ତିହିଡି,୨୪/୧୧(ଯଦୁମଣି ପାଣିଗ୍ରାହୀ): ଭଦ୍ରକ ଏସପିଙ୍କ ନିଦେ୍ର୍ଦଶକ୍ରମେ ତିହିଡି ପୋଲିସ ପକ୍ଷରୁ ଗତ କିଛି ଦିନ ଚୋରା କୋଇଲା ଡିପୋ ଉପରେ ଲଗାତର ଚଡାଉ କରାଯିବା ସହ କୋଇଲା ଚୋରା କାରବାର ସହ ସଂପୃକ୍ତ ମାଫିଆ ମାନଙ୍କୁ ଗିରଫ କରାଯାଉଛି । ଏହି କ୍ରମରେ ୨୩ ତାରିଖ ରାତିରେ ପୋଲିସ ଜିଝାରପୁର ନିକଟସ୍ଥ ରେଳ ଲାଇନ ନିକଟରୁ ୪୦ ବସ୍ତା ଚୋରା କୋଇଲା ବୋଝେଇ ଏକ ପିକ୍ଅପ ଭ୍ୟାନକୁ ଜବତ କରିବା ସହ କୋଇଲା ମାଫିଆ ତଥା ପେଶାଦାର ଅପରାଧୀ ଶିବ ମଲ୍ଲିକକୁ ଗିରଫ କରିଛି । ପ୍ରକାଶ ଯେ, ଜିଝାରପୁର ନିକଟସ୍ଥ ରେଳ ଲାଇନ ନିକଟରେ ଚୋରା ଚାଲାଣ କରିବା ଉଦେ୍ଦଶ୍ୟରେ ଗୋଟିଏ ପିକଅପ ଭ୍ୟାନ ନଂ-(ଓଡି୨୨ଜେଡ୍୩୭୧୨)ରେ କୋଇଲା ବୋଝେଇ କରାଯାଉଥିବାର ଖବର ପାଇ ତିହିଡି ଆଇଆଇସି ପ୍ରସନ୍ନ କୁମାର ନାୟକଙ୍କ ନେତୃତ୍ୱରେ ଏକ ପୋଲିସ ଟିମ ସେଠାରେ ପହଞ୍ଚି ଉକ୍ତ କୋଇଲା ବୋଝେଇ ପିକ୍ଅପ ଭ୍ୟାନକୁ ଜବତ କରିବା ସହ ଘଟଣାସ୍ଥଳରୁ କୋଇଲା ମାଫିଆ ଶିବକୁ ଗିରଫ କରିଥିଲେ । ଶିବ ଜଣେ ପେଶାଦାର ଅପରାଧୀ ଓ ତା’ ନାଁରେ ୧୪ଟି ବିଭିନ୍ନ ମାମଲା ରହିଥିବା କଥା ପରେ ଜଣା ପଡିଥିଲା । ଏମିତିକି ଗତ କିଛିଦିନ ପୂର୍ବେ ପାଳିଆରେ ହୋଇଥିବା ସାମ୍ପ୍ରଦାୟିକ ଗଣ୍ଡଗୋଳରେ ସେ ମୁଖ୍ୟ ଅଭିଯୁକ୍ତ ବୋଲି ପୋଲିସ ସୂଚନା ଦେଇଛି । ପୋଲିସ ପକ୍ଷରୁ ଶିବର ଘର ତଲାସି କରାଯାଇଥିବା ବେଳେ ତା’ର ପରିବାର ଲୋକେ ଏହାକୁ ବିରୋଧ କରିଥିଲେ । ତିହିଡି ଥାନାରେ ଶିବଙ୍କ ନାଁରେ ଏକ ମାମଲା ନଂ-୫୨୩/୨୪ ରୁଜୁ କରାଯାଇ ତାକୁ କୋର୍ଟ ଚାଲାଣ କରାଯାଇଛି ।
