ଭୁବନେଶ୍ୱର: ରାଜ୍ୟର ଅର୍ଦ୍ଧ ନ୍ୟାୟିକ ବ୍ୟବସ୍ଥା ଆଜି ବିଜୁ ଜନତା ଦଳର କବଳରେ ତା’ର ସାମ୍ବିଧାନିକ ଗୁରୁତ୍ୱ ଏବଂ ମହତ୍ୱ ହରାଇଛି । ରାଜ୍ୟର କାର୍ଯ୍ୟରତ ଅନେକ ଅର୍ଦ୍ଧ ନ୍ୟାୟିକ ସଂସ୍ଥାଗୁଡିକୁ ବିଜେଡି ସରକାର କେବଳ ଦଳୀୟ ଥଇଥାନର କେନ୍ଦ୍ର କରି ନାହାନ୍ତି, ଅପରନ୍ତୁ ଏହି ସଂସ୍ଥାଗୁଡିକୁ ସଂପୂର୍ଣ୍ଣ ଧରାଶାୟୀ କରିବାର ଚକ୍ରାନ୍ତ କରିଛନ୍ତି । ଏହାର ଜ୍ଜ୍ୱଳନ୍ତ ଉଦାହରଣ ହେଉଛି ଓଡିଶା ରାଜ୍ୟ ଶିଶୁ ଅଧିକାର ଆୟୋଗ ଏବଂ ରାଜ୍ୟ ମହିଳା ଆୟୋଗ । ଏହି ଦୁଇ ସଂସ୍ଥାରେ ନିୟୋଜିତ ହୋଇଥିବା ସମସ୍ତ ସଭ୍ୟାମାନେ କେବଳ ଦଳୀୟ ଭିତିରେ ନିଯୁକ୍ତି ପାଇନାହାନ୍ତି, ସେମାନେ ନିଯୁକ୍ତି ପାଇବା ପରେ ମଧ୍ୟ ଦଳୀୟ ପଦ ପଦବୀରେ ନିଯୁକ୍ତି ପାଇଛନ୍ତି । ଆଜି କଂଗ୍ରେସ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଗଣମାଧ୍ୟମ ବିଭାଗ ମୁଖ୍ୟ ସତ୍ୟ ପ୍ରକାଶ ନାୟକ ତଥ୍ୟ ଓ ପ୍ରମାଣ ସହିତ ଏହାର ଖୁଲାସା କରିଛନ୍ତି । ଏଥିସହିତ ଓଡିଶାର ଅର୍ଦ୍ଧ ନ୍ୟାୟିକ ବ୍ୟବସ୍ଥା ସଂପୂର୍ଣ୍ଣ ରୂପେ ବିଜେଡି ପଦାଧିକାରୀଙ୍କ ଥଇଥାନ କେନ୍ଦ୍ର ପାଲଟିଛି । ସେଥିପାଇଁ ସାଧାରଣ ଲୋକେ ଏହି ବ୍ୟବସ୍ଥାରୁ ନ୍ୟାୟ ପାଇବାରେ ବଂଚିତ ହେଉଛନ୍ତି । ଓଡିଶା ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ (ଓ.ଏସ୍.ପି.ସି.ଆର) ରେ ରାଜ୍ୟ ସରକାରଙ୍କ ମହିଳା ଓ ଶିଶୁ କଲ୍ୟାଣ ବିଭାଗ ଏକ ବିଜ୍ଞପ୍ତି ଜରିଆରେ ଶ୍ରୀମତୀ ଗୀତାଞ୍ଜଳି ବସ୍ତିଆ, ଶ୍ରୀମତୀ ମନ୍ଦାକିନୀ କର ଓ ଶ୍ରୀମତୀ ନିବେଦିତା ନାୟକଙ୍କୁ ସଭ୍ୟା ଭାବରେ ନିଯୁକ୍ତି କରିଥିଲେ । ଏମାନେ ଅର୍ଦ୍ଧ ନ୍ୟାୟିକ ବ୍ୟବସ୍ଥାରେ ନିଯୁକ୍ତି ପାଇବା ପରେ ପୁନର୍ବାର ଦଳୀୟ ପଦ ପଦବୀରେ ରହିବା ନିଷିଦ୍ଧ ଏବଂ ଏହା ସମ୍ବିଧାନ ବିରୋଧୀ । ମାତ୍ର ଓଡିଶା ସରକାରଙ୍କ ତରଫରୁ ଏମାନଙ୍କୁ ଆୟୋଗରେ ନିଯୁକ୍ତି ପରେ ବିଜୁ ଜନତା ଦଳ ପକ୍ଷରୁ ୨୦୧୮ ମସିହା ନଭେମ୍ବର ୧୧ ତାରିଖରେ ଶ୍ରୀମତୀ ଗୀତାଞ୍ଜଳି ବସ୍ତିଆଙ୍କୁ ବିଜୁ ମହିଳା ଜନତା ଦଳର କାର୍ଯ୍ୟକାରୀ ସଭାପତି ଭାବରେ ନିଯୁକ୍ତି ଦେଇଛନ୍ତି । ବିଭିନ୍ନ ଦଳୀୟ କାର୍ଯ୍ୟକ୍ରମରେ ସେ ଖୋଲାଖୋଲି ଏବଂ ପ୍ରତ୍ୟେକ୍ଷ ଭାବରେ ସଂପୃକ୍ତ ଅଛନ୍ତି । ଡିସେମ୍ବର ୮, ୯ ଓ ୧୦ ତାରିଖରେ ସେ ସୁନ୍ଦରଗଡ ଯାଇ ଦଳର ପର୍ଯ୍ୟବେକ୍ଷକ ଭାବରେ କାର୍ଯ୍ୟ କରିଛନ୍ତି । ସେହଭଳି ମନ୍ଦାକିନୀ କର ବିଜୁ ଯୁବ ଜନତା ଦଳର ରାଜ୍ୟ ଉପସଭାପତି ରହିବା ସହ ବିଭିନ୍ନ ଦଳୀୟ କାର୍ଯ୍ୟକ୍ରମରେ ଯୋଗଦେବାର ଠୋସ୍ ପ୍ରମାଣ ରହିଛି ।
ତତ୍ସହିତ ଶ୍ରୀମତୀ ନିବେଦିତା ନାୟକ ବିଜୁ ଜନତା ଦଳର ଜଣେ ସକ୍ରୀୟ କର୍ମୀ ଭାବରେ ଦଳ ତରଫରୁ ସମ୍ବଲପୁର ଜିଲ୍ଲା ବୁର୍ଲା ଏନ୍.ଏ.ସି.ର ପର୍ଯ୍ୟବେକ୍ଷକ ଭାବେ ଅକ୍ଟୋବର ୨୦୧୭ ମସିହାରେ କାର୍ଯ୍ୟ କରିଛନ୍ତି । ଓଡିଶା ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ (ଓ.ଏସ୍.ପି.ସି.ଆର)ରେ କାର୍ଯ୍ୟ କରୁଥିବା ହେତୁ ଶ୍ରୀମତୀ ଗୀତାଞ୍ଜଳି ବସ୍ତିଆ, ମନ୍ଦାକିନୀ କର ଓ ଶ୍ରୀମତୀ ନିବେଦିତା ନାୟକ ଓଡିଶା ସରକାରଙ୍କ ରାଜକୋଷରୁ ମାସକୁ ୨୫ ହଜାର ଟଙ୍କା ଲେଖାଏଁ ଦରମା, ଗାଡି ଏବଂ ଅନ୍ୟାନ୍ୟ ଆନୁସଙ୍ଗିକ ସରକାରୀ ସୁବିଧା ସୁଯୋଗ ପାଉଛନ୍ତି । ସେହିପରି ରାଜ୍ୟ ମହିଳା କମିଶନର ସଭ୍ୟା ଭାବରେ ଶ୍ରୀମତୀ ସ୍ନେହାଞ୍ଜଳି ମହାନ୍ତି ନିଯୁକ୍ତି ପାଇଛନ୍ତି । ଯିଏକି ମାସକୁ ୨୫ ହଜାର ଟଙ୍କା ଦରମା ପାଉଛନ୍ତି । ରାଜ୍ୟ ମହିଳା କମିଶନ ମହିଳାମାନଙ୍କର ସୁରକ୍ଷା କ୍ଷେତ୍ରରେ ଖୁବ୍ ଗୁରୁତ୍ୱପୂର୍ଣ୍ଣ କାର୍ଯ୍ୟ ନିର୍ବାହ କରିଥାଏ । ଏହାର ସଭ୍ୟ / ସଭ୍ୟାମାନେ ଦଳୀୟ କାର୍ଯ୍ୟକ୍ରମର ଉଦ୍ଧ୍ୱର୍ରେ ରହିବା ଆବଶ୍ୟକ । ମାତ୍ର ଏହାକୁ ବେଖାତିର କରି ବିଜେଡି ଦଳର ବିଭିନ୍ନ ରାଜନୈତିକ କାର୍ଯ୍ୟକ୍ରମରେ ସେମାନେ ଯୋଗଦେବା ସହିତ ସକ୍ରୀୟ ଅଂଶଗ୍ରହଣ କରୁଛନ୍ତି । ଅର୍ଦ୍ଧ ନ୍ୟାୟିକ ବ୍ୟବସ୍ଥାର ଅଧ୍ୟକ୍ଷ ଏବଂ ସଭ୍ୟମାନେ ଓଡିଶା ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ ଆଇନ୍- ୨୦୦୫ ଧାରା ୩୨ ଅନୁଯାୟୀ ସମସ୍ତେ ଜଣେ ଜଣେ ସରକାରୀ କର୍ମଚାରୀ ଭାବରେ ପରିଗଣିତ ହେବେ । ତେଣୁ ଜଣେ ସରକାରୀ କର୍ମଚାରୀ ସିଧାସଳଖ ଭାବରେ ଦଳୀୟ ପଦପଦବୀ ନେବା ଆଇନ୍ ବିରୁଦ୍ଧ ବୋଲି ସାମ୍ବାଦିକ ସମ୍ମିଳନୀରେ ଉପସ୍ଥିତ ଅନ୍ୟତମ ମୁଖପାତ୍ର ନିଶିକାନ୍ତ ମିଶ୍ର ସିଧାସଳଖ ଭାବରେ ସରକାରଙ୍କୁ ଟାର୍ଗେଟ୍ କରିଥିଲେ ଏବଂ ତୁରନ୍ତ ସଂପୃକ୍ତ ବ୍ୟକ୍ତି ବିଶେଷଙ୍କ ଠାରୁ ଲାଭଦାୟକ ପଦପଦବୀରେ ଥାଇ ସାଧାରଣ ଟିକସଦାତାଙ୍କ ପଇସାରୁ ନେଇଥିବା ଦରମା, ମହଙ୍ଗାଭତା ଇତ୍ୟାଦି ଅସୁଲ କରାଯିବା ସହ ଏମାନଙ୍କ ବିରୁଦ୍ଧରେ ଦୃଢ଼ ଆଇନ୍ଗତକାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହିତ ସେମାନଙ୍କୁ ତାଙ୍କ ପଦରୁ ବହିଷ୍କାର କରାଯାଉ ବୋଲି ଶ୍ରୀ ମିଶ୍ରୀ ଦାବି କରିଛନ୍ତି । ଏହି ସାମ୍ବାଦିକ ସମ୍ମିଳନୀରେ ମୁଖପାତ୍ର ପ୍ରଶାନ୍ତ ଶତପଥି, ସୁଦର୍ଶନ ଦାସ, ଦୀପକ ମହାପାତ୍ର ଓ ଓମ୍ ପ୍ରକାଶ ସାହୁ ପ୍ରମୁଖ ଉପସ୍ଥିତ ଥିଲେ ।

LEAVE A REPLY

Please enter your comment!
Please enter your name here