ରଣପୁର : ନୟାଗଡ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ଦର୍ପନାରାୟଣପୁର ପଚାୟତର ଗୁଣ୍ଡୁରିବାରୀ ଗ୍ରାମର ଲୋକେ ଭୂତ ଭୟରେ ନିଜର ଭିଟାମାଟି ଛାଡି ଅନ୍ୟତ୍ର ଚାଲି ଯାଇଥିବା ଜଣାପଡିଛି । ଖବର ସଂଗ୍ରହରୁ ଜଣାଯାଏ, କିଛି ବର୍ଷ ତଳେ ଏହି ଗୁଣ୍ଡୁରିବାରୀ ଗ୍ରାମରେ ୭ ଟି ହରିଜନ ପରିବାର ଆସି ବସବାସ କରୁଥିଲେ ।
ପରେ ଗ୍ରାମର ପୁରୁଷ ଲୋକମାନେ ହଠାତ୍ ରକ୍ତବାନ୍ତି. ଝାଡାରେ ପଡିବା ସହିତ ଅକାଳରେ ମୃତୁ୍ୟମୁଖରେ ପଡୁଥିଲେ । ଏହା କୌଣସି ଦୈବୀ ପ୍ରକୋପ କିମ୍ବା ଭୂତପ୍ରେତର ପ୍ରଭାବରେ ହେଉଛି ବୋଲି ଆଶଙ୍କା କରି ଭୟରେ ଗ୍ରାମବାସୀମାନେ ନିଜର ଭିଟାମାଟି ଛାଡି ନିକଟସ୍ଥ ଦର୍ପନାରାୟଣପୁର ଗ୍ରାମରେ ରହୁଛନ୍ତି । ଗ୍ରାମାବାସୀମାନଙ୍କ ମତ ଅନୁଯାୟୀ ରାତିରେ ଭୟଙ୍କର ଶଦ୍ଦ ହେବା ସହ ଗଛ ଭାଙ୍ଗିବା , ପଥର ପଡିବା ଆଦି ଭୟଙ୍କର ଘଟଣାମାନ ଘଟୁଛି । ୪ ବର୍ଷ ଭିତରେ ଏହି ଗ୍ରାମରେ ୭ ଜଣ ଯୁବକଙ୍କ ମୃତୁ୍ୟ ହୋଇଗଲାଣି । ବିଶେଷକରି ବିବାହର ଏକ ବର୍ଷ ପରେ ବିବାହିତ ପୁରୁଷ ଲୋକମାନେ ଏହାର ଶିକାର ହେଉଛନ୍ତି । ଯାହା ଫଳରେ ଗ୍ରାମଟି ସମ୍ପୂର୍ଣ୍ଣ ଜନଶୂନ୍ୟ ହୋଇ ଯାଇଛି । ଏହି ଗ୍ରାମର ଲୋକାମାନେ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ସେମାନଙ୍କୁ ପ୍ରଶାସନ ତୁରନ୍ତ ଥଇଥାନ କରିବା ନିମନ୍ତେ ଗ୍ରାମବାସୀମାନେ ନିବେଦନ କରିଛନ୍ତି ।
