Odisha news

ବାରଣାସୀରେ ପ୍ରିୟଙ୍କା ଗାନ୍ଧୀ କୃଷକ ନ୍ୟାୟ ରାଲିକୁ ସମ୍ବୋଧିତ : କହିଲେ ବିଜେପି ଚାଷୀଙ୍କୁ ଅପମାନିତ କରୁଛି

ବାରଣାସୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଂସଦୀୟ ନିର୍ବାଚନମଣ୍ଡଳୀ ବାରଣାସୀରେ ଆଜି କେନ୍ଦ୍ର ବିରୋଧରେ ବର୍ଷିଛନ୍ତି କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା | ବାରଣାସୀରେ କୃଷକ ନ୍ୟାୟ ରାଲିକୁ ସମ୍ବୋଧିତ କରି ପ୍ରିୟଙ୍କା ଗାନ୍ଧୀ କେନ୍ଦ୍ର ତଥା ରାଜ୍ୟରେ ବିଜେପି ସରକାରଙ୍କୁ କଡ଼ା ଟାର୍ଗେଟ କରିଛନ୍ତି | ଏହି ସମୟରେ ସେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଲଖିମପୁର ଖେରୀରେ ହୋଇଥିବା ହିଂସା ଘଟଣାରେ ଅଭିଯୁକ୍ତଙ୍କୁ ସୁରକ୍ଷା ଦେଇଥିବାର ଅଭିଯୋଗ କରିଛନ୍ତି । କୃଷକ ନ୍ୟାୟ ସମାବେଶକୁ ସମ୍ବୋଧିତ କରି ପ୍ରିୟଙ୍କା ଗାନ୍ଧୀ କହିଛନ୍ତି ଯେ କୋଟିପତିଙ୍କ ଦ୍ୱାରା ଜମି ନିଆଯାଉଥିବାବେଳେ ସମସ୍ତେ ସାବଧାନ ହେବା ଆବଶ୍ୟକ | ପ୍ରିୟଙ୍କା ଗାନ୍ଧୀ କହିଛନ୍ତି ଯେ ବିଜେପି ଚାଷୀଙ୍କୁ ଅପମାନିତ କରୁଛି।

ସରକାର ଲଖିମପୁରର ଅପରାଧୀଙ୍କୁ ସୁରକ୍ଷା ଦେଉଛନ୍ତି। ସେ କହିଛନ୍ତି, ‘ଗୃହ ରାଷ୍ଟ୍ର ମନ୍ତ୍ରୀଙ୍କ ପୁଅ(ଆଶିଷ ମିଶ୍ରା) ଚାଷୀଙ୍କ ଉପରେ କାର ଚଢ଼ାଇଦେଇଥିବାବେଳେ ମୃତକଙ୍କ ପରିବାର କ୍ଷତିପୂରଣ ନୁହେଁ ନ୍ୟାୟ ମାଗିଛନ୍ତି | କିନ୍ତୁ ଏହି ସରକାର ନ୍ୟାୟ ପ୍ରଦାନ କରିବେ ନାହିଁ। ସରକାର ମନ୍ତ୍ରୀଙ୍କ ପୁଅକୁ ସୁରକ୍ଷା ଦେଉଛନ୍ତି । ପ୍ରଧାନମନ୍ତ୍ରୀ ଲଖନଉ ଆସିଥିବାବେଳେ କିନ୍ତୁ ପୀଡ଼ିତାଙ୍କ ଲୁହ ପୋଛିଦେବା ପାଇଁ ଲକ୍ଷ୍ମୀପୁର ଖେରୀକୁ ଆସିନାହାନ୍ତି | ସେହିପରି ଆଜାଦି ମହୋତ୍ସବକୁ ନେଇ ପ୍ରିୟଙ୍କା ପ୍ରଶ୍ନ କରିଛନ୍ତି | ଯେପର୍ଯ୍ୟନ୍ତ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରା ଇସ୍ତଫା ଦେଇନାହାନ୍ତି ସେପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ପ୍ରିୟଙ୍କା କହିଛନ୍ତି |

ସୂଚନା ଥାଉ କି ଲଖିମ୍‌ପୁର ଖେରି ହିଂସାକାଣ୍ଡରେ ୮ଜଣ ପ୍ରାଣ ହରାଇଥିଲେ। ଆଶିଷ ମିଶ୍ରା ହିଁ ସେମାନଙ୍କ ଉପରେ ‘ସ୍ପୋର୍ଟସ୍‌ ୟୁଟିଲିଟି ଭେଇକ୍ଲ’ ଚଢ଼ାଇ ଥିବା କଥା କୃଷକମାନେ ଅଭିଯୋଗ କରିଥିଲେ । ଉକ୍ତ ଅଭିଯୋଗକୁ ଆଶିଷ ଏବଂ ତାଙ୍କ ପିତା କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରା ଅସ୍ୱୀକାର କରିଥିଲେ |ପ୍ରାୟ ୧୨ ଘଣ୍ଟା ଜେରା କରିବା ପରେ ମିଶ୍ରାଙ୍କୁ ଶନିବାର ରାତି ୧୦.୫୦ରେ ଗିରଫ କରାଯାଇଥିଲା |

Shares