ଗୋଟିଏ ଯୁଗର ଗୁଞ୍ଜରଣ : ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ଅଧିବେଶନରେ ଯୋଗ ଦେଲେ ଡ୍ରିମ ଗାର୍ଲ
ସ୍ମରଣୀୟ ଚଳଚିତ୍ର ଓ ଚିର ସବୁଜ ନୃତ୍ୟକଳା ସମ୍ପର୍କିତ ଆଲୋଚନା ହେମାଙ୍କ ମୁହଁରେ ତାଙ୍କ କାଳଜୟୀ କଳାକୃତି ଚର୍ଚ୍ଚା
ଏହି ଆଲୋଚନାଚକ୍ରରେ ହେମା ସିନେ ଇଣ୍ଡଷ୍ଟ୍ରୀରେ ତାଙ୍କର ପ୍ରାରମ୍ଭିକ ଦିନଗୁଡ଼ିକଠାରୁ ଆରମ୍ଭ କରି ବଲିଉଡ୍ ସୁବର୍ଣ୍ଣ ଯୁଗକୁ ଦିଶା ପ୍ରଦାନ କରିଥିବା ବେଶ୍ କେତୋଟି ଚଳଚ୍ଚିତ୍ରରେ ତାଙ୍କର ପ୍ରାତଃସ୍ମରଣୀୟ ଭୂମିକା ପର୍ଯ୍ୟନ୍ତ ତା’ର ପ୍ରତିଫଳନ, ଚଳଚ୍ଚିତ୍ରର କାହାଣୀ ଏବଂ କଳାତ୍ମକ ଜ୍ଞାନ ସମ୍ପର୍କରେ ଆଲୋଚନା କରି ଦର୍ଶକଙ୍କୁ ବାନ୍ଧି ରଖିଥିଲେ । କାର୍ଯ୍ୟକ୍ରମରେ ବହୁ ସଂଖ୍ୟାରେ ବିଦ୍ୟାର୍ଥୀ, ଅଧ୍ୟାପକ-ଅଧ୍ୟାପିକା ଏବଂ କଳାପ୍ରେମୀ ଏକାଠି ହୋଇ ଏହି କିମ୍ବଦନ୍ତୀ ତାରକାଙ୍କଠାରୁ ଭାରତୀୟ ସିନେମା ଏବଂ ଶାସ୍ତ୍ରୀୟ ନୃତ୍ୟ କ୍ଷେତ୍ରରେ ତାଙ୍କର ଚମତ୍କାର କ୍ୟାରିଅର ବିଷୟରେ ତାଙ୍କରି ମୁହଁରୁ ଶୁଣିବା ପାଇଁ ଏକାଠି ହୋଇଥିଲେ ।
ଏହି ଅବସରରେ ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ପକ୍ଷରୁ କୁଳପତି ପ୍ରଫେସର ଡ. ତେଜପ୍ରତାପ ହେମା ମାଳିନୀଙ୍କୁ ଭାରତୀୟ ସିନେମା ଏବଂ ଅଭିନୟ କଳା ପ୍ରତି ତାଙ୍କର ଅମୂଲ୍ୟ ଅବଦାନ ପାଇଁ ସମ୍ବର୍ଦ୍ଧିତ କରିଥିଲେ । ଅନ୍ୟମାନଙ୍କ ମଧ୍ୟରେ ବିଶ୍ୱବିଦ୍ୟାଳୟର କାର୍ମିକ ନିର୍ଦ୍ଦେଶକ ସ୍ୱାମୀ ସତ୍ୟଚୈତନ୍ୟ, କୁଳସଚିବ ଅନିଲ କୁମାର ଶର୍ମା, କଳା, ଯୋଗାଯୋଗ ଓ ଭାରତୀୟ ଶିକ୍ଷା ବିଭାଗର ଡିନ୍ ତଥା ବିଭାଗୀୟ ମୁଖ୍ୟ ଗୁରୁ ରତିକାନ୍ତ ମହାପାତ୍ର ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତ ଥିଲେ । ଏହି ସମଗ୍ର କାର୍ଯ୍ୟକ୍ରମ କଳାରେ ସୃଜନଶୀଳତା ଏବଂ ଉତ୍କର୍ଷତାକୁ ପ୍ରୋତ୍ସାହିତ କରିବା ପାଇଁ ଶ୍ରୀ ଶ୍ରୀ ବିଶ୍ୱବିଦ୍ୟାଳୟର ପ୍ରତିବଦ୍ଧତାକୁ ପୁନର୍ବାର ପ୍ରମାଣିତ କରିଥିଲା ।
