. ସୁସ୍ୱାଦୁ ଓଡିଆ ଖାଦ୍ୟ ପ୍ରସ୍ତୁତ କରିବା ସହିତ ଏହାର ରନ୍ଧନ ପ୍ରଣାଳୀ ସେୟାର କରିଛନ୍ତି ।
. ୩୦ ଜଣ ଉତ୍ସାହୀ ବ୍ୟକ୍ତି ତାଙ୍କ ମାଷ୍ଟରକ୍ଲାସ୍ରେ ଅଂଶଗ୍ରହଣ କରିଥିଲେ, ଯାହା ସମ୍ପୂର୍ଣ୍ଣ ମାଗଣା ଥିଲା ।
ଭୁବନେଶ୍ୱର, ୨୪ ଜାନୁଆରୀ ୨୦୨୩: ଭୁବନେଶ୍ୱରରେ ଆୟୋଜିତ ଡଟ୍ ଫେଷ୍ଟ୍ ମହୋତ୍ସବରେ ମାଷ୍ଟରସେଫ୍ ଇଣ୍ଡିଆ ସିଜନ-୬ର ଫାଇନାଲିଷ୍ଟ ସ୍ମୃତିଶ୍ରୀ ରାଜ୍ୟବାସୀଙ୍କ ସମ୍ମୁଖରେ ନିଜ ଅନନ୍ୟ ରୋଷେଇ କଳାର ପ୍ରଦର୍ଶନ କରିଛନ୍ତି ଯାହା ଡଟ୍ ଫେଷ୍ଟ୍ରେ ଉପସ୍ଥିତ ଲୋକଙ୍କ ପାଇଁ ଏକ ସ୍ୱାଦିଷ୍ଟ ବ୍ୟାପାର ଥିଲା । ୩୦ ଜଣ ଖାଦ୍ୟପ୍ରେମୀ ତାଙ୍କ ମାଷ୍ଟରକ୍ଲାସ୍ରେ ଅଂଶଗ୍ରହଣ କରିଥିଲେ ଯେଉଁଠାରେ ସେମାନେ ସ୍ମୃତିଶ୍ରୀଙ୍କ ଦ୍ୱାରା ପ୍ରସ୍ତୁତ କିଛି ସ୍ୱାଦିଷ୍ଟ ଓଡିଆ ଖାଦ୍ୟ ଶିଖିବାକୁ ପାଇଥିଲେ । ଏହି ୩୦ ଜଣ ବିଜେତାଙ୍କୁ ମାଷ୍ଟରକ୍ଲାସ୍ରେ ଅଂଶଗ୍ରହଣ କରିବା ପାଇଁ ଚୟନ କରାଯାଇଥିଲା ଯାହା ସମ୍ପୂର୍ଣ୍ଣ ମାଗଣା ଥିଲା । ସେହିପରି ସ୍ମୃତିଶ୍ରୀ ନିଜ ଇନ୍ଷ୍ଟାଗ୍ରାମ୍ ହ୍ୟାଣ୍ଡେଲରେ ଡଟ୍ ଫେଷ୍ଟ୍ରେ ତାଙ୍କୁ ମିଳିଥିବା ଏହି ସୁଯୋଗ ସମ୍ପର୍କରେ ଏକ ରିଲ୍ ସେୟାର କରିଥିଲେ ଏବଂ ଲୋକମାନଙ୍କୁ ଏଥିରେ ନିଜ ପରିବାର ଓ ବନ୍ଧୁଙ୍କୁ ଟ୍ୟାଗ୍ କରିବାକୁ ଅନୁରୋଧ କରିଥିଲେ ।
ଏହି ଅବସରରେ ସ୍ମୃତିଶ୍ରୀ କହିଥିଲେ, ‘ମୁଁ ଏହି ମହୋତ୍ସବର ଅଂଶ ହୋଇ ଉତ୍ସାହିତ ଓ ରୋମାଂଚିତ ଅନୁଭବ କରୁଛି । ଏହା ଓଡିଶା ପାଇଁ ଏକ ଐତିହାସିକ ମୁହୂର୍ତ କାରଣ ଏହା ଏଫ୍ଆଇଏଚ୍ ପୁରୁଷ ହକି ବିଶ୍ୱକପ୍ର ଆୟୋଜନ କରୁଛି । ଏହି ସ୍ମରଣୀୟ ଅବସରରେ ମୋତେ ଡଟ୍ ଫେଷ୍ଟ୍ର ଏକ ଅଂଶ ହେବା ପାଇଁ ସୁଯୋଗ ଦିଆଯାଇଥିଲା । ଏଥିପାଇଁ ମୁଁ ଓଡିଶା ସରକାରଙ୍କୁ ଧନ୍ୟବାଦ ଓ କୃତଜ୍ଞତା ଜଣାଉଛି ।’
ଡଟ୍ ଫେଷ୍ଟରେ ସ୍ମୃତିଶ୍ରୀ ପ୍ରତ୍ୟେକ ଓଡିଆଙ୍କ ପସନ୍ଦର ଖାଦ୍ୟ କାକରା ପିଠା ପ୍ରସ୍ତୁତ କରିଥିଲେ, ଯାହାକି ପ୍ରଭୁ ଜଗନ୍ନାଥଙ୍କ ପରମ୍ପରାର ମଧ୍ୟ ଏକ ଅଂଶ ଅଟେ । ସ୍ମୃତିଶ୍ରୀ ହୋଟେଲ୍ ମ୍ୟାନେଜ୍ମେଂଟ୍ରେ ସ୍ନାତକ କରିଛନ୍ତି । ମାଷ୍ଟରସେଫ୍ ଇଣ୍ଡିଆ ସିଜନ ୬ରେ ଅଂଶଗ୍ରହଣ କରି ଓ ଫାଇନାଲିଷ୍ଟ ହୋଇ ସେ ଘରେ ଘରେ ପରିଚିତ ହୋଇପାରିଛନ୍ତି । ଏହି କାର୍ଯ୍ୟକ୍ରମରେ ନିଜର ପ୍ରଦର୍ଶନ ମାଧ୍ୟମରେ ସେ ବିଚାରପତି ଓ ଲୋକମାନଙ୍କଠାରୁ ବହୁ ପ୍ରଶଂସା ଜିତି ପାରିଥିଲେ ।
