ଫୁଲନଖରା : ସଦର ଥାନା ଅନ୍ତର୍ଗତ ଖଲର୍ଦ୍ଦା ଗ୍ରାମର ନୃସିଂହଚରଣ ରାଉତରାୟଙ୍କ ବଡ଼ ପୁଅ ନିରଞ୍ଜନ ରାଉତରାୟ (୪୩) ଓରଫ ଦିଲୁଆ ସର୍ପାଘାତରେ ପ୍ରାଣ ହରାଇଛନ୍ତି । ଶନିବାର ସକାଳ ୮ଟା ସମୟରେ ସେ ନିଜ ଘରେ ଥିବା ୱାସିଙ୍ଗ ମେସିନରେ ଲୁଗାପଟା ସଫା କରୁଥିଲାବେଳେ ମେସିନ ତଳେ ପୂର୍ବରୁ ଲୁଚି ରହିଥିବା ଏକ ବିଷାକ୍ତ ନାଗ ସାପ ତାଙ୍କୁ ଦଂଶନ କରିଥିଲା । ପରିବାର ଲୋକେ ନିରଞ୍ଜନଙ୍କୁ କଟକ ବଡ଼ ମେଡ଼ିକାଲକୁ ନେଇଥିଲେ ମଧ୍ୟ ତାଙ୍କର ମୃତୁ୍ୟ ହୋଇଯାଇଥିଲା । ଫୁଲନଖରା ବନ ବିଭାଗ କର୍ମଚାରୀଙ୍କଦ୍ୱାରା ସାପଟି ଉଦ୍ଧାର ହୋଇଥିଲା । ନିରଞ୍ଜନ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷଙ୍କ କାର୍ଯ୍ୟାଳୟରେ ଚାକିରି କରନ୍ତି । ଏହି ଘଟଣାରେ ଖଲର୍ଦ୍ଦା ଅଞ୍ଚଳରେ ଶୋକ ପ୍ରକାଶ ପାଇଛି । ଯୁଧିଷ୍ଠିର ରାଉତରାୟ ଫାଉଣ୍ଡେସନ କର୍ମକର୍ତ୍ତା ମର ଶରୀରରେ ପୁଷ୍ପମାଲ୍ୟ ଅର୍ପଣ କରିଥିଲେ । ସେହିପରି ଉଷୁମା ପଞ୍ଚାୟତ ଅନ୍ତର୍ଗତ ମୂଳକୋଦିଣ୍ଡା ଗ୍ରାମ ମଲିକସାହିର ଚାଷୀ ବୁଲୁ ମଲିକଙ୍କ ସର୍ପାଘାତରେ ମୃତୁ୍ୟ ହୋଇଛି । ସେ ବିଲରୁ କାମ ସାରି ଘରକୁ ଫେରୁଥିଲାବେଳେ ଏକ ବିଷଧର ସାପ ତାଙ୍କୁ କାମୁଡ଼ିଥିଲା । ଦୁଇ ଦିନ ଚିକିତ୍ସା ହେବାପରେ ଡାକ୍ତରଖାନାରେ ତାଙ୍କର ମୃତୁ୍ୟ ହୋଇଛି ।
