍ରଭାଗା ତୀର୍ଥ ପୁଷ୍କରଣୀ ଓ ମେଳାପଡ଼ିଆ ସଲଗ୍ନ ଅଂଚଳରେ ୧୪୪ ଧାରା ଜାରି କରାଯାଇଥିଲା । ଜିଲ୍ଲା ପ୍ରଶାସନ ମାଘବୁଡ଼ ଉପରେ ତୀକ୍ଷ୍ଣ ନଜର ରଖିବାସହିତ , ପ୍ରଶାସନ ପକ୍ଷରୁ ଅସ୍ଥାୟୀ କ୍ୟାମ୍ପ କରାଯାଇ ପୁରୀ ଏସ ପି ଵିଶାଲ ସିଂ ଏବଂ ଉପଜିଲ୍ଲାପାଳ ଭଵତରଣ ସାହୁ  ଉପସ୍ଥିତ ରହିଥିଲେ। ଚଳିତ ବର୍ଷ କଟକଣା ପାଇଁ ମାଘବୁଡ଼ ପଡିଆ ସମ୍ପୂର୍ଣ୍ଣ ଶ୍ରଦ୍ଧାଳୁ ଶୂନ୍ୟ ଓ ଖାଁ ଖାଁ ରହିଥିଲା।ମାତ୍ର କିଛି କିଛି ଶ୍ରଦ୍ଧାଳୁ ନିଜ ଆବେଗ ଓ ଭାବାବେଗ କୁ ଚାପି ନପାରି ତୀର୍ଥ ପୁଷ୍କରିଣୀ ଆଡ଼କୁ ଯିବାକୁ ଚେଷ୍ଟା କରୁଥିବା ବେଳେ ସୁରକ୍ଷା ବ୍ୟବସ୍ଥା ପାଇଁ ନିୟୋଜିତ ପୋଲିସ ବାହିନୀ ସେମାନଙ୍କୁ ଘଉଡ଼ାଇ ଦେଇଥିଲେ ଫଳରେ ଶ୍ରଦ୍ଧାଳୁ ମାନେ ନିରାଶ ହୋଇ ଫେରୁଥିବା ଦେଖା ଯାଇଥିଲା । ପ୍ରତିବର୍ଷ ଚନ୍ଦ୍ରଭାଗା ମାଘସପ୍ତମୀ ବୁଡ଼ରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଥାଏ ସେହିସ୍ଥାନରେ ଚଳିତବର୍ଷ ୩୦୦  ଜଣ ସେବାୟତ ଓ ସରକାରୀ କର୍ମଚାରୀଙ୍କୁ ନେଇ  ତୀର୍ଥ ସ୍ନାନ କରିବାର ବ୍ୟବସ୍ଥା ପ୍ରଶାସନ ପକ୍ଷରୁ କରାଯିବା ନିମନ୍ତେ କଟକଣା ସହିତ ବ୍ୟବସ୍ଥା  କରାଯାଇଥିଲା ବେଳେ ମାତ୍ର ୩୦ ଜଣ   ବୂଡ଼ ପକାଇ ସ୍ନାହ୍ନ କରିଥିବା ଦେଖିବାକୁ ମିଳିଥିଲା ।

 ତୀର୍ଥରେ ସ୍ନାନ କରିଥିବା ସେବାୟତ ଓ ସରକାରୀ କର୍ମଚାରୀ ମାନେ ସୂର୍ଯ୍ୟୋଦୟ କୁ ଅପେକ୍ଷା କରି  ଦର୍ଶନ କରିଥିଲେ । ସବୁବର୍ଷ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମରେ ଚଳଚଞ୍ଚଳ ହୋଇପଡ଼ୁଥିବା ନବଗ୍ରହପୀଠ ଚଳିତବର୍ଷ  ପ୍ରସାଶନ ର କଡା କଟକଣା  ପାଇଁ ଶ୍ରଦ୍ଧାଳୁଙ୍କ ବିନା ଖାଁଖାଁ ହୋଇ ପଡ଼ିଥିଲା । ପ୍ରଶାସନ ପକ୍ଷରୁ ସୋମବାର  ଭୋର ୪ .୨୧ ମିନିଟ ପରେ ତୀର୍ଥ ପୁଷ୍କରଣୀରେ ସ୍ନାନ ପାଇଁ ବନ୍ଦୋବସ୍ତ କରାଯାଇଥିଲା । ମାଘମେଳାର ପୂର୍ବ ପ୍ରସ୍ତୁତି ଅନୁଯାୟୀ ମାଘମେଳାର ତିନି ଆରାଧ୍ୟ ଠାକୁର ମାଧିପୁରର ବାବା ତ୍ରିବେଣୀଶ୍ବର , ସନ୍ଥପୁରର ବାବା ଐଶାନେଶ୍ବର ଓ କୁରୁଜଙ୍ଗ ଗ୍ରାମର ବାବା ଦକ୍ଷିଣେଶ୍ବର ମହାଦେବଙ୍କ ଚଳନ୍ତି ପ୍ରତିମା ଙ୍କୁ ରବିବାର ରାତ୍ରି ୧୦ଟା ରେ ବିମାନବିଜେ କରାଯାଇଥିଲା । ବିମାନବିଜେ ପରେ ତିନି ଠାକୁରଙ୍କ ସୁସଜ୍ଜିତ ବିମାନ ବର୍ଣ୍ଣାଢ଼୍ୟ ଶୋଭାଯାତ୍ରାରେ ମନ୍ଦିରରୁ ବାହାରି ଏନଏସି କାର୍ଯ୍ୟାଳୟ ନିକଟରେ ରାତ୍ର ୧୨.୧୦ ମିନିଟ ରେ ପହଂଚି  ଏକତ୍ରିତ ହୋଇଥିଲେ । ସେଠାରେ ଏନଏସି କର୍ତୁପକ୍ଷ ପାରମ୍ପାରିକ ଭାବେ ତିନି ଠାକୁରଙ୍କୁ ଶଙ୍ଖୋଳି ପୂଜାମଣ୍ଡପକୁ ନେଇଥିଲେ । ।ଏନଏସି କାର୍ଯ୍ୟାଳୟରେ ତିନି ଠାକୁରଙ୍କ ପୂଜାନୀତି ସଂପାଦନ ପରେ ତିନି ଠାକୁରଙ୍କ ବିମାନ ଚନ୍ଦ୍ରଭାଗା ଅଭିମୁଖେ ୧୨୪୫ ମିନିଟ ରେ  ବାହାରି ଥିଲା ।

ବାଟରେ  ରାଜସ୍ବ ବିଭାଗ କାର୍ଯ୍ୟାଳୟରେ ମଧ୍ୟ ତିନି ଠାକୁରଙ୍କ ପୂଜାନୀତି ସମାପନ ହୋଇଥିଲା । ଏହାପରେ ତିନି ଠାକୁର ଙ୍କ ବିମାନ ଘଣ୍ଟ ମର୍ଦ୍ଦଳ, ଯୋଡ଼ିଶଙ୍ଖ ର ବିରାଟ ପଟୁଆରରେ ଚନ୍ଦ୍ରଭାଗା ତୀର୍ଥ ଅଭିମୁଖେ ବାହାରି ରାତ୍ର .୩୦ ମିନିଟ ରେ ପହଁଚିଥିଲା । ତିନି ଠାକୁର ଏକ ସଙ୍ଗରେ ବଙ୍ଗୋପସାଗରରେ ମହୋଦଧି ରେ ରାତ୍ର ୪ ଘଂଟିକା ରେ  ସ୍ନାନ ସାରିବା ପରେ ତୀର୍ଥ ପୁଷ୍କରଣୀ ପୂଜାମଣ୍ଡପରେ ବିଜେ ହୋଇଥିଲେ ।ସେଠାରେ ତିନି ଠାକୁରଙ୍କ  ପୂଜାର୍ଚ୍ଚନା ଓ ହୋମଯଜ୍ଞ କରାଯାଇଥିଲା  ପରେ ସେବାୟତ ତିନି ଠାକୁର ଙ୍କୁ ଧରି ତୀର୍ଥପୁସ୍କରଣୀ ଅଭିମୁଖେ ଯାଇ ସେଠାରେ ତିନି ଠାକୁରଙ୍କ  ମାଘସ୍ନାନ ୪-୨୨ ମିନିଟ ରେ କରିଥିଲେ ।  ପରେ ସେବାୟତ ଓ କର୍ମଚରୀ ମାନେ ସ୍ନାହ୍ନ କରିଥିଲେ। ପୁରୀ ଉପଜିଲ୍ଲାପାଳ ଭବତାରଣ ସାହୁ,ସ୍ଥାନୀୟ ଅତିରିକ୍ତତହସିଲଦାର ଶରତ କୁମାର ପରିଡା , ନିମାପଡ଼ା ଏସଡ଼ିପିଓ ଦେବାଶିଷ ମିଶ୍ର କୋଣାର୍କ ଥାନା ଭାରପ୍ରାପ୍ତ ଅଧିକାରୀ ରଂଜନ ମଲ୍ଲିକ , କୋଣାର୍କ ଏନଏସି ନିର୍ବାହୀ ଅଧିକାରୀ ଆକୃତି ଗୋଏଙ୍କା ,  ଙ୍କ ସମେତ ଜିଲ୍ଲା ପ୍ରଶାସନ ବରିଷ୍ଠ ଅଧିକାରୀ ମାନେ ଉପସ୍ଥିତ ରହି ଆଜିର ମେଳାକୁ ଶାନ୍ତି ଶୃଙ୍ଖଳାର ସହିତ ପରିଚାଳନା କରିଥିଲେ । ତେବେ ଚଳିତବର୍ଷ ମାଘସପ୍ତମୀ ବୁଡ଼ ପାଇଁ ଦୁରଦୁରାନ୍ତରୁ ଆସିଥିବା ଅନେକ  ଶ୍ରଦ୍ଧାଳୁ ମାନେ ଚନ୍ଦ୍ରଭାଗା ଯାଇ ନପାରି କୋଣାର୍କରେ ଅଟକି ରହିଥିଲେ ।ଦିନ ୧୦ ଟା ପରେ ୧୪୪ ଧାରା ଉଠିବା ପରେ ଶ୍ରଦ୍ଧାଳୁମାନେ ବୂଡ଼ ପକାଇଥିଲେ ।