Odisha news

ରିଲାଏନ୍ସ ରିଟେଲ୍ ପକ୍ଷରୁ ଡଞ୍ଜୋରେ ୨୦ କୋଟି ଡଲାରର ନିବେଶ

0

ଭୁବନେଶ୍ୱର: ଜଣାଶୁଣା ଉଦ୍ୟୋଗପତି ମୁକେଶ ଅମ୍ବାନିଙ୍କ କଂପାନି ରିଲାଏନ୍ସ ରିଟେଲ୍ ପକ୍ଷରୁ ଭାରତର ପ୍ରମୁଖ କ୍ୱିକ୍ କମର୍ସ କଂପାନି ଡଞ୍ଜୋରେ ୨୦ କୋଟି ଡଲାର ନିବେଶ କରାଯାଇଥିବା ବିଷୟରେ ଘୋଷଣା କରାଯାଇଛି । ଏହି ନିବେଶ ଦ୍ୱାରା ରିଟେଲ୍ କ୍ଷେତ୍ରରେ ରିଲାଏନ୍ସ ରିଟେଲ୍‌ର ସ୍ଥିତି ଆହୁରି ଦୃଢ଼ ହେବ । ଏହି ନିବେଶ ଜରିଆରେ ଡଞ୍ଜୋର ୨୫.୮ ପ୍ରତିଶତ ଅଂଶଧନର ମାଲିକାନା ହାସଲ କରିଛି ରିଲାଏନ୍ସ ରିଟେଲ୍ । ଡଞ୍ଜୋକୁ ବିଭିନ୍ନ ସଂସ୍ଥାରୁ ମୋଟ ୨୪ କୋଟି ଡଲାରର ନିବେଶ ରାଶି ମିଳିଛି ।

ହାସଲ କରିଥିବା ପାଣ୍ଠିକୁ ବ୍ୟବହାର କରି ଡଞ୍ଜୋ ପକ୍ଷରୁ ଛୋଟ ଆକୃତିର ଗୋଦାମଗୁଡ଼ିକୁ ନେଇ ଏକ ନେଟୱର୍କ ବିକଶିତ କରାଯିବ ଯେଉଁଥିରେ ତତ୍କାଳ ଡେଲିଭରି ପାଇଁ ସାମଗ୍ରୀଗୁଡ଼ିକୁ ରଖାଯିବ । ଏହା ସହିତ ବିି୨ବି ନେଟୱର୍କର ସମ୍ପ୍ରସାରଣ କରିବା ଉପରେ ମଧ୍ୟ କଂପାନି ଗୁରୁତ୍ୱ ଦେବ । କଂପାନିର ସେବା ଏହବ ୭ଟି ମେଟ୍ରୋ ସହରରେ ଉପଲବ୍ଧ ହେଉଛି ଯାହା ଖୁବଶୀଘ୍ର ୧୫ଟି ସହରକୁ ସମ୍ପ୍ରସାରିତ କରାଯିବ । କ୍ୱିକ୍ କମର୍ସ କ୍ଷେତ୍ରର ଆକାର ୫୦ ବିଲିଅନ ଆମେରିକୀୟ ଡଲାର ହୋଇଥିବା ବେଳେ ଡଞ୍ଜୋ ହେଉଛି ସେହି ବଜାରର ଅଗ୍ରଣୀ ସଂସ୍ଥା । ନିକଟରେ କଂପାନି ବାଙ୍ଗାଲୋରରେ ଏହାର ସେବା ଆରମ୍ଭ କରିଥିଲା । ୧୫-୨୦ ମିନିଟ୍ ଭିତରେ ଫଳ ଓ ପନିପରିବା ହୋମ୍ ଡେଲିଭରି କରିବା ଉପରେ କଂପାନି ଗୁରୁତ୍ୱାରୋପ କରୁଛି ।

ପାଣ୍ଠି ପ୍ରଦାନ ବ୍ୟତୀତ ଡଞ୍ଜୋ ଓ ରିଲାଏନ୍ସ ପରସ୍ପର ସହିତ ଆଉ କିଛି ବ୍ୟାବସାୟିକ ବୁଝାମଣା ମଧ୍ୟ କରିବେ । ରିଲାଏନ୍ସ ରିଟେଲ୍ ଦ୍ୱାରା ପରିଚାଳିତ ହେଉଥିବା ରିଟେଲ୍ ଷ୍ଟୋର୍ ପାଇଁ ଡଞ୍ଜୋ ପକ୍ଷରୁ ହାଇପର ଲୋକାଲ ଲଜିଷ୍ଟିକ୍ସ ସୁବିଧା ପ୍ରଦାନ କରାଯିବ ଏବଂ ଏହା ସହିତ ଜିଓ ମାର୍ଟର ମର୍ଚାଂଟ୍ ନେଟୱର୍କ ପାଇଁ ଦୂରଦୂରାନ୍ତ ବା ଶେଷ ଦୂରତା ପର୍ଯ୍ୟନ୍ତ ଡେଲିଭରି ସୁବିଧା ପ୍ରଦାନ କରାଯିବ ।

ଏହି ନିବେଶ ବିଷୟରେ ରିଲାଏନ୍ସ ରିଟେଲ୍‌ର ନିର୍ଦେଶିକା ଇଶା ଅମ୍ବାନି କହିଛନ୍ତି ଯେ, “ଅନଲାଇନ୍ ଉପଯୋଗିତା କ୍ଷେତ୍ରରେ ପରିବର୍ତନ ହେଉଥିବା ଆମେ ଦେଖିପାରୁଛୁ ଏବଂ ଏହି କ୍ଷେତ୍ରରେ ଡଞ୍ଜୋ ଅତ୍ୟନ୍ତ ପ୍ରଭାବିତ କରିଛି । ଡଞ୍ଜୋ ସହିତ ହୋଇଥିବା ବୁଝାମଣା ଜରିଆରେ ଆମେ ରିଲାଏନ୍ସ ରିଟେଲ୍ ଉପଭୋକ୍ତାମାନଙ୍କୁ ଅଧିକ ସୁବିଧା ଦେଇପାରିବୁ ଏବଂ ରିଲାଏନ୍ସ ରିଟେଲ୍ ଷ୍ଟୋର୍‌ଗୁଡ଼ିକରୁ ଉତ୍ପାଦକୁ ଦ୍ରୁତ ଗତିରେ ଡେଲିଭରି ଦେଇ ଗ୍ରାହକଙ୍କୁ ନୂଆ ଅନୁଭୂତି ପ୍ରଦାନ କରିବ । ଆମ ସହିତ ଯୋଡ଼ି ହୋଇଥିବା ବ୍ୟବସାୟୀମାନଙ୍କୁ ମଧ୍ୟ ଡଞ୍ଜୋର ହାଇପର୍ ଲୋହାଲ୍ ଡେଲିଭରି ନେଟ୍‌ୱର୍କର ଲାଭ ମିଳିବ ।’’

ଡଞ୍ଜୋର ସିଇଓ ଓ ସହ ପ୍ରତିଷ୍ଠାତା କବୀର ବିଶ୍ୱାସ କହିଛନ୍ତି ଯେ, “ଆମର ପ୍ରତିଷ୍ଠା ହେବା ପରଠାରୁ ଗ୍ରାହକମାନଙ୍କୁ ଏକ ଉତ୍କୃଷ୍ଟ ଅନୁଭବ ପ୍ରଦାନ କରିବା ଲାଗି ଆମେ ଉଦ୍ୟମ କରୁଅଛୁ ଏବଂ ଏହି ପାଣ୍ଠି ହାସଲ ପର୍ଯ୍ୟାୟ ବା ଫଣ୍ଡିଂ ରାଉଣ୍ଡ୍ ଆମର ଦୃଷ୍ଟିକୋଣ ପ୍ରତି ଏକ ସୁନ୍ଦର ମାନ୍ୟତା । ରିଲାଏନ୍ସ ରିଟେଲ୍‌ର ଏହି ନିବେଶ ସହିତ ଆମ ପାଖରେ ଏକ ଦୀର୍ଘମିଆଦୀ ବୁଝାମଣା ରହିବ ଯାହା ସହିତ ଆମେ ଦ୍ରୁତ ଗତିରେ ଅଭିବୃଦ୍ଧି ହାସଲ କରିପାରିବୁ ।’’

Leave A Reply

Your email address will not be published.