କେନ୍ଦ୍ରାପଡା ସାଂସଦ ଅନୁଭବ ମହାନ୍ତିଙ୍କୁ ଉଦ୍ଧାର କରିବା ପାଇଁ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କୁ କେନ୍ଦ୍ରାପଡ଼ା ଜନସାଧାରଣଙ୍କ ଅନୁରୋଧ

ଶ୍ରୀ ବୈଜୟନ୍ତ ପଣ୍ଡା କେନ୍ଦ୍ରାପଡା ସାଂସଦ ଥିବା ସମୟରେ ବନ୍ୟା, ବାତ୍ଯାଠୁ ଆରମ୍ଭ କରି ଘରପୋଡି ଭଳି ଦୈବ ଦୁର୍ବିପାକ ଭଳି ପରିସ୍ଥିତିରେ ଅଥବା ବିବାହ, ବ୍ରତ ଭଳି ଖୁସି ସମୟରେ ମଧ୍ୟ ସର୍ବଦା କେନ୍ଦ୍ରାପଡା ଲୋକଙ୍କ ସହ ରହିଥିଲେ ଓ ଏବେ ସେ ସାଂସଦ ନଥାଇ ମଧ୍ୟ ପୂର୍ବ ଭଳି ଲୋକଙ୍କ ସୁଖଦୁଃଖରେ ଠିଆ ହେଉଛନ୍ତି ।

ବର୍ତ୍ତମାନ ସମୟରେ ସମଗ୍ର ବିଶ୍ବ କରୋନା ମହାମାରୀ ଦ୍ୱାରା ଆକ୍ରାନ୍ତ, ଏହି ସମୟରେ ବୈଜୟନ୍ତ ପଣ୍ଡା ନିଜ ଅଫିସ୍ ଓ ବିଜେପି କାର୍ଯ୍ୟକର୍ତ୍ତାଙ୍କ ମାଧ୍ୟମରେ କେନ୍ଦ୍ରାପଡାର ବିଭିନ୍ନ ସ୍ଥାନରେ ରନ୍ଧା ଖାଦ୍ୟ, ସୁଖିଲା ଖାଦ୍ୟ, ମାସ୍କ, ସାନିଟାଇଜର ଇତ୍ୟାଦି ବଣ୍ଟନ କରୁଛନ୍ତି ଓ ବିଦେଶ ତଥା ଅନ୍ୟ ରାଜ୍ୟରେ ଫସିଥିବା ପ୍ରବାସୀ ଓଡ଼ିଆଙ୍କୁ ସହାୟତା ଦେବା ସହ ସେମାନଙ୍କୁ ଓଡିଶା ଫେରାଇଆଣିବାରେ ମଧ୍ୟ ସହାୟତା କରୁଛନ୍ତି କିନ୍ତୁ ଠିକ୍ ଏହି  ସମୟରେ ଲୋକେ ଦେଖା ପାଉନାହାନ୍ତି ବର୍ତ୍ତମାନର ନିର୍ବାଚିତ ସାଂସଦଙ୍କର । ଏନେଇ ସାମାଜିକ ଗଣମାଧ୍ୟମରେ କିଛି ଦିନ ହେବ ଚର୍ଚ୍ଚା ଯୋର ଧରିଛି । କିନ୍ତୁ ଆଜି ଯେତେବେଳେ ଆଉ ଏକ ବିପତ୍ତି ରୂପରେ ମହାବାତ୍ୟା ଅମ୍ଫାନ ଓଡିଶା ଉପରକୁ ମାଡି ଆସିଛି, ଯେଉଁଥିରେକି କେନ୍ଦ୍ରାପଡା ବିଶେଷ ଭାବରେ ପ୍ରଭାବିତ ହୋଇଛି ।

ଏହି ବାତ୍ୟା ଖବର ପାଇଲା ପରଠାରୁ ଶ୍ରୀ ପଣ୍ଡା ବିଜେପି କର୍ମୀଙ୍କ ମାଧ୍ୟମରେ ବିଭିନ୍ନ ସ୍ଥାନରେ ଖାଦ୍ୟ ସାମଗ୍ରୀ ଓ ଆବଶ୍ୟକୀୟ ଉପକରଣ ମହଜୁଦ କରାଇଛନ୍ତି ଓ କ୍ରମାଗତ ଭାବରେ କେନ୍ଦ୍ର ଓ ରାଜ୍ୟ ନେତୃତ୍ଵରେ ଯୋଗାଯୋଗରେ ରହି ଘଟଣାକ୍ରମ ଉପରେ ନଜର ରଖିଛନ୍ତି । କିନ୍ତୁ ସୂଚନାଯୋଗ୍ୟ ଯେ ଏହି ସମୟରେ କେନ୍ଦ୍ରାପଡା ସାଂସଦ ଦିଲ୍ଲୀର ଅଛନ୍ତି, ଏହି ଖବର ପ୍ରାୟତଃ ସମସ୍ତଙ୍କ ପାଖରେ ଅଛି ଏବଂ ଏନେଇ ନିଜେ ଅନୁଭବ ସାମାଜିକ ଗଣମାଧ୍ୟମରେ ମଧ୍ୟ ସ୍ପଷ୍ଟ କରିଛନ୍ତି ।

ଆଜି ସାମାଜିକ ଗଣମାଧ୍ୟମ ଟୁଇଟର ଓ ଫେସବୁକରେ କେନ୍ଦ୍ରାପଡା ଜିଲ୍ଲାର ବିଭିନ୍ନ ଲୋକ ଶ୍ରୀ ପଣ୍ଡାଙ୍କୁ ଅନୁରୋଧ କରିଛନ୍ତି ଯେ ବୈଜୟନ୍ତ ପଣ୍ଡା ଯେଉଁଭଳି ଅନ୍ୟ ରାଜ୍ୟ ଓ ଦେଶରୁ ଭାରତୀୟଙ୍କୁ ଉଦ୍ଧାର କରୁଛନ୍ତି ସେହିଭଳି ଦିଲ୍ଲୀରେ ଫସିଯାଇଥିବ କେନ୍ଦ୍ରାପଡା ସାଂସଦ ଅନୁଭବ ମହାନ୍ତିଙ୍କୁ ରାଜନୀତିରୁ ଉର୍ଦ୍ଧରେ ରହି ଦୟାକରି ଉଦ୍ଧାର କରି ଆଣନ୍ତୁ ।