ସାକ୍ଷୀଗୋପାଳ : ସାକ୍ଷୀଗୋପାଳ ନାମ ପଞ୍ଜିକରଣ କରି ଟୋକନ ପାଇଥିବା ଚାଷୀ ମାନେ ସେବା ସମବାୟ ସମିତିରେ ଧାନ ବିକ୍ରୟ କରିପାରିଲେ ନାହିଁ l ସେବା ସମବାୟ ସମିତି ତରଫରୁ ଧାନ କ୍ରୟ କରାଗଲା ନାହିଁl ଏହି ସମସ୍ୟାକୁ ନେଇ ଚାଷୀ ମାନେ ଉଚ୍ଚ ନ୍ୟାୟାଳୟ, କଟକଙ୍କ ଦ୍ୱାରସ୍ଥ ହୋଇଛନ୍ତିl ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାଇ ଖରିଫ ଋତୁରେ ଧାନ ବିକ୍ରୟ କରିବା ନିମନ୍ତେ ଚାଷୀ ମାନେ ନିଜ ନିଜ ଅଞ୍ଚଳରେ ଥିବା ସେବା ସମବାୟ ସମିତି ଓ ଜନ ସେବା କେନ୍ଦ୍ରରେ ନାମ ପଞ୍ଜିକରଣ କରିଥିଲେl
ଉକ୍ତ ପଞ୍ଜିକରଣ ଅନୁଯାଇ ଜିଲ୍ଲା ଯୋଗାଣ ବିଭାଗ ଅଧିକାରୀ ଧାନ ବିକ୍ରୟ କରିବା ନିମନ୍ତେ ଚାଷୀ ମାନଙ୍କ ମୋବାଇଲକୁ ମେସେଜ( ବାର୍ତ୍ତା )ପଠାଇଥିଲେ l ଏହାର ନାମ ଟୋକନ l ଟୋକନ ପାଇଥିବା ସମସ୍ତ ଚାଷୀ ପଞ୍ଜିକୃତ ସେବା ସମବାୟ ସମିତିକୁ ଧାନ ବିକ୍ରୟ କରିବା ନିମନ୍ତେ ନେଇ ଯାଇଥିଲେ. କିନ୍ତୁ ସମ୍ପୃକ୍ତ ଧାନ କ୍ରୟ କେନ୍ଦ୍ରରେ ବିଭାଗୀୟ ଅଧିକାରୀ ଓ ମିଲର ମାନଙ୍କ ଅସହଯୋଗ ଯୋଗୁ ଚାଷୀ ମାନେ ଦିନ ଦିନ ଧରି ଖୋଲା ଆକାଶ ତଳେ ଖରା ଓ ବର୍ଷାରେ ଅପେକ୍ଷା କରି ପଡି ରହିଥିଲେ. ବର୍ତ୍ତମାନ ପ୍ରାୟ ୧ ହଜାରରୁ ଉର୍ଦ୍ଧ୍ୱ ଚାଷୀ ଟୋକନ ପାଇଥିଲେ ମଧ୍ୟ ଧାନ ବିକ୍ରୟ କରି ପାରି ନାହାନ୍ତି l ଏହି କ୍ଷତିଗ୍ରସ୍ତ ଚାଷୀ ମାନେ ବାରମ୍ବାର ଏହି ସମସ୍ୟା ସମ୍ପର୍କରେ ଜିଲ୍ଲା ପ୍ରଶାସନ ଓ ପୁରୀ ଜିଲ୍ଲା ଯୋଗାଣ ବିଭାଗ ଅଧିକାରୀଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିଲା ନାହିଁ l
