କେନ୍ଦୁଝର : କେନ୍ଦୁଝର ଜିଲ୍ଲା ହରିଚନ୍ଦନପୁରରେ ଆଜି ବିଜେଡିର ଜନସମ୍ପର୍କ ପଦଯାତ୍ରା ଅନୁଷ୍ଠିତ ହୋଇଛି। ଦଳୀୟ କର୍ମୀମାନେ ପଦଯାତ୍ରାରେ ମନୋହରପୁରରୁ ବାହାରି ହରିଚନ୍ଦନପୁର ତହସିଲ କାର୍ଯ୍ୟାଳୟ ସମ୍ମୁଖକୁ ଆସିଥିଲେ | ବ୍ଲକ୍ ବିଜେଡି ସଭାପତି ପାଦାମ୍ବୁଜ ସାହୁଙ୍କ ସଭାପତିତ୍ବରେ ଘସିପୁରା ବିଧାୟକ ବଦ୍ରିନାରାୟଣ ପାତ୍ର ମୁଖ୍ୟଅତିଥି ଭାବେ ଯୋଗଦେଇ ପଞ୍ଚାୟତ ନିର୍ବାଚନରେ ଶକ୍ତି ପ୍ରଦର୍ଶନ କରିବାକୁ ଦଳୀୟ କର୍ମୀଙ୍କୁ ଆହ୍ବାନ ଦେଇଥିଲେ। ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ, ପୂର୍ବତନ ବିଧାୟକ ଧନୁର୍ଜୟ ସିଦୁ ଓ ଜିଲ୍ଲାପରିଷଦ ସଭ୍ୟ ଆଶିଷ ଚକ୍ରବର୍ତ୍ତୀ ସମ୍ମାନିତ ଅତିଥିଭାବେ ଯୋଗଦେଇଥିଲେ । ଭତ୍ତା ବୃଦ୍ଧି, ତିନିଶହ ୟୁନିଟ୍ ମାଗଣା ବିଦ୍ୟୁତ୍ ଦିଆଯିବ କହି ବିଜେପି ଭୋଟ ହାତେଇଲା | ସରକାର ଗଠନକୁ ୪ ମାସ ହେଲାଣି, ଏସବୁ ଯୋଜନା ଗଲା କୁଆଡ଼େ ବୋଲି ପ୍ରଶ୍ନ କରିଥିଲେ। ଏବେ ବି ଲୋକେ ନବୀନ ପଟ୍ଟନାୟକଙ୍କୁ ଭଲ ପାଉଛନ୍ତି। ପୁଣି ବିଜୁ ଜନତା ଦଳର ସରକାର ହେବ ବୋଲି ଅତିଥିମାନେ ଦୃଢୋକ୍ତି ପ୍ରକାଶ କରିଥିଲେ। ଅନ୍ୟମାନଙ୍କ ମଧ୍ୟରେ ଜିଲ୍ଲାପରିଷଦ ଅଧ୍ୟକ୍ଷା ସାଗରିକା ସାହୁ, ବ୍ଲକ୍ ଅଧ୍ୟକ୍ଷା ସୁନେଲି ନାଏକ, ବ୍ଲକ୍ ଉପାଧ୍ୟକ୍ଷ ବିଜୟ କୁମାର ସାହୁ, ଜିଲ୍ଲାପରିଷଦ ସଭ୍ୟ ଲକ୍ଷ୍ମୀଧର କିଷାନ, ମାଇନ ସୋରେନ, ରାଜ୍ୟ ଯୁବ ବିଜେଡି ସହସଂପାଦକ ଅମର କୁଅଁର ଉପସ୍ଥିତ ଥିଲେ। ବ୍ଲକ୍ ଯୁବ ବିଜେଡି ସଭାପତି ଉତ୍ତମ କୁମାର ବିଶ୍ବାଳ, ଛାତ୍ର ବିଜେଡି ସଭାପତି ଦୀପକ କୁମାର ସାହୁ, ସୁନୀତା ପ୍ରଧାନ, ଜିଲ୍ଲା ବିଜେଡି ଉପସଭାପତି ନିରଞ୍ଜନ ଦାସ, ସ୍ବତନ୍ତ୍ର ଉନ୍ନୟନ ପରିଷଦ ଉପାଧ୍ୟକ୍ଷ ନାରଣ ପୂର୍ତ୍ତି , ଲ୍ୟାମ୍ପସ ସଭାପତି ଦ୍ରୋଣ ନାଏକଙ୍କ ସମେତ ନିର୍ବାଚିତ ଜନପ୍ରତିନିଧିମାନେ ପଦଯାତ୍ରାରେ ସାମିଲ ହୋଇଥିଲେ।
