କୋରେଇ ୦୯ା୦୫ : କୋରେଇ ଥାନା ଅନ୍ତର୍ଗତ ବନ୍ଦାଳ ପଂଚାୟତ ଦୁଲାଖାପାଟାଣା ଗ୍ରାମରେ ଶୁକ୍ରବାର ବିଲମ୍ବବିତ ରାତିରେ ବଜ୍ରପାତରେ ୨ ବଖରା ଘର ପୋଡ଼ି ଯାଇଛି । ପ୍ରକାଶ ଯେ ଶୁକ୍ରବାର ରାତି ୧୧ଟା ୩୦ ମିନିଟ୍ରେ ଜୋରରେ ବର୍ଷା ପବନ ସାଙ୍ଗକୁ ବଜ୍ରପାତ ହୋଇଥିଲା । ଫଳରେ ଦୁଲାଖାପାଟଣା ଗ୍ରାମର ବାବନ ସାହୁଙ୍କ ଘରେ ବଜ୍ରପାତରେ ନିଆଁ ଲାଗିଯାଇଥିଲା । ଘରେ ନିଆଁ ଲାଗି ଯାଇଥିବା ଦେଖି କେହି ବାବନଙ୍କ ପରିବାରକୁ ଡ଼ାକିବା ସହ ଗ୍ରାମବାସୀଙ୍କୁ ମଧ୍ୟ ଡ଼ାକ ପକାଇଥିଲା । ଗ୍ରାମବାସୀ ମାନେ ଘଟଣା ସ୍ଥଳରେ ପହଁଚି ନିଆଁକୁ ଆୟତ କରିବା ସହ ବୈତରଣୀରୋଡ ଦମକଳ କେନ୍ଦ୍ରକୁ ଖବର ଦେଇଥିଲେ । ଖବର ପାଇ ବୈତରଣୀ ରୋଡ ଦମକଳ ବାହିନୀ ଘଟଣା ସ୍ଥଳରେ ପହଁଚିବା ପୂର୍ବରୁ ଗ୍ରାମବାସୀ ମାନେ ନିଆଁକୁ ଆୟତ କରିସାରିଥିଲେ । ବିପନ୍ନ ଜଣକ ଜଣେ ଅତି ଗରିବ ଶ୍ରେଣୀର ହୋଇଥିବାରୁ ତାଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ସରପଂଚ ସୁରେଖା ସେଠୀ ଦାବି କରିଛନ୍ତି । ଖବର ପାଇ ଆଜି ରଣପାଳ ରାଜସ୍ୱନିରିକ୍ଷକ ବସନ୍ତ କୁମାର ଦେଉରୀ ଦୁଲାଖାପାଟଣା ଗ୍ରାମରେ ପହଁଚି ବିପନ୍ନଙ୍କୁ କେବଳ ପଲିଥିନ ଦେଇଥିବା ଜଣାପଡ଼ିଛି ।
