ପୁରୀ :ଆସନ୍ତା ଜୁନ୍ ୫ରେ ଶ୍ରୀଜଗନ୍ନାଥ ମହାପ୍ରଭୁଙ୍କ ପ୍ରସିଦ୍ଧ ସ୍ନାନଯାତ୍ରା । ଚଳିତବର୍ଷ କୋଭିଡ୍ କଟକଣା ଦୃଷ୍ଟିରୁ ସ୍ନାନଯାତ୍ରାରେ ଦଇତାପତି ସେବାୟତଙ୍କ ସଂଖ୍ୟାକୁ ସୀମିତ କରାଯିବ । ସ୍ନାନ ଯାତ୍ରା ପାଇଁ ନିୟୋଜିତ ହେବେ ୧୫୦ଜଣ ଦଇତାପତି ସେବାୟତ । ସେମାନେ ସ୍ନାନଯାତ୍ରାରେ ଚାରି ଠାକୁରଙ୍କ ପହଣ୍ଡି ବିଧି କରିବେ । ୬୦ଜଣ ଦଇତାପତି ଶ୍ରୀଜଗନ୍ନାଥ,୫୦ଜଣ ପ୍ରଭୁ ବଳଭଦ୍ର, ୩୦ଜଣ ଦେବୀ ସୁଭଦ୍ରା ଓ ୧୦ଜଣ ଶ୍ରୀସୁଦର୍ଶନଙ୍କୁ ପହଣ୍ଡି ବିଜେ କରାଇବେ ।
ରବିବାର ଅନୁଷ୍ଠିତ ଦଇତାପତି ନିଯୋଗର ସାଧାରଣ ସଭାରେ ଉପରୋକ୍ତ ନିଷ୍ପତ୍ତି ନିଆଯାଇଛି । ସ୍ନାନ ପୂର୍ଣ୍ଣମୀ ନୀତିରେ ଅଂଶଗ୍ରହଣ କରିବାକୁ ଥିବା ଦଇତାପତିମାନଙ୍କର ତାଲିକା ପ୍ରସ୍ତୁତ କରାଯାଇଛି । ନିଯୋଗ ପକ୍ଷରୁ ପ୍ରସ୍ତୁତ ତାଲିକା ପ୍ରଶାସନକୁ ଦିଆଯିବା ପରେ ସମସ୍ତ ଦଇତାପତିଙ୍କ କୋଭିଡ ଟେଷ୍ଟ କରାଯାଇ ସେମାନଙ୍କୁ ସଙ୍ଗରୋଧରେ ରଖାଯିବ ବୋଲି ନିଷ୍ପତ୍ତି ହୋଇଥିବା ସୂଚନା ଦେଇଛନ୍ତି ଦଇତାପତି ନିଯୋଗ ସଭାପତି ରବି ଦାସ ମହାପାତ୍ର ।
ଗଣମାଧ୍ୟମକୁ ସୂଚନାଦେଇ ଶ୍ରୀ ଦାସ ମହାପାତ୍ର କହିଛନ୍ତି ଯେ ଆସନ୍ତା ସ୍ନାନପୂର୍ଣ୍ଣ ନୀତି ପାଇଁ ସରକାରଙ୍କ ସହ ଆଲୋଚନା କରାଯାଇଛି । କୋଭିଡ କଟକଣା ମଧ୍ୟରେ କିପରି ସ୍ନାନଯାତ୍ରା ସମ୍ପନ୍ନ ହେବ ସେ ବିଷୟରେ ରବିବାର ଅନୁଷ୍ଠିତ ନିଯୋଗର ବୈଠକରେ ଆଲୋଚନା କରାଯାଇଛି । ୧୫୦ଜଣ ଦଇତାପତି ପହଣ୍ଡି କରାଇବା ପାଇଁ ନିଯୋଗ ନିଷ୍ପତ୍ତି ନେଇଛି । ନିଯୋଗର ମୁଖପାତ୍ର ଗଣପତି ଦାସ ମହାପାତ୍ର ବିଭିନ୍ନ ସମୟରେ ଗଣମାଧ୍ୟମକୁ ସୂଚନା ଦେବେ ବୋଲି ସେ କହିଥିଲେ । ନିଯୋଗର ସମ୍ପାଦକ ଦୁର୍ଗା ପ୍ରସାଦ ଦାସ ମହାପାତ୍ର ପ୍ରକାଶ କରିଛନ୍ତି ଯେ ପହଣ୍ଡି ହେଉଛି ଦଇତାପତିମାନଙ୍କର ମୁଖ୍ୟ ଦାୟିତ୍ୱ ।
ଅନ୍ୟ ସେବାୟତମାନେ ସେଥିରେ ସହାୟତା କରିଥାନ୍ତି । ଦଇତାପତିମାନେ ବିଭିନ୍ନ ପର୍ଯ୍ୟାୟରେ ରହିଥିବା ନୀତି ସମ୍ପାଦନ କରିବେ । ଠାକୁର ରୁନ୍ଧା ହେବା ପରେ ରାତି ପର୍ଯ୍ୟନ୍ତ କେତେ ସଂଖ୍ୟକ ଦଇତାପତି ବିଭିନ୍ନ ସମୟରେ ସ୍ନାନବେଦୀ ଉପରେ ରହିବେ ତାହାର ସଂଖ୍ୟା ନିର୍ଦ୍ଧାରଣ କରାଯାଇଛି । ପରମ୍ପରା ଓ ସ୍ୱତ୍ତ୍ୱଲିପି ଅନୁଯାୟୀ ସମସ୍ତ କାର୍ଯ୍ୟ କରାଯିବ । ତେବେ ସେ ସାମାଜିକ ଦୂରତା ରକ୍ଷା କରାଯାଇପାରିବ ନାହିଁ ବୋଲି ସେ କହିଥିଲେ । ମନ୍ଦିର ଭିତରକୁ ଭକ୍ତମାନଙ୍କ ପ୍ରବେଶ ଉପରେ କଟକଣା ଥିବାରୁ ପରିମାଣିକ ଦର୍ଶନ କିମ୍ବା ସାହାଣ ମେଲା ଦର୍ଶନ ହେବ ନାହିଁ ।
ଏଥର ଦର୍ଶନ ହେଉନଥିବାରୁ ସ୍ନାନପୂର୍ଣ୍ଣମୀ ପରଦିନ ଅଣସର ହେବ । ଜଗନ୍ନାଥ ସଂସ୍କୃତିକୁ ବଞ୍ଚାଇ ରଖିବା ପାଇଁ ସରକାର ଯେଉଁ କଟକଣା କରିଛନ୍ତି ସେଥିରେ ସେମାନେ ସହଯୋଗ କରିବେ ବୋଲି କହିଥିଲେ । ସ୍ନାନ ପୂର୍ଣ୍ଣମୀ ପୂର୍ବଦିନ ଠାରୁ ନୀଳାଦ୍ରି ବିଜେ ପର୍ଯ୍ୟନ୍ତ ଆମେ ବାହାରକୁ ଆସିନଥାଉ ଓ କେହି ଆମ ଘରକୁ ଆସିନଥାନ୍ତି । ଏପରିକି ଆମେ କାହାଠାରୁ ପାଣି ମଧ୍ୟ ଗ୍ରହଣ କରିନଥାଉ । ଏହା ଏକ ପ୍ରକାର ହୋମ କ୍ୱାରେଣ୍ଟାଇନ ନୁହେଁ କି ବୋଲି ସେ ପାଲଟା ପ୍ରଶ୍ନ କରିଥିଲେ ।
ବୃହତ୍ତର ସ୍ୱାର୍ଥ ଦୃଷ୍ଟିରୁ ପ୍ରଶାସନ ଯାହା କରିବ ଆମେ ତାହା ଗ୍ରହଣ କରିବୁ ବୋଲି ଶ୍ରୀଦାସ ମହାପାତ୍ର କହିଥିଲେ । ପାସ ନଥିବା ସେବକଙ୍କୁ ଜଳବିଜେ ନୀତି ପରେ ନିର୍ଦ୍ଧିଷ୍ଟ ସମୟରେ କିଛି ସମୟ ପାଇଁ ସାମାଜିକ ଦୂରତା ରକ୍ଷା କରି ମନ୍ଦିର ଭିତରକୁ ଯିବା ଲାଗି ଅନୁମତି ଦେବାକୁ ପ୍ରଶାସନକୁ ନିବେଦନ କରିବେ । ବଡଦାଣ୍ଡରେ ସାମାଜିକ ଦୂରତା ବଜାୟ ରଖି ଭକ୍ତମାନେ ଦର୍ଶନ କରିବା ପାଇଁ ଅନୁମତି ଦେବାକୁ ସରକାରଙ୍କୁ ନିବେଦନ କରାଯିବ ବୋଲି ମଧ୍ୟ ସେ ସୂଚନା ଦେଇଥିଲେ ।
