୨୦୨୦-୨୧ ଆର୍ଥିକ ବର୍ଷରେ ଏକ ନିୟୁତ ଟନ୍ ଫ୍ଲାଏ ଆଶ୍ (ପାଉଁଶ) ପରିବହନ ପାଇଁ ପୂର୍ବତଟ ରେଳପଥର ଲକ୍ଷ୍ୟ

ପଣ୍ୟ ପରିବହନ କ୍ଷେତ୍ରରେ ରେଳବାଇର ଅଂଶ ବୃଦ୍ଧିକରେଇବା ଏବଂ ସଡକ ମାର୍ଗରେ ପରିବହନ କରାଯାଉଥିବା ପଣ୍ୟକୁ ରେଳବାଇ ପ୍ରତି ଆକୃଷ୍ଟ କରିବା ସହ ପଣ୍ୟ ଗମନାଗମନକୁ ସୁନିଶ୍ଚିତ କରିବା ପାଇଁ ପୂର୍ବ ତଟ ରେଳର ମହାପ୍ରବନ୍ଧକ ଶ୍ରୀ ବିଦ୍ୟା ଭୁଷଣଙ୍କ ନିର୍ଦ୍ଦେଶରେ ପୂର୍ବ ତଟ ରେଳପଥର ବ୍ୟବସାୟ ବିକାଶ ୟୁନିଟ୍ (ବିଡିୟୁ) ରେଳ ଦ୍ୱାରା ଫ୍ଲାଏ ଆଶ୍ ପରିବହନ ସମ୍ବନ୍ଧରେ ଇତିମଧ୍ୟରେ ଥର୍ମାଲ ପାୱାର ପ୍ଲାଣ୍ଟର ପ୍ରତିନିଧୀ, ଇଣ୍ଟିଗ୍ରେଟେଡ୍ ଷ୍ଟିଲ୍ ପ୍ଲାଣ୍ଟ, ଆଲୁମିନିୟମ୍ ସ୍ମେଲଟର ପ୍ଲାଣ୍ଟ ଏବଂ ସିମେଣ୍ଟ ପ୍ଲାଣ୍ଟର ପ୍ରତିନିଧୀ ମାନଙ୍କୁ ଭେଟିଛି |

ଆଲୋଚନା ସମୟରେ ରେଳବାଇ ଦ୍ୱାରା ଫ୍ଲାଏ ଆଶ୍ ପରିବହନ ଉପରେ ଦିଆଯାଇଥିବା 40% ପଣ୍ୟ ପରିବହନ ରିହାତିର ଲାଭ ଉଠାଇବାକୁ ଶିଳ୍ପ ପ୍ରତିନିଧୀଙ୍କୁ ପରାମର୍ଶ ଦିଆଯାଇଥିଲା। ପରିବେଶ ମନ୍ତ୍ରଣାଳୟ ଦ୍ୱାରା ନିର୍ଦ୍ଦେଶିତ ଶତପ୍ରତିଶତ ଫ୍ଲାଏ ପାଉଁଶର ବ୍ୟବହାର କେବଳ ଫ୍ଲାଏ ପାଉଁଶ ଉତ୍ପାଦକ, ପରିବହନକାରୀ ଏବଂ ଶେଷ ବ୍ୟବହାରକାରୀଙ୍କ ମିଳିତ ପ୍ରୟାସ ଦ୍ୱାରା ନିଶ୍ଚିତ ହୋଇପାରିବ | ଏହି ବୈଠକରେ ଅଂଶଗ୍ରହଣ କରିଥିବା ସମସ୍ତ ବ୍ୟକ୍ତି ମିଳିତ ଭାବେ ଫ୍ଲାଏ ପାଉଁଶର ଉପଯୋଗ ପାଇଁ 100% ପର୍ଯ୍ୟନ୍ତ ମିଳିତ ପ୍ରୟାସ କରିବାକୁ ସହମତ ହୋଇଥିଲେ। ଏହି ବୈଠକରେ ଅକ୍ଟୋବର 2020 ରୁ ମାର୍ଚ୍ଚ 2021 ମଧ୍ୟରେ ଅନ୍ତତଃ ପକ୍ଷେ ଏକ ନିୟୁତ ଟନ୍ ଫ୍ଲାଏ ପାଉଁଶ ପରିବହନ କରାଯାଇପାରିବ ବୋଲି ଆକଳନ କରାଯାଇଥିଲା।

ଭିଡିଓ କନଫରେନ୍ସିଂ ଲିଙ୍କ୍ ମାଧ୍ୟମରେ ଏହି ବୈଠକ କରାଯାଇଥିଲା ଯେଉଁଥିରେ ପୂର୍ବ ତଟ ରେଳପଥର ବାଣିଜ୍ୟିକ, ପରିଚାଳନା, ଫାଇନାନ୍ସ ଏବଂ ମେକାନିକାଲ୍ ବିଭାଗ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। ଆଲୋଚନା ସମୟରେ ଟାଟା ଷ୍ଟିଲ ବିଏସଏଲ ଲିମିଟେଡ, ଜିଏମଆର ଏନର୍ଜି ଲିମିଟେଡ, ଏନଟିପିସି କଣିହାଁ ଓ ଏନଟିପିସି ସୀମାଦ୍ରୀ ଏବଂ ଡାଲମିଆ ସିମେଣ୍ଟ ଭାରତ ଲିମିଟେଡ଼ ର ପ୍ରତିନିଧିମାନେ ଭାଗନେଇଥିଲେ I

ପୂର୍ବତଟ ରେଳପଥ ବ୍ୟବସାୟ ବିକାଶ ୟୁନିଟ (ବିଡିୟୁ) ଗ୍ରାହକ ଏବଂ ଶିଳ୍ପ ସହିତ ବାରମ୍ବାର ଯୋଗାଯୋଗରେ ଥାଇ ପାରମ୍ପରିକ ପରିବହନ ଢାଞ୍ଚାରେ ରେଳବାଇର ଅଂଶକୁ ମଜବୁତ କରିବା ସହିତ ରେଳବାଇରେ ବିଭିନ୍ନ ଅଣ-ବଲ୍କ ସାମଗ୍ରୀ ଯାତାୟାତ ବୃଦ୍ଧି କରିବା ଉପାୟ ଅନୁସନ୍ଧାନ କରୁଛି ଯାହାକି ଦେଶର ପରିବହନ କ୍ଷେତ୍ରରେ ରେଳବାଇର ଅଂଶକୁ ଆହୁରି ବୃଦ୍ଧି କରାଯାଇ ପାରିବ |