ଧାମନଗର: (Basudev Tripathy) ସାରା ବିଶ୍ୱ କରୋନା କବଳରେ ଛନ୍ଦି ହୋଇଥିବା ବେଳେ ଭାରତ ୧୩୦କୋଟିରୁ ଉଦ୍ଧ୍ୱର୍ ଜନସାଧାରଣଙ୍କୁ ସୁସ୍ଥ ରଖିବା ପାଇଁ ସରକାର ଅହରହ ଚେଷ୍ଟା ଚଳାଇଛନ୍ତି । ଏହି ଘଡିସନ୍ଧି ମୁହୂର୍ତ୍ତରେ ଲୋକଙ୍କୁ ସଚେତନ କରିବା, ଅତ୍ୟାବଶ୍ୟକ ସେବା ଯୋଗାଇଦେବା ସର୍ବୋପରି ଲୋକଙ୍କ ଜୀବନ ଓ ଜୀବିକାକୁ ସୁନିଶ୍ଚିତ କରିବା ପାଇଁ ପ୍ରଶାସନ, ପୋଲିସ ଓ ସ୍ୱାସ୍ଥ୍ୟ ବିଭାଗ ଭଳି ବିଭିନ୍ନ ଜରୁରୀ ସେବା ସଂସ୍ଥା ଲାଗି ପଡିଛନ୍ତି ।
ସାମ୍ବାଦିକ ମାନେ ଜାଗ୍ରତ ପ୍ରହରୀ ଭାବେ ଦିନରାତି କାମ କରୁଛନ୍ତି । କରୋନା ଯୁଦ୍ଧରେ ସୈନିକ ସାଜିଥିବା ପୋଲିସ ଓ ପ୍ରେସ ବନ୍ଧୁ ମାନଙ୍କୁ ଧାମନଗରର ପୂର୍ବତନ ବିଧାୟକ ରାଜେନ୍ଦ୍ର କୁମାର ଦାସ ଆଜି ଧାମନଗର ଠାରେ ସମ୍ବର୍ଦ୍ଧିତ କରିଛନ୍ତି । ମଙ୍ଗଳବାର ପୂର୍ବାହ୍ନରେ ଧାମନଗର ଥାନା ପରିସରରେ ପ୍ରାକ୍ତନ ବିଧାୟକ ଶ୍ରୀ ଦାସ ଧାମନଗର ଏସଡିପିଓ ମନୋରଂଜନ ସାମଲ ଓ ଆଇ ଆଇ ସି ରତିକାନ୍ତ ଗିରିଙ୍କ ସମେତ ଥାନାରେ କାର୍ଯ୍ୟରତ କର୍ମଚାରୀ ମାନଙ୍କୁ ମାକ୍ସ, ସାନିଟାଇଜର ଓ ଉତ୍ତରୀୟ ଦେଇ ସମ୍ବର୍ଦ୍ଧିତ କରିଥିଲେ ।
ସେହିପରି ଧାମନଗର ଅଞ୍ଚଳର କାର୍ଯ୍ୟରତ କେତେକ ସାମ୍ବାଦିକଙ୍କୁ ସ୍ଥାନୀୟ ପୂର୍ତ୍ତବିଭାଗ ଡାକବଙ୍ଗଳା ପରିସରରେ ଶ୍ରୀ ଦାସ ସମ୍ବର୍ଦ୍ଧିତ କରିଥିବା ଜଣାଯାଇଛି । ଏହି କାର୍ଯ୍ୟକ୍ରମରେ ଶ୍ରୀ ଦାସଙ୍କ ସହିତ ଧାମନଗର ବ୍ଲକ ଓ ନଗର ବିଜେଡି ସଭାପତି ପ୍ରମୁଖ ଉପସ୍ଥିତ ଥିଲେ ।
