ପାରାଦୀପ,୧୮ା୭(): ଆଇଓସିଏଲ ୨୨ ଦିନ ସଟ୍ଡାଉନ ହେବ । କାରଖାନାରେ ମରାମତି କାର୍ଯ୍ୟ ଥିବାରୁ ଜୁଲାଇ ୨୫ରୁ ଅଗଷ୍ଟ ୧୫ ପର୍ଯ୍ୟନ୍ତ ଏହାର ସମସ୍ତ କାମକୁ ବନ୍ଦ କରାଯିବ । ଏହି ମରାମତି କାର୍ଯ୍ୟ କରିବା ପାଇଁ ଏକ ବିଶେଷଜ୍ଞ ଟିମ୍ କାର୍ଯ୍ୟ କରିବେ । ସେମାନଙ୍କୁ ସହଯୋଗ କରିବା ପାଇଁ ଏହି ସମୟରେ କାରଖାନାରେ ସ୍ଥାନୀୟ ଅଂଚଳର ୭୦୦-୮୦୦ ଲୋକ କାର୍ଯ୍ୟ କରିବେ । ସେଥିପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ବନେ୍ଦାବସ୍ତ କରାଯାଇଛି ବୋଲି ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ସୂଚନା ପ୍ରଦାନ କରିଛନ୍ତି ।
୨୦୧୮ ମାର୍ଚ୍ଚ ପରଠାରୁ ଆଇଓସିଏଲର ମରାମତି କାର୍ଯ୍ୟ ହୋଇନାହିଁ । ଏଣୁ ବର୍ତମାନ ସମୟରେ କମ୍ପାନିର ମରାମତି ନିହାତି ଜରୁରୀ ଥିଲା । ଯେହେତୁ ସ୍ଥାନୀୟ ଅଂଚଳର ଏତେ ସଂଖ୍ୟାରେ ଲୋକ କାମ କରିବେ, ସେଥିପାଇଁ ଗହଳ ଚହଳ ହେବାର ସମ୍ଭାବନା ରହିଛି । ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପକ୍ଷରୁ ଆଇଓସିଏଲ ନିକଟରେ ୧୪୪ ଧାରା ଜାରି କରାଯାଇଛି । ଆଇଓସିଏଲ ପାଖାପାଖି କୌଣସି ଦୋକାନ ବଜାର ଖୋଲିବ ନାହିଁ । ଏହାସହ ମରାମତି କାର୍ଯ୍ୟ କରୁଥିବା ସମସ୍ତଙ୍କୁ ମାସ୍କ, ଗ୍ଲୋଭସ୍ ଓ ସାନିଟାଇଜର ଯୋଗାଇ ଦିଆଯିବ । ଏଣୁ ଏହି ମରାମତି କାର୍ଯ୍ୟ ସମୟରେ ସମସ୍ତେ ସହଯୋଗ କରିବାକୁ ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ନିବେଦନ କରିଛନ୍ତି ।
