ବେନତଟୀ, ୩/୧୨ : ଆଜି ବୈଶିଙ୍ଗା ଥାନା ଅଧୀନ ଖୁଣ୍ଟାପୁର ଚିନ୍ତାମଣୀ ତିଳୋତ୍ତମା ବାଳିକା ଉଚ୍ଚ ବିଦ୍ୟାଳୟରେ ପରୀକ୍ଷା ଥିଲା । ଗତ ୩୦ ଅକ୍ଟୋବରରେ ଏହି ସ୍କୁଲରେ ଘଟିଥିବା ଛାତ୍ରୀ ଅସଦାଚରଣ ଘଟଣାକୁ ନେଇ ଏହି ସ୍କୁଲରେ ପଢ଼ୁଥିବା ଛାତ୍ରୀ ଓ ଅଭିଭାବକ ମାନେ ସଂଶୟରେ ରହିଛନ୍ତି । ନିଜ ନିଜ ପିଲାର ଭବିଷ୍ୟତ ଅନ୍ଧକାର ହେବାକୁ ନେଇ ଏବେ ଅଭିଭାବକ ମାନେ ଚିନ୍ତାରେ ରହିଛନ୍ତି । ୩୦ ଅକ୍ଟୋବର ଠାରୁ ଛାତ୍ରୀ ମାନେ ଏଠାରେ ଥିବା ଛାତ୍ରୀ ନିବାସରୁ ଭୟରେ ପଳାଇ ଯାଇ ଘରେ ରହି ପାଠ ପଢ଼ୁ ଥିଲେ ଓ ଆଜି ଟେଷ୍ଟ ପରୀକ୍ଷା ଥିବାରୁ ନିଜ ନିଜର ଅଭିଭାବକ ମାନଙ୍କ ସହିତ ସ୍କୁଲକୁ ଆସି ଥିଲେ । ତେବେ ଏହି ଛାତ୍ରୀ ମାନଙ୍କ ମଧ୍ୟରୁ କେତେକଙ୍କୁ ଏହି ସ୍କୁଲର ନିଲମ୍ବିତ ପ୍ରଧାନ ଶିକ୍ଷୟତ୍ରୀ ସୁଜାତାରାଣୀ ପତି ପାଟିତୁଣ୍ଡ କରିବା ସହିତ ଆଶାଳିନ ବ୍ୟବହାର ପ୍ରଦାନ କରି ଥିଲେ । ଏଥିରେ ଅନ୍ୟୁନ ୧୫ରୁ ଉର୍ଦ୍ଧ ଛାତ୍ରୀ ଭୟଭୀତ ହୋଇ ପରୀକ୍ଷା ଦେଇ ନଥିବାର ଜଣା ପଡିଛି । ପ୍ରଧାନ ଶିକ୍ଷୟତ୍ରୀ ନିଲମ୍ବିତ ହୋଇ କାହିଁକି ସ୍କୁଲ ପରିସରରେ ପ୍ରାଧାନ୍ୟ ଜାରି ରଖିଛନ୍ତି ଓ ତାଙ୍କ ପିଲାଙ୍କ ଭବିଷ୍ୟତ କଣ ହେବ ବୋଲି ମହିଳା ଅଭିଭାବକ ମାନେ ପଚାରିବାକୁ ଯିବାରୁ ସୁଜାତା ସେମାନଙ୍କୁ ଜାତି ଉଠାଇ ଗାଳି ଗୁଲଜ କରି ଥିଲେ । ଏହି ଘଟଣା ଜଣା ପଡିବା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ଦେଖା ଯାଇ ଥିଲା । ଏହି ସ୍କୁଲରେ ବାରମ୍ବାର ଅପ୍ରତିକର ଘଟଣା ଘଟି ଚାଲିଛି ଓ ନିଜେ ପ୍ରଧାନ ଶିକ୍ଷୟତ୍ରୀ ତାଙ୍କ ସ୍ୱାମୀ ଏଥିରେ ସମ୍ପୃକ୍ତ ରହୁ ଥିବା ବେଳେ ନା ପୋଲିସ କିମ୍ବା ଶିକ୍ଷା ବିଭାଗ ଏହାର ସମାଧାନ କରି ପାରୁ ନଥିବାର ଆଲୋଚନା ହୋଇ ଥିଲା । ସ୍ଥାନୀୟ ଅନ୍ୟୁନ ୨୫ଟି ଗ୍ରାମର ଲୋକମାନେ ଏକତ୍ରିତ ହୋଇ ପିଲାଙ୍କ ଭବିଷ୍ୟତ କଣ ହେବ ବୋଲି ପ୍ରଶ୍ନ କରି ଥିଲେ । ଧୀରେ ଧୀରେ ଉତ୍ତେଜନା ବଢ଼ିବାରେ ଲାଗି ଥିଲା । ଶେଷରେ ବହୁ ଦିନରୁ ପୁଞ୍ଜିଭୂତ ଉତ୍ତେଜନା ବିସ୍ଫୋରକ ରୁପ ନେଇ ଥିଲା । ଉତ୍ୟୋକ୍ତ ଲୋକମାନେ ଅପରାହ୍ନ ୨ଟା ସମୟରେ ପଣସିଆ ଛକ ନିକଟରେ ବୈଶିଙ୍ଗା ରୁପସା ରାସ୍ତାକୁ ଅବରୋଧ କରି ଥିଲେ । ରାସ୍ତାରେ ଟାୟାର ଜାଳି ଅନ୍ୟାୟର ପ୍ରତିବାଦ କରା ଯାଇ ଥିଲା । ଶହଶହ ଗାଡି ମୋଟର ରାସ୍ତାରେ ଅଟକି ରହି ଥିଲା । ହଜାର ହଜାର ମହିଳା ପୁରୁଷ ଏହି ଆାନେ୍ଦାଳନରେ ଯୋଗ ଦେଇ ଥିଲେ । ଏହି ଆନେ୍ଦାଳନରେ ଛାତ୍ରୀ, ଅଭିଭାବକ, ଅଞ୍ଚଳର ଲୋକେ ସମସ୍ତେ ସାମିଲ ଥିଲେ । ଲୋକମାନେ ଜିଲ୍ଲାପାଳ, ଏସପି ଓ ଜିଲ୍ଲା ଶିକ୍ଷା ଅଧିକାରୀ ଏଠାକୁ ଆସି ସମସ୍ୟାର ସମାଧାନ କରନ୍ତୁ ବୋଲି ଦାବି କରି ଥିଲେ । ଶେଷରେ ଜିଲ୍ଲା ଶିକ୍ଷା ଅଧିକାରୀ ଧ୍ରୁବଚରଣ ବେହେରା, ବ୍ଲବ ଶିକ୍ଷା ଅଧିକାରୀ ଶ୍ରୀକୃଷ୍ଣ ପାତ୍ର, ଏବିଇଓ କାଳିଚରଣ ମହାନ୍ତ ପ୍ରମୁଖ ପହଞ୍ଚି ଲୋକ ମାନଙ୍କୁ ବୁଝାସୁଝା କରି ଥିଲେ । ହେଲେ ଶିକ୍ଷା ବିଭାଗର କୋହଳ ନିତି ପାଇଁ ସ୍ଥାନୀୟ ଲୋକେ ଡିଇଓ, ବିଇଓ ଓ ଶିକ୍ଷା ଅଧିକାରୀ ମାନଙ୍କ ପ୍ରତି ଅସନ୍ତୁଷ୍ଟି ବ୍ୟକ୍ତ କରି ଥିଲେ । ପ୍ରଧାନ ଶିକ୍ଷୟତ୍ରୀ ସୁଜାତାରାଣୀ ପତିଙ୍କୁ ନିଲମ୍ବନ ପରେ ସମସ୍ତ ଦାୟୀତ୍ୱ ଭାରପ୍ରାପ୍ତ ପ୍ରଧାନ ଶିକ୍ଷକ ପ୍ରଦୀପ କୁମାର ସାହୁଙ୍କୁ ହସ୍ତାନ୍ତର କରିବାକୁ ନିଦେ୍ର୍ଦଶ ଦିଆ ଯାଇଛି ବୋଲି ଡିଇଓ ପ୍ରକାଶ କରି ଥିଲେ । ସେହିପରି ପ୍ରଧାନ ଶିକ୍ଷୟତ୍ରୀ ସୁଜାତାଙ୍କ ଅଭିଯୁକ୍ତ ସ୍ୱାମୀ ଚିନ୍ମୟ ମିଶ୍ର ଫେରାର ଥିବାରୁ ତାଙ୍କୁ ମଧ୍ୟ ନିଲମ୍ବିତ କରା ଯାଇଛି ଓ ମୁଖ୍ୟାଳୟ ନଛାଡିବାକୁ ନିଦେ୍ର୍ଦଶ ଦିଆ ଯାଇଛି ବୋଲି ଡିଇଓ ସୂଚନା ଦେଇ ଥିଲେ । ଚିନ୍ତାମଣୀ ତିଳୋତ୍ତମାର ଭାରପ୍ରାପ୍ତ ପ୍ରଧାନ ଶିକ୍ଷକ ଶ୍ରୀସାହୁ ତୁରନ୍ତ ଦାୟୀତ୍ୱ ନେଇ ପରିଚାଳନା କମିଟୀ ଗଠନ କରିବା ଓ ସ୍କୁଲକୁ ସୁଚରୁ ରୁପେ ପରିଚାଳାନ କରିବାକୁ ନିଦେ୍ର୍ଦଶ ଦିଆ ଯାଇଛି । ଘଟଣାକୁ ନେଇ ବେତନଟୀ ଏସଡିପିଓ ଲଳିତ କୁମାର ପଟ୍ଟନାୟକ, ବୈଶିଙ୍ଗା ଥାନା ଆଇଆଇସି କୃଷ୍ଣଚନ୍ଦ୍ର ପଲେଇ, ଏସଆଇ ଅନୀତା ସ୍ୱାଇଁ, ଏସଆଇ ଶିରୀଶ କୁମାର ନାୟକ, ଏଏସଆଇ ସୁଶାନ୍ତ କୁମାର ମହାକୁଡ ପ୍ରମୁଖ ଘଟଣାସ୍ଥଳରେ ପହଞ୍ଚି ଥିଲେ । ଗାଳି ଖାଇଥିବା ମହିଳାଙ୍କ ଅଭିଯୋଗକ୍ରମେ ବୈଶିଙ୍ଗା ଥାନାରେ ପ୍ରଧାନ ଶିକ୍ଷୟତ୍ରୀ ସୁଜାତା ପତିଙ୍କ ବିରୁଦ୍ଧରେ ମାମଲା ନମ୍ବର ୨୬୮/୨୦୧୯ ରୁଜୁ ହୋଇ ବେତନଟୀ ଏସଡିପିଓ ତଦନ୍ତ କରୁଛନ୍ତି । ପ୍ରଧାନ ଶିକ୍ଷୟତ୍ରୀଙ୍କୁ ସ୍କୁଲ ମଧ୍ୟରୁ ପୋଲିସ ଗିରଫ କରି ବୈଶିଙ୍ଗା ଥାନାକୁ ଆଣି ଥିଲା । ତାଙ୍କୁ ଆଣିବା ବେଳେ ଗାଡିରେ ବସାଇ ଆଣିବାକୁ ନେଇ ପୋଲିସ ଜିପ ସମ୍ମୁଖରେ ଶୋଇ ମହିଳା ମାନେ ପ୍ରତିବାଦ କରି ଥିଲେ । ଗତ ୩୦ ଅକ୍ଟୋବର ଏହି ସ୍କୁଲର ପ୍ରଧାନ ଶିକ୍ଷୟତ୍ରୀ ସୁଜାତାରାଣୀ ପତିଙ୍କ ସ୍ୱାମୀ ଚିନ୍ମୟ ମିଶ୍ର ଏହି ସ୍କୁଲର ଜଣେ ୧୦ମ ଶ୍ରେଣୀ ନାବାଳିକା ଛାତ୍ରୀଙ୍କୁ ଛାତକୁ ଡାକିନେଇ ଅସଦାଚରଣ କରିବା ପରେ ଫେରାର ହୋଇ ଯାଇଛନ୍ତି । ତେବେ ଏହାକୁ ନେଇ ଅଭିଭାବକ, ଅଞ୍ଚଳବାସୀ, ଛାତ୍ରୀ ମାନଙ୍କ ମଧ୍ୟରେ ତୀବ୍ର ଅସନ୍ତୁଷ୍ଟି ଦେଖା ଦେଇଛି । ଥରେ ଅଧେ ନୁହେଁ ବାରମ୍ବାର ଏପରି ହେଉ ଥିଲେ ମଧ୍ୟ ପ୍ରଶାସନ କୌଣସି ପ୍ରକାର କଡା ପଦକ୍ଷପ ଗ୍ରହଣ କରି ପାରୁନାହିଁ । ପୋକ୍ସେ ଅନୁଚ୍ଛେଦ ୮ ଓ ୧୨ରେ ସଂପୃକ୍ତ ଅଭିଯୁକ୍ତ ଚିନ୍ମୟ ମିଶ୍ରଙ୍କ ନାମରେ ମାମଲା ରୁଜୁ ହୋଇ ଥିଲେ ମଧ୍ୟ ପୋଲିସକୁ ଚକମା ଦେଇ ଅଭିଯୁକ୍ତ ଜଣକ ପାଖ ଗ୍ରାମ, ମନ୍ଦିର ଓ ଅନ୍ୟତ୍ର ବୁଲିବୁଲୁଛି । ତେବେ ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୁଷ୍ଟି ଦେଖା ଦେଇଛି । ଶେଷରେ ଗ୍ରାମର କେତେକ ଲୋକ ୫ଟିର ଦୃଷ୍ଟି ଆକର୍ଷଣ କରିଛନ୍ତି ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ତୁରନ୍ତ କାର୍ଯ୍ୟାନୁଷ୍ଠାନ ହେବ ବୋଲି ପ୍ରତିଶୃତି ମିଳିଛି । ତେବେ ବୁଝାସୁଝା ପରେ ଅପରାହ୍ନରୁ ସନ୍ଧ୍ୟା ପର୍ଯ୍ୟନ୍ତ ଚାଲି ଥିବା ରାସ୍ତାରୋକୋ ପ୍ରତ୍ୟାହୃତ ହୋଇଛି ।

LEAVE A REPLY

Please enter your comment!
Please enter your name here